ನಿಮ್ಮ ಮಾಹಿತಿ ಹರಾಜಿಗಿದೆ!

ಮೊನ್ನೆ ಗೆಳೆಯರೊಬ್ಬರು ಫೇಸ್ಬುಕ್ ಮತ್ತು ಗೂಗಲ್ಲು ನಮ್ಮ ಖಾಸಗಿತನವನ್ನು ಉಲ್ಲಂಘಿಸುತ್ತಿದೆ ಅಂತ ಹೇಳ್ತಾ ಇದ್ದರು. ನಿಮಗೂ ಇದರ ಅನುಭವವಾಗಿರಬಹುದು. ಉದಾಹರಣೆಗೆ ನೀವು ಬ್ಯಾಂಕಲ್ಲಿ ಎಫ್.ಡಿ ಇಡೋಕೆ ಬಡ್ಡಿ ಎಷ್ಟು ಅಂತ ಗೂಗಲ್ಲಲ್ಲಿ ಹುಡುಕಿದ್ದೀರ ಅಂತಂದುಕೊಂಡರೆ ನಿಮ್ಮ ಜಿಮೇಲ್ ಖಾತೆಗೆ ವಿವಿಧ ಬ್ಯಾಂಕುಗಳ ಜಾಹೀರಾತುಗಳು ಬರುತ್ತೆ. ನೀವು ಅಮೇಜಾನಿನಲ್ಲಿ ಯಾವುದೋ ಒಂದು ಕಂಪೆನಿಯ ಬಟ್ಟೆಯನ್ನೋ ಮೊಬೈಲನ್ನೋ ಹುಡುಕಿದ್ದೀರ ಅಂದರೆ ನಿಮ್ಮ ಫೇಸ್ಬುಕ್ಕಿನಲ್ಲಿ ಆ ಕಂಪೆನಿಯ ಜಾಹೀರಾತುಗಳು ಬರುತ್ತಿರುತ್ತೆ ! ನಾನು ಏನಾರೂ ಹುಡುಕಿಕೊಳ್ಳಲಿ , ಅದು ನನಗೆ ಮತ್ತು ನನ್ನ ಕುಟುಂಬಕ್ಕೆ ಸಂಬಂಧಪಟ್ಟ ವಿಚಾರ. ಅದನ್ನು ಈ ಫೇಸ್ಬುಕ್ಕು, ಜೀಮೇಲು, ಗೂಗಲ್ಲಿನವರು ಜಾಹೀರಾತು ಕಂಪೆನಿಗಳಿಗೆ ಮಾರೋದ್ಯಾಕೆ ? ಅವರು ನಮಗೆ ಈ ಸಂಬಂಧದ ಜಾಹೀರಾತು ಕಳುಹಿಸೋದ್ಯಾಕೆ ಅಂತ ನಿಮ್ಮಲ್ಲಿ ಸುಮಾರು ಜನ ಗೊಣಗಿಕೊಂಡೂ ಇರ್ತೀರ. ಆದರೆ ಅದಕ್ಕೆಲ್ಲಾ ನೀವೇ ಕಾರಣರು ಮತ್ತು ನಿಮ್ಮ ಕಂಪ್ಯೂಟರ್/ಮೊಬೈಲ್ ಅಂದರೆ ನಂಬ್ತೀರಾ ? ಹೌದು. ಅದಕ್ಕೆಲ್ಲಾ ಕಾರಣ ನೀವೆ. ಅದೇಗೆ ಅಂತ ನೋಡೋಣ. 

ಗೂಗಲ್ಲು ಮತ್ತು ಗೌಪ್ಯತೆ: 

ಗೂಗಲ್ಲನ್ನು ಮೊದಲು ಬಳಸೋ ಮೊದಲು ಕೆಳಗಿನ ಚಿತ್ರದಲ್ಲಿ ಇರೋ ತರ ನಿಮ್ಮ ಗೂಗಲ್ ಬಳಕೆಯ ಬಗೆಗಿನ ಒಪ್ಪಂದ ತೋರಿಸಿರುತ್ತೆ. 

ಅದರಲ್ಲಿ ನೀವು ಗೂಗಲ್ಲಿನ ಗೂಗಲ್ ಅನಾಲಿಟಿಕ್ಸ್ ಮತ್ತು ಗೂಗಲ್ಲಿನ ಕುಕೀಸನ್ನು ಬಳಸೋಕೆ ಅನುಮತಿಯನ್ನೂ ನೀಡಿರುತ್ತೀರಿ.  ಅದರಲ್ಲಿ ಕಣ್ಮುಚ್ಚಿಕೊಂಡು ಸರಿ ಎಂದರೆ ನೀವು ಗೂಗಲ್ಲಿನ ಉತ್ಪನ್ನಗಳಾದ ಗೂಗಲ್ ಕ್ರೋಮ್, ಗೂಗಲ್ ಸರ್ಚ್, ಜೀಮೇಲ್ಗಳನ್ನು ಬಳಸಿ ಏನೇ ಮಾಡಿದರೂ ಈ ಕುಕೀಸಿನ ಮೂಲಕ ಈ ಮಾಹಿತಿ ಗೂಗಲ್ಲಿನ ಮಡಿಲು ಸೇರುತ್ತೆ. ಉದಾಹರಣೆಗೆ ನೀವು ಗೂಗಲ್ ಕ್ರೋಮ್ ಬ್ರೌಸರ್ ಬಳಸಿ ಫೇಸ್ಬುಕ್ ತೆರೆದು ಅಲ್ಲೇನಾದರೂ ಹುಡುಕಿದರೂ , ಅದೇ ಬ್ರೌಸರಿನಲ್ಲಿ ಅಮೇಜಾನ್ ತೆರೆದು ಹುಡುಕಿದರೂ , ಗೂಗಲ್ ಸರ್ಚ್ ಮಾಡಿದರೂ ನಿಮ್ಮ ಕಂಪ್ಯೂಟರ್ ಅಥವಾ ಮೊಬೈಲಿನ ಇಂಟರ್ನೆಟ್ ಅಡ್ರೆಸ್ ಮೂಲಕ ಇದನ್ನು ಹುಡುಕಿದ್ದು ನೀವೇ ಎಂಬ ಮಾಹಿತಿ ಗೂಗಲ್ಲಿನ ಕುಕೀಸ್ ಮೂಲಕ ಅದು ಗೂಗಲ್ ಮಡಿಲು ಸೇರುತ್ತೆ. ಗೂಗಲ್ ಅನಾಲಿಟಿಕ್ಸ್ ಯಾವ್ಯಾವ ವ್ಯಕ್ತಿ ಯಾವ್ಯಾವ ರೀತಿಯ ಮಾಹಿತಿ/ಉತ್ಪನ್ನಗಳಲ್ಲಿ ಆಸಕ್ತಿ ಹೊಂದಿದ್ದಾನೆ ಅನ್ನೋ ಮಾಹಿತಿಯನ್ನು ಕಲೆಹಾಕಿ ಅವರಿಗೆ ಅದಕ್ಕೆ ಸಂಬಂಧಿಸಿದ ಜಾಹೀರಾತುಗಳನ್ನು 

ಕಳುಹಿಸಬಹುದು ಎಂದು ನಿರ್ಧರಿಸುತ್ತೆ. ತಮ್ಮ ಕಂಪೆನಿಯ ಉತ್ಪನ್ನಗಳಿಗೆ ಸಂಬಂಧಿಸಿದ ಜಾಹೀರಾತುಗಳನ್ನು  ಆ ಉತ್ಪನ್ನಗಳ ಬಗ್ಗೆ ಆಸಕ್ತಿವಹಿಸಿರೋ ವ್ಯಕ್ತಿಗಳಿಗೇ ಕಳುಹಿಸಬೇಕು ಎಂದು ಕಾಯುತ್ತಿರುತ್ತೆ. ಯಾರ್ಯಾರಿಗೋ ಕಳುಹಿಸಿದರೆ ಸುಮ್ಮನೇ ವ್ಯರ್ಥ ಖರ್ಚಲ್ಲವೇ ಎಂದು ಅವುಗಳ ಲೆಕ್ಕ. ಈ ತರದ ಕಂಪೆನಿಗಳು ಗೂಗಲ್ ಮೊರೆ ಹೋಗುತ್ತೆ. ಗೂಗಲ್ಲು ತನ್ನಲ್ಲಿ ಆಗಲೇ ಇರುವ ಅನಾಲಿಟಿಕ್ಸಿನ ಮಾಹಿತಿಯ ಮೇರೆಗೆ ಇಂತಹವರಿಗೆ ಕಳುಹಿಸಬಹುದು ಎಂದು ಆ ಕಂಪೆನಿಗಳಿಂದ ಒಂದಿಷ್ಟು ದುಡ್ಡು ಪಡೆಯುತ್ತೆ !  ನೀವು ಅದೇ ಬ್ರೌಸರಿನಲ್ಲಿ ನಿಮ್ಮ ಜಿಮೇಲಿಗೆ ಲಾಗಿನ್ ಆಗಿದ್ದರಂತೂ ಮುಗಿದೇ ಹೋಯ್ತು. ಅವೆಲ್ಲಾ ಮಾಹಿತಿಗೆ ಸಂಬಂಧಪಟ್ಟ ಜಾಹಿರಾತುಗಳು ನಿಮ್ಮ ಜಿಮೇಲ್ ಖಾತೆಗೆ ಬರುತ್ತೆ ! 

ಗೂಗಲ್ಲಿನಲ್ಲಿ ಗೌಪ್ಯತೆಯನ್ನು ಹೇಗೆ ಕಾಪಾಡಿಕೊಳ್ಳೋದು? 

ಚಿತ್ರ ಒಂದರಲ್ಲಿ ಸೀದಾ ಒಪ್ಪಿಕೊಳ್ಳೋ ಬದಲು ಕಸ್ಟಮೈಸ್ ಅನ್ನೋ ಆಯ್ಕೆಯನ್ನು ಒತ್ತಿದರೆ ಗೂಗಲ್ಲು ಯಾವ್ಯಾವ ಮಾಹಿತಿಯನ್ನು ಕಲೆಹಾಕಬಹುದು ಅನ್ನೋದನ್ನು ಆರಿಸಬಹುದು.  

ಸರ್ಚ್ ಕಸ್ಟಮೈಸೇಷನ್: 

ಇದರಲ್ಲಿ ಮೇಲಿನ ಚಿತ್ರದಲ್ಲಿ ಇರುವಂತೆ ನೀವು ಈಗಾಗಲೇ ಹುಡುಕಿರುವ ಮಾಹಿತಿಗೆ ಸಂಬಂಧಿಸಿದಂತಹ ಮಾಹಿತಿ ಮತ್ತು ಸರ್ಚ್ ಫಲಿತಾಂಶಗಳನ್ನು ತೋರಿಸಬಹುದಾ ಎಂದು ಆಯ್ಕೆ ಮಾಡಬಹುದು. ಉದಾಹರಣೆಗೆ ನೀವು ಕಾರಿನ ಎಂಜಿನ್ ಆಯಿಲ್ ಬಗ್ಗೆ ಗೂಗಲ್ಲಿನಲ್ಲಿ ಸರ್ಚ್ ಮಾಡಿದ್ದರೆ ಮುಂದಿನ ಸಲ ನೀವು ನಿಮ್ಮ ಪ್ರಶ್ನೆಯನ್ನು ಪೂರ್ತಿ ಟೈಪ್ ಮಾಡೋ ಮೊದಲೇ (ಉದಾಹರಣೆಗೆ how to ಎಂದು ಟೈಪ್ ಮಾಡೋ ಹೊತ್ತಿಗೇ) ಇಂಜಿನ್ ಆಯಿಲ್ಲಿಗೆ ಸಂಬಂಧಿಸಿದ ಮಾಹಿತಿ ಬರುತ್ತೆ. ಇದೊಂತರ ನಿಮ್ಮ ಖಾಸಗಿತನದ ಉಲ್ಲಂಘನೆ. ಇದನ್ನು ಆಫ್ ಮಾಡಬಹುದು. 

ಯೂಟ್ಯೂಬ್ ಇತಿಹಾಸ: 

ನೀವು ಯೂಟ್ಯೂಬಿನಲ್ಲೀ ಯಾವುದಾದರೂ ಒಂದು ವೀಡಿಯೋ ನೋಡಿದರೆ ಮುಂದೆ ಪ್ರತೀ ಬಾರಿ ಯೂಟ್ಯೂಬ್ ತೆರೆದಾಗಲೂ ಅದಕ್ಕೆ ಸಂಬಂಧಿಸಿದ ವೀಡಿಯೋಗಳೇ ತೆರೆದುಕೊಳ್ಳುತ್ತೆ !. ಇದನ್ನೂ ಆಫ್ ಮಾಡಬಹುದು. 

