ಚಿಂದಿ ಆಯುವ ಹುಡುಗರು ನಾವು

ಚಿಂದಿ ಆಯುವ ಹುಡುಗರು ನಾವು
ಊರು, ಬೀದಿಯ ಸುತ್ತುವೆವು
ನೀವು ಬೇಡವೆಂದಿಸೆದ ಕಸವ
ರಸವನಾಗಿಸೆ ಹೆಕ್ಕುವೆವು|೧|

ಹರಕು ಬಟ್ಟೆಯೆ ನಮ್ಮಯ ವೇಷ
ನೋಣದ ಮೇಲೆಯೂ ಇಲ್ಲ ದ್ವೇಷ
ಕಾಣುವುದೇ ಬರಿ ನಮ್ಮಯ ಕೊಳಕು?
ಹೊಟ್ಟೆಗಾಗಿಯೆ ನಮ್ಮೀ ಬದುಕು|೨|

ಅಪ್ಪನು ಇಲ್ಲ, ಅಮ್ಮನು ಇಲ್ಲ
ಇದ್ದವರಲೆಮಾರಿಗಳು, ಕುಡುಕರು
ನನ್ನ ತಮ್ಮ ತಂಗಿಯರನು ಬೆಳೆಸೆ
ನನ್ನ ಕನಸ ನಾ ಕೊಂದಿಹೆನು|೩|

ನಿಮ್ಮ ಬದುಕು ನಿಮಗ್ಹೇಗೋ ಹಾಗೆ
ನಮ್ಮ ಕಸುಬು ನಮಗೆ
ಮೋಸ ಮಾಡದ, ಪರರ ಹಿಂಸಿಸದ
ಕೊಡುಗೆ ಸ್ವಚ್ಛತೆಯಡೆಗೆ|೪|

ನಮಗೂ ನಿಮ್ಮಂತೆ ಶಾಲೆಯು ಬೇಕು
ಕಸ ತುಂಬಿ ತಿರುಗೋ ಚೀಲವು ಸಾಕು
ಮಳೆಯಲಿ ನೆನೆಯದ ನಿದ್ದೆಯ ನೆನಪು
ಎಂದು ಮೂಡುವುದೋ ಬಾಳಲಾ ಬೆಳಕು?|೫|