ಆಡ್ ಪರ್ಸನಲೈಸೇಷನ್ : 

ಇದರಲ್ಲಿ ನೀವು ಗೂಗಲ್ ಮತ್ತು ಯೂಟ್ಯೂಬಲ್ಲಿ ಹುಡುಕಿದ ಮಾಹಿತಿಯ ಮೇಲೆ ನಿಮಗೆ ಜಾಹೀರಾತುಗಳನ್ನು ಕಳುಹಿಸಬಹುದಾ ಎಂದು ಆಯ್ಕೆ ಮಾಡಬಹುದು. ನೀವು ಚಿತ್ರ ಒಂದರಲ್ಲೇ ಓಕೆ ಅಂದರೆ ಮೇಲಿನ ಎಲ್ಲದಕ್ಕೂ ನೀವು ಒಪ್ಪಿಕೊಂಡಂತೆಯೇ. ಆಮೇಲೆ ನಾನು ಯೂಟ್ಯೂಬಲ್ಲಿ ಹುಡುಕಿದ್ದು, ಗೂಗಲ್ಲಲ್ಲಿ ಹುಡುಕಿದ್ದಕ್ಕೆ ಸಂಬಂಧಿಸಿದ ಜಾಹೀರಾತು ನನಗೆ ಬಂತು ಎಂದು ಗೊಣಗುವಂತಿಲ್ಲ !

ಏನಿದು ಕುಕೀಸ್?   

ಲೇಖನದಲ್ಲಿ ಆಗಾಗ ಕುಕೀಸ್ ಅಂತ ಬಳಸಿದ್ದನ್ನು ಓದಿದಿರಿ. ಏನಿದು ಕುಕೀಸ್ ಅಂತ ಅಂದ್ಕೋತಾ ಇದ್ದೀರಾ ? ನೀವು ಯಾವುದೇ ವೆಬ್ ಸೈಟಿಗೆ ಭೇಟಿ ಕೊಡುತ್ತೀರ ಎಂದುಕೊಳ್ಳಿ. ಅಲ್ಲಿಗೆ ಯಾರು ಬಂದರು , ಏನು ಹುಡುಕಿದರು, ಏನು ತಗೊಂಡರು, ತಗೊಂಡವರು ಮಾಹಿತಿಗಳೇನು ಎಂಬುದನ್ನೆಲ್ಲಾ ಸಂಗ್ರಹಿಸಲು ಆ ವೆಬ್ಸೈಟುಗಳು ಕುಕೀಸ್ ಅನ್ನು ಬಳಸುತ್ತಾರೆ. ನೀವು ಗೂಗಲ್ ಕ್ರೋಮ್ ಬಳಸೋದಾದರೆ ಅದರ ಸೆಟ್ಟಿಂಗ್ > ಪ್ರೈವಸಿ ಮತ್ತು ಸೆಕ್ಯುರಿಟಿ ಎಂಬ ಆಯ್ಕೆಯಲ್ಲಿ ಯಾವುದಾದರೂ ವೆಬ್ ಸೈಟು ಕುಕೀಸನ್ನು ಬಳಸಬಹುದಾ ಅಥವಾ ಇಲ್ಲವಾ ಎಂದು ನಿರ್ಧರಿಸಬಹುದು. ಇದೇ ರೀತಿ ಬೇರೆ ಬೇರೆ ಬ್ರೌಸರುಗಳಲ್ಲಿ ಬೇರೆ ಬೇರೆ ಆಯ್ಕೆಗಳೂ ಇರುತ್ತೆ. 

ಇನ್ಕಾಗ್ನಿಟೋ ಆಯ್ಕೆ: 

ಸುಮಾರಷ್ಟು ಬ್ರೌಸರುಗಳಲ್ಲಿ ಮತ್ತು ಯೂಟ್ಯೂಬಿನಲ್ಲಿ ಇನ್ಕಾಗ್ನಿಟೋ ಮೋಡ್ ಅಥವಾ ಪ್ರೈವೇಟ್ ಮೋಡ್ ಎಂಬ ಆಯ್ಕೆ ಇರುತ್ತೆ. ಅಂದರೆ ಈ ಮೋಡಲ್ಲಿ ಸರ್ಚ್ ಮಾಡಿದರೆ ಆ ಮಾಹಿತಿ ಕುಕೀಸ್ಗಳಲ್ಲಿ ಶೇಖರವಾಗೋದಿಲ್ಲ. ಆಗಾಗ ನಿಮ್ಮ ಗೂಗಲ್ ಸರ್ಚ್ ಇತಿಹಾಸವನ್ನೂ ಅಳಿಸಬಹುದು. ಇದರಿಂದ ನಿಮ್ಮ ಖಾಸಗಿತನದ ಸಂರಕ್ಷಣೆ ಮಾಡಿಕೊಳ್ಳಬಹುದು.  

ಕಂಪ್ಯೂಟರ್ ಸಾಕ್ಷರತಾ ದಿನ

ಇತ್ತೀಚೆಗೆ ನನ್ನ ಗೆಳೆಯರೊಬ್ಬರಿಂದ "Is it you in the Video?" ಅಂತ ಫೇಸ್ಬುಕ್ ಮೆಸೆಂಜರಿನಲ್ಲಿ ಮೆಸೇಜ್ ಬಂದಿತ್ತು. ನಾನ್ಯಾವ ವೀಡೀಯೋನೂ ಹಾಕಿಲ್ಲ ಅನ್ನೋದು ನನಗೆ ಗೊತ್ತಿದ್ದರಿಂದ ಆ ಮೆಸೇಜನ್ನು ತೆರೆಯಲಿಲ್ಲ. ಎರಡ್ಮೂರು ದಿನದ ನಂತರ ಅವರು ಫೋನ್ ಮಾಡಿ ನನ್ನ ಫೇಸ್ಬುಕ್ ಅಕೌಂಟ್ ಹ್ಯಾಕ್ ಆಗಿದೆ, ಅದರಿಂದ ಯಾವ ಮೆಸೇಜ್ ಬಂದರೂ ಉತ್ತರಿಸಬೇಡಿ ಅಂತಂದ್ರು. ಅವರಿಗೂ ಇದೇ ತರದ ಮೆಸೇಜ್ ಬಂದು ಅದನ್ನ ಓಪನ್ ಮಾಡಿದ್ರಂತೆ. ಅದಾಗಿ ಕೆಲವೇ ದಿನಗಳಲ್ಲಿ ಮತ್ತೆ ಎರಡ್ಮೂರು ಗೆಳೆಯರಿಂದ ಇದೇ ತರದ ಮೆಸೇಜ್! ಕೆಲದಿನಗಳಲ್ಲೇ ಅವರೂ ತಮ್ಮ ಅಕೌಂಟ್ ಹ್ಯಾಕಾಗಿದೆ ಅಂತ ಫೇಸ್ಬುಕ್ಕಲ್ಲೇ ಹಾಕಿದ್ರು. ಇದ್ಯಾಕೆ ಹೀಗಾಗತ್ತೆ ಅಂತೀರಾ ? ನಾವು ಅಂತರ್ಜಾಲದಲ್ಲಿರೋ ಎಲ್ಲದನ್ನೂ ಕಣ್ಣು ಮುಚ್ಚಿಕೊಂಡು ನಂಬೋದು ಅಥವಾ ಕಂಪ್ಯೂಟರ್/ಡಿಜಿಟಲ್ ಅನಕ್ಷರಸ್ಥರಾಗಿರೋದು ! ಏನಿದು ಕಂಪ್ಯೂಟರ್/ಡಿಜಿಟಲ್ ಅನಕ್ಷರತೆ ಅಂತೀರಾ ? ಅಂದ ಹಾಗೆ ಕಂಪ್ಯೂಟರ್ ಅನಕ್ಷರತೆಗೂ ಡಿಜಿಟಲ್ ಅನಕ್ಷರತೆಗೂ ಸುಮಾರು ವ್ಯತ್ಯಾಸಗಳಿವೆ. ಈ ಕಂಪ್ಯೂಟರ್ ಅನಕ್ಷರತೆ ಅಂದರೆ ಏನೆಂಬುದನ್ನು ನೋಡೋಣ

 ಇಂದು  ಕಂಪ್ಯೂಟರ್ ಅಥವಾ ಗಣಕಯಂತ್ರ ಅನ್ನೋದು ನಮ್ಮೆಲ್ಲರ ದೈನಂದಿನ ಬದುಕಿನ, ಕೆಲಸದ ಭಾಗವೇ ಆಗೋಗಿದೆ. ರೈಲ್ವೇ ಸ್ಟೇಷನ್ನಿನ ಬುಕಿಂಗ್ ಕೌಂಟರಿನಿಂದ , ವರ್ಕ್ ಫ್ರಂ ಹೋಂ ಎಂದು ಮನೆಯಲ್ಲೇ ಕೆಲಸ ಮಾಡುತ್ತಿರುವ ಐಟಿ ಉದ್ಯೋಗಿಗಳ ವರೆಗೆ, ಪತ್ರಿಕೆಗಳ ಡಿಟಿಪಿ ಡಿಸೈನಿಂಗ್ ಕೆಲಸಗಳಿಂದ ಮದುವೆ ಪತ್ರಿಕೆಗಳ ಡಿಸೈನಿಂಗ್ವರೆಗೆ, ಸಮೀಪದ ಸಣ್ಣ ಮಾಲಿನ ಬಿಲ್ಲಿಂಗ್ ಕೌಂಟರಿನಿಂದ, ಕ್ಷಣದಲ್ಲೇ ಕೋಟಿಗಟ್ಟಲೇ ಕೈ ಬದಲಾಗೋ ಶೇರು ಮಾರುಕಟ್ಟೆಯ ವ್ಯವಹಾರಗಳವರೆಗೆ  ಕಂಪ್ಯೂಟರ್ಗಳ ಅಗತ್ಯತೆಯಿದೆ. ಇದೆಲ್ಲಾ ದೂರದ ವಿಷಯ ಅಂದ್ರಾ ?  ನಮ್ಮ ಮನೆಗೆ ಬಂದು ಕರೆಂಟ್ ಮೀಟರಿನ ಅಂಕಿಗಳನ್ನು ನೋಡಿ ಕೊಡೋ ಬಿಲ್ಲಿನ ಹಿಂದೂ ಕಂಪ್ಯೂಟರ್ ಇದೆ .    ಹಾಗಾಗಿ ಈ ಕಂಪ್ಯೂಟರುಗಳ ಬಗ್ಗೆ ನಾವು ಎಷ್ಟು ತಿಳಿದರೂ ಅಷ್ಟು ಒಳ್ಳೆಯದು. 

ಏನಿದು ಕಂಪ್ಯೂಟರ್ ಸಾಕ್ಷರತೆ ? 

ಕಂಪ್ಯೂಟರನ್ನು ಮತ್ತು ಸಂಬಂಧಿತ ತಂತ್ರಜ್ಞಾನಗಳ ಬಳಕೆಯಲ್ಲಿ ಪರಿಣತಿ ಹೊಂದುವುದನ್ನೇ ಕಂಪ್ಯೂಟರ್ ಸಾಕ್ಷರತೆ ಎನ್ನುತ್ತಾರೆ. ಇದು ಕಂಪ್ಯೂಟರನ್ನು ಸರಿಯಾಗಿ ಆನ್ , ಆಫ್ ಮಾಡೋದು ಹೇಗೆ ಎಂಬ ಮೂಲಭೂತ ಮಟ್ಟದ ತಿಳುವಳಿಕೆಯಾಗಿರಬಹುದು. ಕಂಪ್ಯೂಟರಿನಲ್ಲಿರುವ ಮೈಕ್ರೋಸಾಫ್ಟ್ ವರ್ಡ್, ಎಕ್ಸೆಲ್, ಪವರ್ ಪಾಯಿಂಟ್, ನುಡಿ, ಬರಹ ಮುಂತಾದ ತಂತ್ರಾಂಶಗಳ ಬಳಕೆಯ ನಂತರ ಮಟ್ಟವಿರಬಹುದು. ಕಂಪ್ಯೂಟರ್ ನಮಗೆ ಬೇಕಾದ ಕೆಲಸ ಮಾಡುವಂತೆ  ಕೋಡ್ ಮಾಡೋದು, ಕಂಪ್ಯೂಟರ್ ಹಾಳಾದಾಗ ಅದನ್ನು ರಿಪೇರಿ ಮಾಡುವುದು ಮುಂತಾದ ಉನ್ನತ ಮಟ್ಟದ ಕೌಶಲ್ಯವೂ ಇರಬಹುದು. ಇವೆಲ್ಲವೂ ಕಂಪ್ಯೂಟರ್ ಸಾಕ್ಷರತೆಯೇ. ಕಂಪ್ಯೂಟರಿಗೆ ಸಂಬಂಧಿಸಿದ ಯಾವುದೋ ಸಮಸ್ಯೆಯಿದೆ ಎಂಬ ಮಾತುಕತೆ ನಡೆಯುತ್ತಿದ್ದಾಗ ನಿಮಗೆ ಅದನ್ನು ಸರಿ ಮಾಡಲು ಬರದಿದ್ದರೂ ಅದೇನು ಎಂದು ಅರ್ಥ ಮಾಡಿಕೊಳ್ಳಲಾದರೂ ಕಂಪ್ಯೂಟರ್ ಸಾಕ್ಷರತೆ ಅಗತ್ಯ.  ಉದಾಹರಣೆಗೆ ನೀವು ಸರ್ಕಾರಿ ಕಛೇರಿಗೋ ಬ್ಯಾಂಕಿಗೋ ಹೋದಾಗ ಅಲ್ಲಿ ಸರ್ವರ್ ಡೌನಾಗಿದೆ ಅಂದ್ರೆ ಏನಾಗಿದೆ ಅಂತ ನಿಮಗೆ ಅರ್ಥವಾಗಬೇಕು. ಇಲ್ಲಾಂದ್ರೆ ಈ ದರಿದ್ರ ಬ್ಯಾಂಕು, ಸರ್ಕಾರದವ್ರು ನಮ್ಮನ್ನ ಇಡೀ ದಿನ ಅಲೆಸೂ, ಕೆಲಸ ಮಾಡಿಕೊಡಲಿಲ್ಲ ಅಂತ ಶಾಪ ಹಾಕುತ್ತಾ ಕೂರಬೇಕಾಗುತ್ತೆ. 

ಕಂಪ್ಯೂಟರ್ ಸಾಕ್ಷರತೆಗೊಂದು ದಿನ:

ಡಿಸೆಂಬರ್ ೨ನೇ ತಾರೀಖಿನಂದು ಕಂಪ್ಯೂಟರ್ ಸಾಕ್ಷರತಾ ದಿನ  ಎಂಬ ದಿನ ಹೆಚ್ಚಿನ ಸಂಭ್ರಮವಿಲ್ಲದೇ, ಸುದ್ದಿಯಿಲ್ಲದೇ ಆಚರಿಸಲ್ಪಟ್ಟಿತ್ತು !  

ಕಂಪ್ಯೂಟರ್ ಸಾಕ್ಷರತೆಗೂ ಒಂದು ದಿನ ಎಂದು ಬಂದಿದ್ದು ಹೇಗೆ ? 

Computer Literacy(ಕಂಪ್ಯೂಟರ್ ಸಾಕ್ಷರತೆ) ಎಂಬ ಪದವನ್ನು ಆಡ್ರ್ಯೂ ಮೊಲ್ನಾರ್ ಎಂಬ ಅಮೇರಿಕಾದ ಗಣಕಶಾಸ್ತ್ರಜ್ಞ 1978ರಲ್ಲಿ ಹುಟ್ಟುಹಾಕಿದರು. ಅವರು ಅಮೇರಿಕಾದ ರಾಷ್ಟ್ರೀಯ ವಿಜ್ಞಾನ ಪರಿಷತ್ತಿನ ನಿರ್ದೇಶಕರಾಗಿದ್ದರು. ತದನಂತರದ ಹಲವು ಕಂಪ್ಯೂಟರ್ ವಿಜ್ಞಾನಕ್ಕೆ ಸಂಬಂಧಿಸಿದ ಲೇಖನಗಳಲ್ಲಿ ಮತ್ತು ಪಠ್ಯಗಳಲ್ಲಿ ಈ ಪದ ಬಳಕೆಯಾಗುತ್ತಾ ಹೋಯಿತು. ಭಾರತದಲ್ಲಿ ೧೯೫೫ರಲ್ಲೇ  ಕೊಲ್ಕತ್ತಾದ ರಾಷ್ಟ್ರೀಯ ಅಂಕಿಅಂಶ ಸಂಸ್ಥೆಯಲ್ಲಿ ಮೊದಲ ಕಂಪ್ಯೂಟರ್ ಬಂದಿದ್ದರೂ ಅದು ಜನಸಾಮಾನ್ಯರ ಅಥವಾ ಸಣ್ಣ ಸಣ್ಣ ಕಂಪೆನಿಗಳ ಮಟ್ಟಿಗೆ ಬಳಕೆಯಲ್ಲಿರಲಿಲ್ಲ. ೨೦೦೦ರ ಸುಮಾರಿಗೂ ಜನ ಸಾಮಾನ್ಯರಲ್ಲಿ ಕಂಪ್ಯೂಟರ್ ಬಳಕೆಯ ಬಗ್ಗೆಯಿದ್ದ ಮಾಹಿತಿ ಮತ್ತು ಜ್ಞಾನ ಕಮ್ಮಿಯೇ. ಹಾಗಾಗಿ ೨೦೦೧ರಲ್ಲಿ ಕಂಪ್ಯೂಟರ್ ಶಿಕ್ಷಣ ಕೊಡುವ NIIT ಸಂಸ್ಥೆ ಕಂಪ್ಯೂಟರ್ ಸಾಕ್ಷರತಾ ದಿನವನ್ನು ಪ್ರತೀವರ್ಷ ಡಿಸೆಂಬರ್ ೨ರಂದು ಆಚರಿಸಲು ಪ್ರಾರಂಭಿಸಿತು.  

ಈಗಲೂ ನಮಗೆ ಕಂಪ್ಯೂಟರ್ ಸಾಕ್ಷರತೆಯ ಅವಶ್ಯಕತೆ ಇದೆಯೇ ? 

ಅನೇಕ ವರದಿಗಳ ಪ್ರಕಾರ ಭಾರತದಲ್ಲಿನ ಕಂಪ್ಯೂಟರ್ ಸಾಕ್ಷರತೆಯ ಪ್ರಮಾಣ ಶೇ ೩೮ಕ್ಕಿಂತ ಕೆಳಗಿದೆ. ಲಕ್ಷದ್ವೀಪ, ಚಂಡೀಗಡ, ಗೋವಾ ರಾಜ್ಯಗಳಲ್ಲಿ ಮಾತ್ರ ಈ ಮಟ್ಟ ಸಮಾಧಾನಕರವಾಗಿದೆ.  ಶೇಕಡಾ ನೂರರಷ್ಟು ಸಾಕ್ಷರತೆಯಿರುವ ಕೇರಳ ರಾಜ್ಯವನ್ನೂ ಸೇರಿಸಿ ಭಾರತದ ಬೇರೆಲ್ಲಾ ರಾಜ್ಯಗಳೂ ಈ ವಿಷಯದಲ್ಲಿ ಸಾಕಷ್ಟು ಹಿಂದುಳಿದಿವೆ ಎಂದು ವರದಿಗಳು ತಿಳಿಸುತ್ತವೆ. 

ನಾವು ಕಂಪ್ಯೂಟರ್ ಸಾಕ್ಷರರಾಗೋದು ಹೇಗೆ ? 

ಕಂಪ್ಯೂಟರ್ ಸಾಕ್ಷರರಾಗಲು ಯಾವುದೋ ಕಂಪ್ಯೂಟರ್ ಸೆಂಟರಿಗೆ ಹೋಗಿ ದುಡ್ಡು ಕೊಟ್ಟು ಕೋರ್ಸಿಗೆ ಸೇರಬೇಕೆಂದಿಲ್ಲ. ಇಂತಿಷ್ಟು ವಯಸ್ಸಾದ ಮೇಲೆ ಇದನ್ನು ಕಲಿಯೋದು ಅಸಾಧ್ಯವೆಂದೂ ಇಲ್ಲ. ಎಲ್ಲರ ಬಳಿ ಮೊಬೈಲ್ ಇದ್ದೇ ಇದೆ. ಮೊಬೈಲಿನಲ್ಲಿ ಯೂಟ್ಯೂಬು, ಫೇಸ್ಬುಕ್ಕುಗಳನ್ನು ಬಳಸೋದೂ ಗೊತ್ತಿದೆ. ಇವುಗಳಲ್ಲಿ ಕಂಪ್ಯೂಟರಿನ ಬಗ್ಗೆ, ಇದರಲ್ಲಿನ ತಂತ್ರಾಂಶಗಳ ಬಗ್ಗೆ ಸರಳಾತಿ ಸರಳವಾಗಿ ತಿಳಿಸೋ ಹಲವು ಚಾನಲ್ಲುಗಳಿವೆ. 

ಮೊಬೈಲಿಲ್ಲದಿದ್ದರೆ ಹೇಗೆ ಕಲಿಯೋದು ? 

ಈಗಿನ ಶಾಲಾ ಕಾಲೇಜುಗಳ ಪಠ್ಯದಲ್ಲಿ ಕಂಪ್ಯೂಟರ್ನ ಬಗ್ಗೆ ಸರಳವಾಗಿ ಕಲಿಸಲಾಗುತ್ತಿದೆ. ನಿಮ್ಮ ಮಕ್ಕಳು ಅಥವಾ ನೆರೆಹೊರೆಯ ಮಕ್ಕಳು ಈ ಬಗ್ಗೆ ಓದುತ್ತಿದ್ದರೆ ಅವರ ಪುಸ್ತಕ ತೆಗೆದುಕೊಂಡು ಓದಿ ನೋಡಿ. ಈ ಪುಸ್ತಕಗಳಲ್ಲಿ ಅತ್ಯಂತ ಸರಳವಾಗಿ , ಮಕ್ಕಳಿಗೂ ಅರ್ಥವಾಗುವಂತೆ ಕಂಪ್ಯೂಟರಿನ ಬಗ್ಗೆ, ಅದರಲ್ಲಿನ ತಂತ್ರಾಂಶಗಳ ಬಗ್ಗೆ ಕೊಟ್ಟಿರುತ್ತಾರೆ. ಅದು ಅರ್ಥವಾಗದಿದ್ದರೆ ಅವರಿಗೇ ಕೇಳಿ. ಅವರೇ ಅದನ್ನು ಪಠ್ಯದಲ್ಲಿರೋದಕ್ಕಿಂತ ಸರಳವಾಗಿ ಹೇಳಿಕೊಟ್ಟಾರು. ಯಾಕೆಂದರೆ ತಂತ್ರಜ್ಞಾನ ಅನ್ನೋದು ವಯಸ್ಕರಿಗಿಂತ ಮಕ್ಕಳನ್ನ ಬೇಗ ಆಕರ್ಷಿಸುತ್ತೆ.  ಮಕ್ಕಳ ಬಳಿ ಕಲಿಯೋದ್ರಲ್ಲಿ  ತಪ್ಪೇನಿದೆ ? ಹಾಗಾಗಿ ಈ ನಿಟ್ಟಿನಲ್ಲಿ ಮುನ್ನಡಿಯಿಡೋಣ ಮತ್ತು ನಾವೆಲ್ಲರೂ ಕಂಪ್ಯೂಟರ್ ಸಾಕ್ಷರರಾಗೋಣ.

ನಾನೋದಿದ ಪುಸ್ತಕ ಹಿರಿಯೂರಿನ ಸರಹದ್ದು, ಸ್ವರೂಪ ಮತ್ತು ನಿಗೂಢ ಮನುಷ್ಯರು

Huliyoorina sarahaddu

ಮಲೆನಾಡು ಹೆಸರಿಗೆ ಮಾತ್ರ ಮಲೆನಾಡಾಗಿದೆಯೀಗ, ಮಳೆಯಿಲ್ಲ ಎಂತದೂ ಇಲ್ಲ, ಊರಲ್ಲಿ ಬೆಚ್ಚಗಿನ ಕಾಫಿ, ಕಂಬಳಿ, ಪಗಡೆಯಾಟಗಳೆಲ್ಲ ಭೂತದ ಕನಸಷ್ಟೆ ಎನಿಸುತ್ತಿತ್ತು. ಊರೆಲ್ಲಾ ಮಕ್ಕಳಿಲ್ಲದೇ ವೃದ್ದಾಶ್ರಮಗಳಾಗಿದೆ ಎಂಬ ಮಲೆನಾಡು, ಕಟ್ಟಿದ ಭವ್ಯ ಬಂಗಲೆಗಳು ಬೀಗ ಕಂಡು ಕಸ ಕುಡಿಸುವವರೂ ಇಲ್ಲವೆಂಬ ಕೇರಳದ ನಿಟ್ಟುಸಿರಿಗೆ ಉತ್ತರವೆಂದೋ ಎನಿಸುತ್ತಿತ್ತು. ದಟ್ಟ ಕಾನನದ ಮಧ್ಯೆ ನೆಲೆ ನಿಂತ ಜೀವಗಳು ಅದೆಷ್ಟೋ ದಶಕಗಳ ಒಂಟಿತನಕ್ಕೆ ಸಾಕ್ಷಿಯಾಗಿ, ಬೀಳುತ್ತೇನೆಂದರೂ ಬಾರದ ಮಳೆಗೆ ಮರುಗುತ್ತಾ ಕುಳಿತ ಮಣ್ಣು ಗೋಡೆಗಳಂತಾಗಿವೆಯಾ ಎಂದೂ ಎನಿಸುತ್ತಿತ್ತು. ಇವೆಲ್ಲಾ ಪ್ರಶ್ಯೆಗಳಿಗೆ ಉತ್ತರವೆಂಬಂತೆ ಬಂದ ಕರೋನಾ ಪಟ್ಟಣಗಳಿಂದ ಮತ್ತೀ ಹಳ್ಳಿಗಳಿಗೆ ಜನರ ಮರಳಿಸುತ್ತಿದೆಯಾ, ಕಾರಂತರ ಮರಳಿ ಮಣ್ಣಿಗೆ ಎನ್ನುವಂತೆ ಎಂದೂ ಅನಿಸುತ್ತಿತ್ತು. ಆ ಸಮಯದಲ್ಲಿ ಕೈಗೆ ಸಿಕ್ಕಿದ್ದು ತೇಜಸ್ವಿಯವರ ಹಿರಿಯೂರಿನ ಸರಹದ್ದು ಎಂಬ ಆರು ಕತೆಗಳ ಸಂಗ್ರಹ ಮತ್ತು ಸ್ವರೂಪ, ನಿಗೂಢ ಮನುಷ್ಯರು ಎಂಬ ಕಿರು ಕಾದಂಬರಿಗಳು.

ತೇಜಸ್ವಿಯವರ ಬರಹಗಳು ಕಾಡೋದು ಅವರ ಬರಹಗಳಲ್ಲಿ ಮೇಳವಿಸಿರೋ ಮಲೆನಾಡ ಚಿತ್ರಣದಿಂದಿರಬಹುದೇನೋ. ಬೆಂಗಳೂರಿನಲ್ಲಿ ಕೆಲವು ಘಂಟೆಗಳ ಕಾಲ ಮಳೆಯಾದರೇ ರಸ್ತೆಗಳೆಲ್ಲಾ ಉಕ್ಕಿ ಹರಿದು ಮಿನಿ ಪ್ರವಾಹದ ಪರಿಸ್ಥಿತಿ. ಅಂತಹ ಸ್ಥಿತಿಯಿಂದ ಬಂದವರಿಗೆ ಮಳೆಕಾಡಲ್ಲಿ ಎರಡ್ಮೂರು ದಿನ ಬಿಡದೇ ಮಳೆ ಹೊಡೆಯುತ್ತೆ ಎಂಬುದನ್ನು  ಊಹಿಸಲೂ ಸಾಧ್ಯವಾಗದೇನೋ. ಹೊಟ್ಟೆಪಾಡಿಗಾಗಿ ಅಂತದ್ದೇ ಬೆಂದಕಾಳೂರಲ್ಲಿದ್ದ ಜನರೀಗ ಕರೋನಾಕ್ಕೆ ಹೆದರಿ ಮತ್ತೆ ಊರುಗಳತ್ತ ಸಾಗಿದ್ದಾರಾ ಅನಿಸುವ ಹೊತ್ತಿಗೆ ಮಲೆನಾಡಲ್ಲಿ ಮಳೆಯ ಆರ್ಭಟ ಶುರು. ಮಳೆಗಾಲವಾದರೂ ಶುರುವಾಗದ ಮಳೆ, ತುಂಬದ ಬಾವಿಗಳೆಲ್ಲಾ ತುಳುಕಾಡುವಷ್ಟು ಮಳೆ ಮೂರ್ನಾಲ್ಕು ದಿನಗಳಿಂದ ಹೊಡೀತಾ ಇತ್ತು. ಭಾರೀ ಮಳೆಯ ನಂತರ ಸ್ವಲ್ಪ ಜುಮುರು, ಅದರ ನಂತರ ಇಬ್ಬನಿಯಂತೆ ಮಳೆ. ಮತ್ತೆ ಇದರದೇ ಆವರ್ತನವಿತ್ತೇ ಹೊರತು ಬಿಸಿಲಿರಲಿಲ್ಲ! ಮೋಡಗಳ ಮರೆಯಲ್ಲೇ ಲಾಕಾಗಿದ್ದ ಸೂರ್ಯನ ದರ್ಶನವಿಲ್ಲದೇ, ಬಟ್ಟೆಗಳೊಣಗದೇ ದಿನ ಮೂರಾಗಿತ್ತು.ಇಂತದೇ ಮಳೆಕಾಡ ನಮ್ಮೂರ ಸಮೀಪದ ಊರು ಚಂದ್ರಗುತ್ತಿ. ಅದು ತೇಜಸ್ವಿಯವರ ನಿಗೂಢ ಮನುಷ್ಯರು ಕಾದಂಬರಿಯ ಎಳೆ ಶುರುವೂ ಹೌದು.

ಚಂದ್ರಗುತ್ತಿಯ ಸಮೀಪದ ನುಗುಬೀಡುವಿನಿಂದ ದುಗ್ಗು ಮಾರ್ಗವಾಗಿ ನವಿಲುಗುಂದಕ್ಕೆ ಹೊರಟಿರೋ ೭೦ರ ದಶಕದ ಕಾರೊಡೆಯ ಜಗನ್ನಾಥ. ಅವನ ಜೊತೆಗೂಡೂ ರೆವಿನ್ಯೂ ಇನ್ಸಪೆಕ್ಟರ್ ರಂಗಪ್ಪನಿಗೆ ಪರಿಚಯವಾಗೋದು ಸಿಐಡಿ ಗೋಪಾಲಯ್ಯ. ಅನುಭವಗಳ ಅರಸಿ ಹೊರಡೋ ಇವರಿಗೆ ಸಿಗೋ ಕ್ರಾಂಪ, ಮರಸರ, ಉಕ್ಕಿ ಹರಿಯ ಎಣ್ಣೆಹೊಳೆ, ಉರುಳೋ ಗಿರಿ , ಏಲಕ್ಕಿ ತೋಟ, ಶಾರಿ ಹೀಗೆ ಒಬ್ಬೊಬ್ಬರದ್ದೂ ಒಂದೊಂದು ಕಥೆ, ವಿಚಿತ್ರ ವ್ಯಥೆ . ಪ್ರತೀ ಪಾತ್ರದ ಮಾತು ಕೇಳ್ತಿದ್ದರೆ ಆ ಪಾತ್ರವೇ ನಾವೇನೋ ಎನ್ನುವಂತಹ ಚಿತ್ರಣ. ಕೊಪ್ಪ, ಜಯಪುರ ಸಮೀಪದ ಕಾಫಿ ತೋಟಗಳಲ್ಲಿ ಅಲೆದಿದ್ದರೆ, ಮೇರಿತಿ ಬೆಟ್ಟದಂತಹ ಸ್ಥಳಗಳಿಗೆ ಕಿಲೋಮೀಟರುಗಟ್ಟಲೇ ಎಸ್ಟೇಟುಗಳ ಮಧ್ಯೆ ಸಾಗಿದ್ದರೆ ಇಲ್ಲಿ ಬರೋ ಹಾದಿಯ, ಸಿಕ್ಕಿ ಹಾಕಿಕೊಳ್ಳೋ ಪರಿಸ್ಥಿತಿಗಳ, ಏಲಕ್ಕಿ ತೋಟಗಳ ಕಲ್ಪನೆ ದಕ್ಕಬಹುದೇನೋ.  ಇದೇ ಹಾದಿಯ ಕೊನೆ ಎನ್ನುವಂತ ಸ್ಥಳದತ್ತ ಸಾಗುತ್ತಿದ್ದೀರಿ ಎಂದುಕೊಳ್ಳಿ. ನೀವು ಒಂದು ಸ್ಥಳವನ್ನು ದಾಟಿದ ನಂತರ ಮರಳಿ ಬರಲಾರದಂತೆ ಸಿಕ್ಕಿ ಹಾಕಿಕೊಳ್ಳುತ್ತೀರಿ. ಅಲ್ಲಿ ಉಳಿಯಲು ಆಗುತ್ತಿಲ್ಲ. ಹಿಂಬರಲು ಆಗುತ್ತಿಲ್ಲ. ಹೇಗಾದರೂ ಮುಂದೆ ಸಾಗೋಣವೆಂದು ಅದೆಷ್ಟೋ ದಿನಗಳ ಪ್ರಯತ್ನದ ನಂತರ ಹೊರಟರೆ ಅತ್ತಲಿಂದಲೂ ಇತ್ತ ಬರುತ್ತಿರೋ ಜನ ! ಒಂದೆಡೆ ಪ್ರಪಾತ, ಇನ್ನೊಂದೆಡೆ ನುಂಗಲು ಬರುತ್ತಿರುವ ಹೆಬ್ಬಾವು, ಇವೆರಡರ ನಡುವೆ ಸಿಲುಕಿದಂತಹ ಪರಿಸ್ಥಿತಿ. ಗೊತ್ತು ಗುರಿಯಿಲ್ಲದ ಊರಲ್ಲಿ ನಂಬೋದ್ಯಾರನ್ನ, ಬಿಡೋದ್ಯಾರನ್ನ ? ಎದುರಿಗಿದ್ದವ ಹೇಳಿದ್ದರಲ್ಲಿ ಸತ್ಯವೆಷ್ಟು, ಸುಳ್ಳೆಷ್ಟು ? ಕೊನೆಗಾಣದ ಹಾದಿಯಲ್ಲಿ ಗೊತ್ತಿಲ್ಲದ ಜೀವದೊಂದಿಗೆ ಸಾಗಿದರೆ ಜೀವ ಉಳಿಯುತ್ತಾ ಎಂಬ ಅಸಂಖ್ಯ ಪ್ರಶ್ನೆಗಳನ್ನು, ಕುತೂಹಲವನ್ನು ಆಗಾಗ ಕೆರಳಿಸೋ ಈ ಕಾದಂಬರಿ, ಕೌತುಕ, ಭಯದ ನಡುವೆಯೇ ಒಂದು ಕಾಲದ ಮಳೆಕಾಡ ಚಿತ್ರಣವನ್ನು ಕಟ್ಟಿಕೊಡುತ್ತದೆ. ಎಕ್ಸ್ ಪ್ಲೋರಿಂಗ್ ದ ವೈಲ್ಡ್, ಶರಾವತಿ ಎಕ್ಸ್ ಪ್ಲೋರೆಷನ್ ಅಂತೆಲ್ಲಾ ಹೆಸರಿಟ್ಟು ಕಾಡು ಕಡಿದು ಹೋಂ ಸ್ಟೇ ಮಾಡಿದೋರು, ಕಾಡಲ್ಲಿ ನಾವು ಮಾಡಿದ್ದ ಕೇಳೋರು ಯಾರೂ ಇಲ್ಲ ಎಂದು ಬಾಟಲಿ ಒಡೆಯೋರು, ಕಸ ಹರಡೋರು, ಕಾಡ ಮಧ್ಯ ಟೆಂಟ್ ಹಾಕಿ, ಜಲಪಾತಗಳಲ್ಲಿ ಮಿಂದೇಳೋ ದಿನಗಳನ್ನೇ ಪ್ರಕೃತಿಯೊಡನೆಯ ಜೀವನ ಎನ್ನುವವರು ನಿಜವಾದ ಅರಣ್ಯವಾಸ ಎಷ್ಟು ರೋಚಕ ಮತ್ತು ಭಯಾನಕ ಎಂಬ ಕಲ್ಪನೆಯಾದರೂ ಹೊಂದಲು ಓದಬೇಕಾದ ಪುಸ್ತಕವಿದು.

ಓಟಿಟಿ ಮತ್ತು ಮಾಲ್ಗುಡಿ ಡೇಸ್

ಒಂದು ಮೈಸೂರ್ ಪಾಕ್ ಕೊಡಿ.
ತಗೋಳಿ
ಅರೇ, ಇದೇನಿದು ? ನಾ ಕೇಳಿದ್ದು ಮೈಸೂರ್ ಪಾಕು
ಹೂಂ. ಇದೇ ಮೈಸೂರ್ ಪಾಕು
ಅರೆ, ಇದು ಪಾನಿಪೂರಿ ರೀ, ಮೈಸೂರ್ ಪಾಕ್ ಕೇಳಿದ್ರೆ ಪಾನಿಪೂರಿ ಕೊಡ್ತೀರಲ್ರೀ?
ಇದು ಮೈಸೂರು, ನಾ ಇದ್ನೇ ಮೈಸೂರ್ ಪಾಕ್ ಅಂತ ಕರೆಯೋದು !!
ಏನಪ್ಪಾ ಇದು ಅಂತ ಶಾಕಾದ್ರಾ ? ಮಾಲ್ಗುಡಿ ಡೇಸ್ ಅಂತ ಹೆಸರು ನೋಡಿ ಮೊದಲು ಶಂಕರ್ ನಾಗ್ ಅವ್ರ ಚಿತ್ರ ನೋಡಿ ಆ ಆರ್. ಕೆ. ನಾರಾಯಣನ್ ಅವ್ರ ಕತೆಯಾದಾರಿತ ಚಿತ್ರವನ್ನೇ ಮತ್ತೆ ಹೊಸದಾಗಿ ಸೃಷ್ಠಿಸುತ್ತಿದ್ದಾರ ಅಂತ ನಿರೀಕ್ಷೆಯಿಟ್ಟುಕೊಂಡು ನೋಡಿದ ನನಗೂ ಆದ ಅನುಭವ ಇದೇ ತರದ್ದು !

ಮುಂಚೇನೆ ಬರೆದ ಹಾಗೆ ಕನ್ನಡ ಚಿತ್ರಗಳಿಗೆ ಚಿತ್ರಮಂದಿರಗಳು ಸಿಗದೇ ಒದ್ದಾಡುತ್ತಿದ್ದ ಕಾಲದಲ್ಲಿ ವರದಂತೆ ಕಂಡಿದ್ದು ಓ.ಟಿ.ಟಿ(ಓವರ್ ದ ಟಾಪ್) ತಾಣಗಳು. ಅಂದರೆ ಈ ವಿಪರೀತ ರೇಟು ಕೇಳೋ ಕೇಬಲ್ಲು, ಚಿತ್ರಕ್ಕಿಂತ ಅಡ್ಬಟೈಸ್ಮೆಂಟುಗಳನ್ನೇ ಜಾಸ್ತಿ ತೋರಿಸೋ ಟೀವಿ ಚಾನೆಲ್ಲುಗಳು, ಅವುಗಳನ್ನು ಬಿತ್ತರಿಸೋ ಉಪಗ್ರಹಗಳ ಗೊಡವೆಯೇ ಬೇಡ ಎಂದು ಅಂತರ್ಜಾಲದ ಮೂಲಕ ನೇರ ವೀಕ್ಷಕರ ಮನೆ ಬಾಗಿಲಿಗೆ ಚಿತ್ರಗಳನ್ನು ತಲುಪಿಸುತ್ತಿರೋ ಅಮೇಜಾನ್ ಪ್ರೈಂ, ಹಾಟ್ ಸ್ಟಾರ್, ನೆಟ್ ಫ್ಲಿಕ್ಸ್ , ವೂಟ್ ನಂತಹ ವಾಹಿನಿಗಳೇ ಓ.ಟಿ.ಟಿ ವಾಹಿನಿಗಳು. ಈಗ ಫೇಸ್ಬುಕ್ಕಲ್ಲೂ ಸುಮಾರಷ್ಟು ಧಾರಾವಾಹಿಗಳ ಪೂರ್ಣ ಎಪಿಸೋಡುಗಳನ್ನ ಆ ವಾಹಿನಿಗಳೇ ಹರಿಬಿಡುತ್ತಿರೋದ್ರಿಂದ ಅದೂ ಒಂತರ ಓ.ಟಿ.ಟಿ ಆಗ್ತಾ ಇದ್ಯಾ ಅನಿಸುತ್ತೆ. ಕರೋನಾ ಕರಾಮತ್ತಿಗೆ ಚಿತ್ರಮಂದಿರಗಳನ್ನ ಬಾಗಿಲು ಹಾಕಬೇಕಾಗಿ ಬಂದು, ಚಿತ್ರಗಳ ಧಾರಾವಾಹಿಗಳ ಚಿತ್ರೀಕರಣ ಅನಿರ್ದಿಷ್ಟಾವಧಿಯವರೆಗೆ ನಿಲ್ಲಿಸಿರೋದ್ರಿಂದ ಇನ್ನು ೧೦-೧೨ ದಿನಕ್ಕಾಗುವಷ್ಟು ಸರಕು ಮಾತ್ರ ನಮ್ಮ ಬಳಿ ಇದೆ ಎಂದು ಪ್ರಮುಖ ಧಾರಾವಾಹಿಗಳ ನಿರ್ದೇಶಕರು ಮಾರ್ಚ್ ೨೩ರಂದು ಹೇಳಿಕೆ ಕೊಟ್ಟಿದ್ದರು. ಈ ಧಾರಾವಾಹಿಗಳು ಇರಲಿ ಬಿಡಲಿ, ಒಳ್ಳೆಯ ಚಿತ್ರಗಳಿಗೆಂತೂ ಎಂದೂ ಇರುವ ನೋಡುಗ ಬಳಗಕ್ಕೆ ಈ ಕರೋನಾದ ಲಾಕ್ಡೌನು, ವರ್ಕ್ ಫ್ರಂ ಹೋಮು, ಮಧ್ಯ ಮಧ್ಯ ಬರೋ ರಜಾ ದಿನಗಳು ಹೇಳಿ ಮಾಡಿಸಿದಂತಿವೆ. ಹೊರಗೆಂತೂ ಹೋಗೋ ಹಾಗಿಲ್ಲ. ಇನ್ನೇನು ಮಾಡೋದು, ಚಿತ್ರ ನೊಡೋದು ಅಷ್ಟೆ! .

ಮತ್ತೆ ಕತೆಗೆ ಬರೋದಾದ್ರೆ ಇದು ಮಾಲ್ಗುಡಿ ಅನ್ನೋ ಕಾಲ್ಪನಿಕ ಪಟ್ಟಣದ ಸುತ್ತ ನಡೆಯೋ ಕತೆ. ಕಥಾನಾಯಕ ಲಕ್ಶ್ಮೀನಾರಾಯಣ ಮತ್ತವನ ಪ್ರಿಯತಮೆ ಲಿನೇಟಾರ ಪ್ರೇಮಕತೆ ಶುರುವಾಗೋದು ಎಸ್ಸೆಸ್ಸೆಲ್ಸಿಯಲ್ಲಾದರೂ ಮುಗಿಯೋದು ಇಬ್ಬರ ವೃದ್ಧಾಪ್ಯದಲ್ಲಿ. ಅಂದರೆ ಇವರು ಲವ್ ಮಾಡಿ ಮದುವೆಯಾದರಾ ? ಅಂದ್ರೆ ಇಲ್ಲ. ಮದುವೆಯಾಗದೇ ಉಳಿದರಾ ಅಂದರೆ ಅದೂ ಇಲ್ಲ ! ಹೆಸರಾಂತ ಕತೆಗಾರನಾಗೋ ಲಕ್ಶ್ಮೀನಾರಾಯಣ ಮಾಲ್ಗುಡಿ ತನ್ನ ಕತೆಗಳು ಇಂದಿನ ಪೀಳಿಗೆಗೆ ರುಚಿಸುತ್ತಿಲ್ಲ ಎಂದರಿತು ಬರೆಯುವುದನ್ನೇ ನಿಲ್ಲಿಸುವ ತೀರ್ಮಾನದಲ್ಲಿರುವ ಅವರ ಜೀವನದಲ್ಲಿ ಹಲವು ಅನಿರೀಕ್ಷಿತ ಘಟನೆಗಳು ಜರುಗುತ್ತವೆ. ಅವೇ ಬೆಂದಕಾಳೂರಲ್ಲಿ ಬೇಯುತ್ತಿರೋ ಅವರನ್ನು ಮತ್ತೆ ಮಾಲ್ಗುಡಿಯತ್ತ ಕರೆತರುತ್ತದೆ. ಕತೆ ಇಷ್ಟೇ ಆದರೂ ಅದಕ್ಕೊಂದಿಷ್ಟು ಸವಿಯಿತ್ತಿದ್ದು ಅಂದರೆ ಬಾಲ್ಯದ ಲಕ್ಷ್ಮಿ, ವಿಮಲ, ಭಟ್ಟ , ಸಂತು ಮತ್ತು ಸರಸ್ವತಿ ಟೀಚರ್ರಿನ ಶಾಲಾ ದೃಶ್ಯಗಳು ಮತ್ತು ಮಲೆನಾಡ ಮಳೆ. ನಮ್ಮ ಬೆಂಗಳೂರಿನ ಲಾಲ್ ಬಾಗೇನಾ ಇದು, ಇದು ನಮ್ಮ ಮಲೆನಾಡ ತೀರ್ಥಹಳ್ಳಿ, ಹೊಸನಗರಗಳೇನಾ ಇವು ಅನ್ನುವಷ್ಟು ಅದ್ಭುತವಾಗಿ ತೋರಿಸಿರೋ ಸಿನಿಮಾಟೋಗ್ರಫಿ ಮೊದಲಾರ್ಧವನ್ನು ಆಪ್ತವೆನಿಸುತ್ತೆ.  ಪಾಂಡಿಚೇರಿಯ ಪ್ರೇಮ ಪ್ರಸಂಗ, ಆಫೀಸಿನ ಬಾಸ ದೌರ್ಜನ್ಯ, ತಾಯಿಯ ಸಂಸ್ಕಾರಕ್ಕೂ ಬರಲಾಗದ ಮಗಳ ಪರಿಸ್ಥಿತಿ, ತಮ್ಮ ಬೇಳೆ ಬೇಯಿಸಿಕೊಳ್ಳೋಕೆ ಅಂತ ಊರಿಗೇ ಬೆಂಕಿಯಿಡೋ ಗಿರಿರಾಜ ಮತ್ತು ಮಗಳಿಗೆ ಇಷ್ಟವಿಲ್ಲದಿದ್ದರೂ ಮದುವೆ ಮಾಡಿ ನಂತರ ಪರಿತಪಿಸೋ ತಂದೆ, ತಾಯಿಗೆ ಮದುವೆ ಮಾಡಲಿಷ್ಟವಿದ್ದರೂ ತನಗೇ ಇಷ್ಟವಿರದಿದ್ದ ಮಗಳು ಹೀಗೆ ಹಲವು ಭಾವಗಳ, ಪರಿಸ್ಥಿತಿಗಳ ಛಾಯೆ ಪಾತ್ರಗಳಲ್ಲಿ ಹಾಸು ಹೋಗುತ್ತದೆ. ಇನ್ನು ಚಿತ್ರದುದ್ದಕ್ಕೂ ಕಾಡೋ ರಘು ದೀಕ್ಷಿತ್ ಸಂಗೀತ ಚಿತ್ರ ಮುಗಿದರೂ ನಮ್ಮನ್ನ ಕಾಡುತ್ತಿರುತ್ತೆ. ಮನೆಯಿದ್ದರೆ ಹೀಗಿರಬೇಕು ಎಂಬಂತೆ ತಯಾರಿ ಮಾಡಿರೋ ಪ್ರಕೃತಿಯ ಮನೆ, ವಿಜಯ್ ಪಾತ್ರಕ್ಕಾಗಿ ಹೊಸದಾಗಿ ಎಂಟ್ರಿ ಕೊಟ್ಟಿರೋ ತುಳುನಾಡ ಹುಡುಗ ಅರ್ಜುನ್ ಕಾಪಿಕಾಡ್ ಅವರ ನಟನೆ, ನೃತ್ಯ ಕೂಡ ಮುದ ನೀಡುತ್ತೆ.

ಇಷ್ಟೆಲ್ಲಾ ಇದ್ದರೂ ಮೈಸೂರು ಪಾಕು, ಪಾನಿಪೂರಿಯ ಹೋಲಿಕೆ ಯಾಕೆ ಅಂತ ಅಂದ್ಕೊಂಡ್ರಾ ? ಚಿತ್ರದಲ್ಲಿರೋ ಸುಮಾರು ಅಸಂಬದ್ಧಗಳೇ ಅದಕ್ಕೆ ಕಾರಣ. ಮೊದಲಿಗೆ ಮಾಲ್ಗುಡಿ ಡೇಸ್ ಅಂತ ಹೆಸರಿಟ್ಟುಕೊಂಡು ಮೂಲ ಕತೆಯಲ್ಲಿ ಬರೋ ಸ್ವಾಮಿ ಮತ್ತವನ ಗ್ಯಾಂಗಿಗೆ ಸಂಬಂಧಪಡದ ಚಿತ್ರ ಮಾಡಿದ್ದು. ಎರಡನೆಯದು ಮಾಲ್ಗುಡಿ ಡೇಸಿಗೆ ಯಾವ ಸಂಬಂಧವೂ ಇರದ ಬೆಂಗಳೂರ, ಕೊಯಂಬತ್ತೂರಿನ ಚಿತ್ರಗಳ ಸೇರಿಸಿದ್ದು.. ಹೀಗೆ. ಮಲೆನಾಡ ತೋರಿಸಬೇಕು ಅಂತ, ನಗರ, ಆಗುಂಬೆ, ಶೃಂಗೇರಿ ಹೀಗೆ ಎಲ್ಲಾ ಪ್ರಮುಖ ಪೋಲೀಸ್ ಠಾಣೆಗಳನ್ನೂ ತೋರಿಸಿದ್ದು ! ದ್ವಿತೀಯಾರ್ಧದಲ್ಲಿ ಅಗತ್ಯವಿಲ್ಲದಿದ್ದರೂ ಎಳೆದು ತರುವ ಪ್ರಕೃತಿಯ ಅಮ್ಮನ ಮನೆಯಲ್ಲಿನ ಪೂಜೆ, ವಿಮಲನ ಮಗಳು, ಮಾಲ್ಗುಡಿ ಶಾಲೆಯಲ್ಲಿನ ಯೂನಿಯನ್ ಡೇ, ಪೋಲೀಸಪ್ಪನಾಗಿ ಬ್ಯಾಂಕ್ ಜನಾರ್ಧನ್ ಅವರ ನಗು ಬರದ ಕಾಮಿಡಿಗಳು,ಕೆಲವೆಡೆ ಕಳಚಿಬಿದ್ದಂತೆ ಕಾಣುವ ವಿಜಯ್ ರಾಘವೇಂದ್ರ ಅವರ ವಯಸ್ಸಾದ ಮೇಕಪ್ಪು, ಮನೆಯಲ್ಲಿ ಯಾರಿಲ್ಲದೇ ಗೋಡೆಗಳೇ ಬೀಳುವ ಹಾಗಿದ್ದರೂ ಹುಡುಗನೊಬ್ಬ ಸಣ್ಣಕ್ಕಿದ್ದಾಗ ಬರೆದ "ಅಮ್ಮ" ಅನ್ನೋ ಪದ ಅವ ಮುದುಕನಾದರೂ ಮಾಸದಂತಿರುವುದು ಇತ್ಯಾದಿ ಅಧ್ವಾನಗಳು ರಸಭಂಗವನ್ನುಂಟು ಮಾಡುತ್ತೆ.  ಈ ಪ್ರಕೃತಿ, ವಿಜಯ್ ಯಾರು, ಲಕ್ಷ್ಮೀನಾರಾಯಣ, ಲಿನೇಟಾರ ಪ್ರೇಮಕತೆಯೇನಾಗುತ್ತೆ, ಮಾಲ್ಗುಡಿಯವ ಬೆಂಗಳೂರಿಗೇಕೆ ಹೋದ, ಶೃಂಗೇರಿಗೂ ಕೊಯಂಬತ್ತೂರಿಗೂ ಏನು ಸಂಬಂಧ ಅಂತೆಲ್ಲಾ ಆಲೋಚಿಸುತ್ತಿದ್ದೀರ ? ಅವೆಲ್ಲಾ ಪ್ರಶ್ನೆಗಳಿಗೆ ಉತ್ತರ ಸಿಗಬೇಕೆಂದ್ರೆ ನೀವು ಈ ಚಿತ್ರವನ್ನು ನೋಡಬೇಕು. ಮೊದಲಾರ್ಧಕ್ಕಾದರೂ ಮನೆಮಂದಿಯೊಂದಿಗೆ ಕೂತ ನೋಡಬೇಕಾದ ಚಿತ್ರ "ಮಾಲ್ಗುಡಿ ಡೇಸ್"

ಕರೊನಾ ಕೋಲಾಹಲವೂ, ದಿಯಾ ಮತ್ತು ಲವ್ ಮಾಕ್ಟೈಲ್ಗಳು

ಕರುನಾಡ ಕಲಬುರ್ಗಿಯಲ್ಲಿ ಸೌದಿಯಿಂದ ಬಂದ ವೃದ್ಧರೊಬ್ಬರು ಮೃತಪಟ್ಟಿದ್ದು, ಬೆಂಗಳೂರಲ್ಲಿ ಇಬ್ಬರು ಕರೋನಾ ಸೋಂಕಿತರು ಪತ್ತೆಯಾಗಿದ್ದಾಗ ಸೃಷ್ಠಿಯಾದ ಆತಂಕ ಟಿ.ವಿಯವರ ಅಬ್ಬರದಿಂದ "ಕರೋನಾ ರಣಕೇಕೆ", "ಕರೋನಾ ಅಬ್ಬರ", "ಕರೋನಾ ಕೋಲಾಹಲ"ವಾಗಿ ಮಾರ್ಪಟ್ಟಿದೆ. ಬೆಂಗಳೂರಿಗೆ ಬಂದು ಮೂವತ್ತಾರು ಮಂದಿಗೆ ಕರೋನಾ ಹಬ್ಬಿಸಿದ್ದಾರೆ ಎನ್ನಲಾಗಿದ್ದ ತೆಲಂಗಾಣದ ಟೆಕ್ಕಿಯನ್ನೇ ಈಗ ಅಲ್ಲಿನ ಆಸ್ಪತ್ರೆಯಿಂದ ಬಿಡುಗಡೆ ಮಾಡಿದ್ದರೂ ಇಲ್ಲಿನ ಎಚ್ಚರಿಗೆ ಮುಂದುವರೀತಿದೆ. ರಾಜ್ಯವನ್ನೇ ಏಳು ದಿನಗಳ ಕಾಲ ಬಂದ್ ಮಾಡೋ ಮಾನ್ಯ ಮುಖ್ಯಮಂತ್ರಿಗಳವರ ನಿರ್ಧಾರದಿಂದ ಕೆಲವರಿಗೆ ಸಖತ್ ಖುಷಿಯಾಗಿದ್ರೆ ಕೆಲವರ ಬದುಕೇ ದಿಕ್ಕಾಪಾಲಾದಂತೆ ಕಾಣ್ತಿದೆ. ಏನು ಮುಟ್ಟಿದ್ರೂ ಹ್ಯಾಂಡ್ ಸ್ಯಾನಿಟರೈಸ್ ಹಾಕಿ ತೊಕ್ಕೊಳಿ ಅಂತ ವಾಟ್ಸಾಪಿನ ಫಾರ್ವಾಡುಗಳು ಓಡಾಡಿದ್ದೇ ಓಡಾಡಿದ್ದು. ಈಗೆಲ್ಲಿ ನೋಡಿದ್ರೂ ಸ್ಟಾಕೇ ಇಲ್ಲ ಅದರದ್ದು. ಮಾಸ್ಕ್ ಹಾಕ್ಕೊಳ್ರಪ್ಪ ಅಂತಂದಿದ್ದೇ ಸಾಕು ಮುನ್ನೂರೈವತ್ತರ ಮಾಸ್ಕುಗಳು ಮಾರ್ಕೇಟಿಂದ್ಲೇ ಮಂಗಮಾಯ ! ಐನೂರೈವತ್ತು ಕೊಟ್ಟರೆ ಕೊಡ್ತೀವಿ ಸಾರ್ ಅಂತಾನೆ ಅಂಗಡಿಯವ ಬ್ಲಾಕಲ್ಲಿ ಮಾರೋ ಸ್ಕೆಚ್ ಹಾಕಿ ! ಇಂದಿನ ಪೇಪರಲ್ಲಿ ಅಂತಹ ಕ್ರಮಗಳನ್ನ ಕೈಗೊಳ್ಳೋರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಅಂತ ಮುಖ್ಯಮಂತ್ರಿಗಳೇ ಎಚ್ಚರಿಸಿದ್ರೂ ಆ ಪರಿಸ್ಥಿತಿ ಬದಲಾಗುತ್ತೋ ಇಲ್ವೋ ಗೊತ್ತಿಲ್ಲ. ಮಾಲು, ಸಿನಿಮಾ ಥಿಯೇಟರ್ಗಳೆಲ್ಲ ಬಂದಾಗಿರೋದ್ರಿಂದ ಬೆಂಗ್ಳೂರೇ ಒಂಥರಾ ಥಂಡಾ ಹೊಡಿದ ಫೀಲು. ಐ.ಟಿ , ಬಿ.ಟಿಗಳಿಗೆಲ್ಲಾ ಮನೆಯಿಂದ ಕೆಲಸ ಮಾಡೋಕೆ ಹೇಳಿ ಅಂತ ಮುಖ್ಯಮಂತ್ರಿಗಳೇ ಹೇಳಿದ್ರೂ ಅದ್ನ ಹೇಳ್ಭೇಕೋ ಬೇಡ್ವೋ ಅಂತ ಮೀನ ಮೇಷ ಎಣಿಸ್ತಿರೋ ಕಂಪೆನಿಗಳ ನಡುವೆ ಉದ್ಯೋಗಿಗಳೇ ಮನೆಗಳೊಳಗೆ ಫೆವಿಕಾಲ್ ಹಚ್ಕೊಂಡು ಕುತ್ಕೊಂಡಿರೋದ್ರಿಂದ ಬಿ.ಎಂ.ಟಿ.ಸಿ, ಮೆಟ್ರೋಗಳಿಗೂ ಹೆವಿ ಲಾಸಂತೆ. ಥಿಯೇಟ್ರುಗಳು ಬಾಗಿಲು ಹಾಕೋದ್ರಿಂದ ಕನ್ನಡ ಚಿತ್ರೋದ್ಯಮಕ್ಕೂ ಲಾಸ್ ವರ್ಗಾವಣೆಯಾಗ್ಬೋದೇನೋ ಅನಿಸೋ ಹೊತ್ತಿಗೆ ಕಂಡ ಆಶಾ ಕಿರಣ ಅಮೇಜಾನ್ ಪ್ರೈಮ್ !

ಅಮೇಜಾನ್ ಕಿಂಡಲ್ಲಲ್ಲಿ ಕನ್ನಡ ಕೊಡ್ರಪ್ಪ ಅಂತ ಕೇಳಿ ಕೇಳಿ ಸಾಕಾದ್ರೂ ಇವರಿಗೆ ಕಾಣದ ಕನ್ನಡದ ಗ್ರಾಹಕರು ಈಗ ಕಂಡಿದ್ದು ಆಸ್ಛರ್ಯವೇ ಸರಿ ! "ದಿಯಾ" ಮತ್ತು "ಲವ್ ಮಾಕ್ ಟೈಲ್" ಎಂಬ ಎರಡು ಒಳ್ಳೇ ಚಿತ್ರಗಳು ಬಂದ್ ಕಾರಣದಿಂದ ಬಂದಾಗಿ ಹೋಗೋ ಆತಂಕನ ದೂರ ಮಾಡಿದ ಶ್ರೇಯಸ್ಸು ಅಮೇಜಾನವ್ರಿಗೇ ಸಲ್ಲಬೇಕು ಅಂದ್ರೆ ತಪ್ಪಲ್ಲವೇನೋ. "ಲವ್ ಮಾಕ್ ಟೈಲ್" ಥಿಯೇಟರ್ಗಳಲ್ಲೂ ಓಡ್ತಿತ್ತು. ನಾಲ್ಕು ವಾರದ ಮೇಲೆ ಆಗಿತ್ತು ಅಂತ ಅಂದ್ರೂ ಇವೆರಡೂ ಮೂವಿಗಳನ್ನ ಈಗೊಂದೆರೆಡು ದಿನಗಳಲ್ಲೇ ನನ್ನ ಸ್ನೇಹಿತರು ನೋಡಿರೋ ಕಾರಣ ಕರೋನಾ ಮತ್ತು ಅಮೇಜಾನ್ ಪ್ರೈಮ್ !

ಎಲ್ಲಾ ಬಂದಾದ್ರೆ , ಮನೇಲೇ ಕೂತು ಎಷ್ಟೂಂತ ಕೆಲ್ಸ ಮಾಡೋದು ಸಿವಾ ? ಬೇಸರಕ್ಕೆ ಅಂತ ಮೊಬೈಲೋ, ಟೀವಿನೋ ಹೊಕ್ಕಾಗ ಇದೇ ಕಣ್ಣಿಗೆ ಬೇಳಬೇಕೇ ಸಿವಾ ? "ಲೂಸಿಯಾ" ಸಿನಿಮಾ ಬಂದಾಗ್ಲೂ ಅಂತರ್ಜಾಲದಲ್ಲಿ ನಡೀತಿದ್ದ ಅದರ ಚರ್ಚೆಗಳಿಂದ್ಲೇ ಅದು ಸುಮಾರು ದಿನ ಓಡಿತು ಅನ್ನೋ ಮಾತುಗಳಿದ್ರೂ ಇವೆರಡೂ ಚಿತ್ರಗಳಲ್ಲಿ ಅಂತರ್ಜಾಲದ ಹೊರಬಂದೂ ಓಡೋ ತಾಕತ್ತಿದೆ ಅನ್ಸತ್ತೆ. ಸಿನಿಮಾ ಅಂದ್ರೆ ನಾಲ್ಕು ಫೈಟು, ವಿಲನ್ನುಗಳು ಬಂದು ಹೀರೋಯಿನ್ನನ್ನ ಕಿಡ್ನಾಪ್ ಮಾಡ್ಬೇಕು, ನಾಲ್ಕು ಮರಸುತ್ತೋ ಸೀನುಗಳು, ಐಟಂ ಸಾಂಗುಗಳಿರ್ಬೇಕು, ಹೀರೋಗೊಂದು ಹೀರೋಯಿನ್ನಿಗೊಂದು ಬಿಲ್ಡಪ್ ಕೊಡೋ ಸಾಂಗೋ ಡೈಲಾಗುಗಳೋ ಇರ್ಬೇಕು , ಕಾರು ಬೈಕುಗಳೆಲ್ಲಾ ಚೆಲ್ಲಾಪಿಲ್ಲಿಯಾಗಿ ಬೀಳೋ ಹೊಡೆದಾಟಗಳಿರ್ಬೇಕು ಅನ್ನೋ ಸಿದ್ಧ ಸೂತ್ರಗಳಿಂದೆಲ್ಲಾ ಹೊರಬಂದು ಏನೋ ಟ್ವಿಸ್ಟ್ ಕೊಟ್ಟು ಕೊನೆಯವರೆಗೂ ಕುತೂಹಲಕರವಾಗಿ ನೋಡಿಸಿಕೊಂಡು ಹೋಗೋ ಅಂತಹ ಚಿತ್ರ ಮಾಡ್ಬೇಕು ಅನ್ನೋ ನಿರ್ದೇಶಕರ ಶ್ರಮ ಎರಡೂ ಚಿತ್ರಗಳಲ್ಲಿ ಕಾಣುತ್ತೆ. ಟ್ವಿಸ್ಟ್ ಕೊಡಬೇಕು ಅನ್ನೋ ಧಾವಂತದಲ್ಲೇ ಎರಡೂ ಚಿತ್ರಗಳ ಕೊನೆಯ ಹತ್ತು-ಹದಿನೈದು ನಿಮಿಷಗಳನ್ನು ಅದ್ವಾನಗೊಳಿಸಿದಂತೆ ಕಾಣುತ್ತಾದ್ರೂ ಪ್ರತಿಯೊಂದು ದೃಶ್ಯಕ್ಕೂ ಅವರು ಹಾಕಿದ ಶ್ರಮ ಕಂಡು ಖುಷಿಯಾಗುತ್ತೆ. ಸಿಂಪಲ್ ಉದಾಹರಣೆಯೆಂದ್ರೆ "ಲವ್ ಮಾಕ್ ಟೈಲ್" ನಲ್ಲಿನ ನಿಧಿಮಾ ಮತ್ತು ಆದಿಯ ನಡುವಿನ ಮನೆಯ ಒಂದು ದೃಶ್ಯ. ಅದರಲ್ಲಿ ಅವ ಕುತ್ತಿಗೆಗೆ ಹಾಕ್ಕೊಂಡ ದಿಂಬು, ನಾಯಕಿಯ ಡ್ರೆಸ್ಸು, ಹಿಂದಿನ ಕರ್ಟನ್ನಿನ್ನ ಪರದೆ ಎಲ್ಲವೂ ನೀಲಿಮಯ, ದೃಶ್ಯವೂ ಪ್ರೇಮಮಯ ! "ದಿಯಾ"ದಲ್ಲಿ ಬರೋ ಎರಡನೇ ನಾಯಕ ಮತ್ತು ಆತನ ತಾಯಿಯ ಪಾತ್ರ ಲಕ್ಕಿಯಂತೂ ನಮ್ಮ ನಡುವೆ ಈ ತರದ ವ್ಯಕ್ತಿಗಳೂ ಇರೋಕೆ ಸಾಧ್ಯವಾ ಅಂತ ಅಚ್ಚರಿ ಮೂಡಿಸುವಂತದ್ದು. ಕೆಲವೊಂದು ಬೋರ್ ಹೊಡಿಸೋ ಸನ್ನಿವೇಶಗಳನ್ನ ಬಿಟ್ರೆ, ಕೆಲವೆಡೆ ಪ್ರೀತಿಯ ಓವರ್ಡೋಸ್ ಅನಿಸಿದರೂ ಆಪ್ತವೆನಿಸೋ ಇವೆರಡೂ ಚಿತ್ರಗಳಿಂದ ವಾರಾಂತ್ಯಕ್ಕೊಂದು ಕಳೆ ಸಿಕ್ಕಿದ್ದು ಸುಳ್ಳಲ್ಲ. 


ಹಾಟ್ ಸ್ಟಾರ್, ನೆಟ್ ಫ್ಲಿಕ್ಸ್ ಮತ್ತು ಅಮೇಜಾನ್ ಪ್ರೈಂಗಳಲ್ಲಿ ಕನ್ನಡದ ಚಿತ್ರಗಳು ಹೆಚ್ಚಿಲ್ಲ. ಇದ್ದರೂ ಹೊಸದಿಲ್ಲ ಅನ್ನೋ ಗ್ರಾಹಕರ ಕೊರಗು ಸದ್ಯದಲ್ಲೇ ನೀಗಬಹುದೇನೋ ಅನ್ನೋ ನಿರೀಕ್ಷೆಯನ್ನು ಹುಟ್ಟಿಸಿರೋ ಈ ಚಿತ್ರಗಳಿಗೆ ಒಂದು ಅಭಿನಂದನೆ. ಕನ್ನಡ ಚಿತ್ರಗಳಿದ್ರೂ ಇರೋ ಐದಾರು ಸ್ಕ್ರ್ರೀನುಗಳಲ್ಲಿ ನಾಲ್ಕೈದು ಶೋಗಳಲ್ಲಿ ಒಂದು ಶೋ ಕೊಡೋಕೆ ಅಳ್ತಿರೋ ಮಲ್ಟಿಪ್ಲೆಕ್ಸುಗಳು, ಕನ್ನಡ  ಸಿನಿಮಾಗಳಿಗೆ ಥಿಯೇಟರುಗಳು ಸಿಗದೇ ತಾವೇ ವಿತರಕರಾಗಿರೋ ತೆಲುಗು, ತಮಿಳು, ಹಿಂದಿ ಚಿತ್ರಗಳಿಗೆ ಥಿಯೇಟರ್ ಸಿಗುವಂತೆ  ನೋಡ್ಕೊಳ್ಳುತ್ತಿರೋ ನಮ್ಮಲ್ಲೇ ಇರೋ ದೊಡ್ಡ ಮನುಷ್ಯರ ನಡುವೆ ಕನ್ನಡಿಗರಿಗೆ ಕನ್ನಡದಲ್ಲೇ ಇರೋ ಉತ್ತಮ ಚಿತ್ರಗಳು ಸಿಗದಂತಾಗುತ್ತಿವೆ. ವಾರಾಂತ್ಯದಲ್ಲಾದ್ರೂ ಚಿತ್ರ ನೋಡೋಣ ಅಂತಂದ್ರೆ ಬೇರೆ ದಿನ ನೂರೈವತ್ತರ ಸುಮಾರಿರೋ ಟಿಕೇಟಿಗೆ ವಾರಾಂತ್ಯದಲ್ಲಿ ಎರಡೂವರೆ ಮೂರು ಪಟ್ಟು ಕೊಟ್ಟು ನೋಡಬೇಕಾದ ಅನಿವಾರ್ಯತೆ ಬೆಂಗಳೂರಂತ ಮಹಾನಗರಗಳಲ್ಲಿ ! ಯಾರ ಹೊಟ್ಟೆಯ ಮೇಲೂ ಹೊಡೆಯುವಂತಹ ಮಾತಾಡಬಾರದು ಅಂತನ್ನೋದು ನಿಜವಾದರೂ ಈ ಥರ ಮಾಡುತ್ತಿದ್ದ  ಮಲ್ಟಿಪ್ಲೆಕ್ಸುಗಳಿಗೂ ಇಷ್ಟಕ್ಕಿಂತ ಜಾಸ್ತಿ ಟಿಕೇಟ್ ದರ ವಿಧಿಸೋ ಹಾಗಿಲ್ಲ ಅಂತ ಮಾಡಿದ್ರೆ ಎಷ್ಟು ಚೆನ್ನಾಗಿರುತ್ತೋ ಅಂತ ಎಷ್ಟೋ ಸಲ ಅನಿಸಿದ್ದಿದೆ . ಅಷ್ಟೆಲ್ಲಾ ಕೊಡೋಕೆ ಸಿದ್ದವಾದ್ರೂ ಹೇಳ್ದೇ ಕೇಳ್ದೇ ಚೆನ್ನಾಗಿ ಓಡ್ತಿರೋ ಕನ್ನಡ ಚಿತ್ರಗಳನ್ನ ಎತ್ತಂಗಡಿ ಮಾಡಿ ಯಾವುದೋ ತೆಲುಗು, ತಮಿಳು ಚಿತ್ರಗಳಿಗೆ ಮಣೆ ಹಾಕ್ತಿದ್ದ ಅವರನ್ನು ನೋಡಿ ಎಷ್ಟು ಉರ್ಕಂಡ್ರೂ ಏನೂ ಮಾಡೋಕಾಗದೇ ಇರುವಂತ ಕನ್ನಡಿಗರಿಗೆ ಆಶಾ ಕಿರಣಗಳಂತೆ ಕಾಣ್ತಿರೋದು ಇದೇ ಹಾಟ್ ಸ್ಟಾರು, ನೆಟ್ ಫ್ಲಿಕ್ಸು ಮತ್ತು ಅಮೇಜಾನುಗಳು ! "ದಿಯಾ" ಮತ್ತು "ಲವ್ ಮಾಕ್ ಟೈಲ್" ಚಿತ್ರಗಳಿಗೆ ಸಿಗೋ ವೀಕ್ಷಣೆ , ಮೆಚ್ಚುಗೆ ಈ ಅಮೇಜಾನಿಂದ ಆಚೆ ದಾಟಿ ಅದಕ್ಕೆ ದುಡ್ಡು ಸುರಿದ ನಿರ್ಮಾಪಕರ ಜೇಬು ತುಂಬಲಿ, ಈ ತರದ್ದೇ ಹಲವು ಹೊಸ ಕನ್ನಡ ಪ್ರಯತ್ನಗಳಿಗೆ ನಾಂದಿಯಾಗಲಿ ಅನ್ನೋದು ಸದ್ಯದ ಆಶಯ. ಕನ್ನಡದ ಜನತೆಯ ಸಿನಿಮಾ ಪ್ರೇಮದ ಅಗಾಧತೆಯನ್ನು ಈ ಆನ್ ಲೈನ್ ಕಂಪೆನಿಗಳೂ ಅರ್ಥ ಮಾಡಿಕೊಂಡು ಇನ್ನೂ ಹೆಚ್ಚೆಚ್ಚು ಕನ್ನಡ ಚಿತ್ರಗಳನ್ನ ತಮ್ಮ ವೇದಿಕೆಗಳ ಮೂಲಕ ಹೊರತರುವಂತಾಗಲಿ ಅನ್ನೋ ಹಾರೈಕೆಯೊಂದಿಗೆ ಸದ್ಯಕ್ಕೊಂದು ವಿರಾಮ.

ಹಾಲುಮುದ್ದೆ ಪುರಾಣ

Haalu mudde ಹಾಲುಮುದ್ದೆ 

ಭಾನುವಾರದ ಬೆಳಗೆದ್ದು ಹಾಲುಮುದ್ದೆ ಮಾಡಲಾ ಅಂತ ಮಡದಿ ಕೇಳ್ತಿದ್ರೆ ನಂಗೆ ಏನು ಹೇಳ್ತಿದ್ದಾಳಪ್ಪಾ ಇವ್ಳು ಅಂತ ! ರಾಗಿಮುದ್ದೆನಾ ಅಂತ ಒಮ್ಮೆ ಅನಿಸಿ ಆಂ ಅಂದ್ರೆ , ಹಾಲುಮುದ್ದೆ ಅಂದ್ಲು ಮತ್ತೆ.  ಆಫೀಸಲ್ಲಿ ಚಮಚ ತಗೊಂಡು ರಾಗಿಮುದ್ದೆ ತಿನ್ನೋ ಜನರೆಲ್ಲಾ ನೆನಪಾಗಿ, ಮುದ್ದೆಯ ವಿಚಾರವನ್ನೇ ರಾಜಕೀಯವಾಗಿಸೋ ಜನರೆಲ್ಲಾ ಕಣ್ಮುಂದೆ ಬಂದು ಮತ್ತೊಮ್ಮೆ ಆಂ ಅನ್ನೋ ಮೊದಲೇ ಹಾಲುಮುದ್ದೆ ಅನ್ನೋದು ಒಂದು ತಿಂಡಿ , ಸಿಹಿತಿಂಡಿ ಅಂದ್ರು ಹೋಂ ಮಿನಿಸ್ಟರ್ರು. ಓ, ಹೌದಾ, ಸರಿ. ಮಾಡು ಅಂದೆ. ನಂತರ ಹಾಲು ಮುದ್ದೆಯ ಚಿತ್ರ ಹಾಕಿದ್ದನ್ನ ನೋಡಿ ಅದನ್ನು ಮಾಡೋದು ಹೇಗೆ ಅಂತ ಎಲ್ಲಾ ಕೇಳುತ್ತಿದ್ದಾಗ ಅದನ್ನ ಮಾಡೋದು ಹೇಗೆ ಅಂತ ಎಲ್ರಿಗೂ ಮತ್ತೆ ಮತ್ತೆ ಹೇಳೋ ಬದ್ಲು ಒಂದೇ ಕಡೆ ಬರದ್ರೆ ಹೆಂಗೆ ಅಂತನಿಸಿ ಬರೆಯೋಕೆ ಕೂತಾಗ ನೆನಪಾಗಿದ್ದಿಷ್ಟು. ಇನ್ನೂ ಹೆಚ್ಚಿನ ಸುದ್ದಿಯಿಲ್ಲದೆ ಹಾಲು ಮುದ್ದೆಯ ತಯಾರಿ ಹೆಂಗೆ ಅನ್ನೋ ಅಲ್ಲಿಗೆ ಹೋಗೋಣ.

ಬೇಕಾದ ಸಾಮಗ್ರಿಗಳು: 
ರವೆ-೨ ಕಪ್ಪು
ಸಕ್ಕರೆ/ಬೆಲ್ಲ- ೨ ಕಪ್ಪು
ತುಪ್ಪ-೧ ಕಪ್ಪು
ಹಾಲು- ೪ ಕಪ್ಪು
ಏಲಕ್ಕಿ- ೧
ಲವಂಗ- ೪
ದ್ರಾಕ್ಷಿ- ಸ್ವಲ್ಪ

ಮಾಡೋ ವಿಧಾನ: 
ರವೆಯನ್ನು ಸಣ್ಣ ಉರಿಯಲ್ಲಿ ಸ್ವಲ್ಪ ಹುರಿದುಕೊಳ್ಳಿ. ಮತ್ತೊಂದು ಪಾತ್ರೆಯಲ್ಲಿ ಹಾಲನ್ನು ಕುದಿಸಿಕೊಂಡು ಅದಕ್ಕೆ ಹುರಿದ ರವೆಯನ್ನು ಹಾಕಿ. ರವೆಯನ್ನು ಹಾಕಿದ ತಕ್ಷಣ ನಿಧಾನವಾಗಿ ತೊಳೆಸುತ್ತಾ ಸಕ್ಕರೆ/ಬೆಲ್ಲ, ಸ್ವಲ್ಪ ತುಪ್ಪ  ಮತ್ತು ಪುಡಿ ಮಾಡಿದ ಏಲಕ್ಕಿ, ಲವಂಗಗಳನ್ನು ಹಾಕಬೇಕು. ಗಟ್ಟಿಯಾಗುವ ತನಕ ತಳಹಿಡಿಯದಂತೆ ತೊಳೆಸುತ್ತಾ ಇರಬೇಕು. ಸುಮಾರು ಹತ್ತು-ಹದಿನೈದು ನಿಮಿಷಗಳ ನಂತರ ಈ ಮಿಶ್ರಣ ಉಂಡೆ ಕಟ್ಟುವಷ್ಟು ಗಟ್ಟಿಯಾಗುತ್ತೆ. ಆಗ ದ್ರಾಕ್ಷಿ ಹಾಕಿ ಉಂಡೆಕಟ್ಟಿದ್ರೆ ಹಾಲುಮುದ್ದೆ ಸವಿಯಲು ಸಿದ್ದ. ಇದನ್ನು ತುಪ್ಪದೊಂದಿಗೆ ಅಥವಾ ಚಟ್ನಿಪುಡಿಯೊಂದಿಗೆ ತಿನ್ನಬಹುದು.

ರೆಸಿಪಿ ಕ್ರೆಡಿಟ್ಸ್: ಅಕ್ಷತಾನ ಅಜ್ಜಿ
ಮಾಡಿದ್ದು: ನಮ್ಮನೆ ಅಕ್ಷತಾ 

ಅಂದ ಹಾಗೆ ಇದನ್ನು ಶ್ರಂಗೇರಿ ಕಡೆ ಜಾಸ್ತಿ ಮಾಡ್ತಾರಂತೆ ಅಂತ ನಮ್ಮನೆಯವ್ರು ಹೇಳ್ತಾ ಇದ್ರು. ಇನ್ನೂ ಹೆಚ್ಚಿನ ಮಾಹಿತಿ ಗೊತ್ತಿರೋರು ಹಂಚ್ಕೊಂಡ್ರೆ ಇನ್ನೊಂದಿಷ್ಟು ತಿಳ್ಕೋಬೋದು

ಗುಡ್ ಬೈ ಗೂಗಲ್ ಪ್ಲಸ್

ಸೆಪ್ಟೆಂಬರ್ ೩೦,೨೦೧೪

ಅಂತರ್ಜಾಲದ ದೈತ್ಯ ಗೂಗಲ್ಲಿನ ಉತ್ಪನ್ನವಾಗಿದ್ದ ಆರ್ಕುಟ್ಟಿನ ಬಳಕೆದಾರರ ಪಾಲಿಗೆ ಕರಾಳ ದಿನ. ಸಮಾನ ಆಸಕ್ತರನ್ನು ಒಂದೆಡೆ ಸೆಳೆಯುವ ಆರ್ಕುಟ್ ಗ್ರೂಪುಗಳ ಮೂಲಕ ಸಹಸ್ರಾರು ಜನರನ್ನು ಒಂದೆಡೆ ಸೆಳೆದಿದ್ದ ಆರ್ಕೂಟ್ ಬಾಗಿಲು ಹಾಕಿದಾಗ ಮುಂದೇನಪ್ಪ ಅಂತ ಸುಮಾರು ಜನ ಬೇಸರಗೊಂಡಿದ್ದರು. ಆಗ ಅದು ಬಾಗಿಲು ಹಾಕೋಕೆ ಮುಖ್ಯ ಕಾರಣ ಅದರ ಪ್ರತಿಸ್ಪರ್ಧಿ ಫೇಸ್ಬುಕ್ಕು. ೨೦೦೪ರಲ್ಲೇ ಶುರುವಾದ ಫೇಸ್ಬುಕ್ಕು ಮತ್ತು ಅದರ ಪ್ರತಿಸ್ಪರ್ಧಿ ಗೂಗಲ್ಲಿನ ಜಟಾಪಟಿಗೆ ಈಗ ಹದಿನೈದರ ಹರೆಯ ! 

ಫೇಸ್ಬುಕ್ ವರ್ಸಸ್ ಗೂಗಲ್:

೨೦೦೪ರಲ್ಲಿ ಶುರುವಾಗಿದ್ದ ಆರ್ಕುಟ್ ಸೇವೆ ೨೦೦೬ ರ ಹೊತ್ತಿಗೆ ವಿಶ್ವದಲ್ಲಿ ಹೆಚ್ಚು ಬಳಸಲ್ಪಡುವ ಸಾಮಾಜಿಕ ಜಾಲತಾಣವಾಯಿತು. ಅದರ ೭೦% ಪ್ರತಿಶತ ಬಳಕೆದಾರರು ಬ್ರೆಜಿಲಿಯನ್ನರು ಎಂದು ಆಗ ಅಂದಾಜಿಸಲಾಗಿತ್ತು. ೨೦೦೯ರ ಹೊತ್ತಿಗೆ ಭಾರತದಲ್ಲೂ ಅದರ ಹೆಚ್ಚುತ್ತಿರುವ ಪ್ರಖ್ಯಾತಿಯನ್ನರಿತ ಫೇಸ್ಬುಕ್ಕಿನ ಸಿ.ಇ.ಒ ಮಾರ್ಕ್ ಜುಕರ್ ಬರ್ಗ್ ಭಾರತಕ್ಕೆ ಭೇಟಿಯಿತ್ತು ಇಲ್ಲಿನ ತಂತ್ರಜ್ಞರೊಂದಿಗೆ ಚರ್ಚಿಸಿ ಫೇಸ್ಬುಕ್ಕನ್ನು ಕನ್ನಡ, ಹಿಂದಿ, ತಮಿಳು ಮುಂತಾದ ಭಾರತೀಯ ಭಾಷೆಗಳಲ್ಲಿ ದೊರೆಯುವಂತೆ ಮಾಡಿ ಆರ್ಕುಟ್ಟಿಗೆ ಸಡ್ಡು ಹೊಡೆಯತೊಡಗಿದರು. ೨೦೦೬ರಲ್ಲಿ ಮೊದಲನೆಯ ಸ್ಥಾನದಲ್ಲಿದ್ದ ಮೈ ಸ್ಪೇಸನ್ನು ಹೇಳ ಹೆಸರಿಲ್ಲದಂತೆ ಮಾಡಿದ ಫೇಸ್ಬುಕ್ ಮತ್ತು ಆರ್ಕುಟ್ಟಿನ ಸಮರದಲ್ಲಿ ಮೊದಲನೇ ಸ್ಥಾನವನ್ನು ಆರ್ಕುಟ್ಟೇ ಹಲವು ವರ್ಷಗಳ ಕಾಲ ಕಾಯ್ದುಕೊಂಡಿತ್ತು.  ಈ ಯಶಸ್ಸಿನಿಂದ ಪ್ರೇರೇಪಿತರಾದ ಗೂಗಲ್ಲಿನವರು ಗೂಗಲ್ ಪ್ಲಸ್ ಎಂಬ ಹೊಸ ಸಾಮಾಜಿಕ ತಾಣವನ್ನು ತಂದರು. ಇದರಿಂದ ಆರ್ಕುಟ್ಟಿನಿಂದ ತಲುಪಲಾಗದ ಜನರನ್ನು ತಲುಪೋದು ಮತ್ತು ಫೇಸ್ಬುಕ್ಕಿನ ಪ್ರಾಬಲ್ಯವನ್ನು ಕಡಿಮೆ ಮಾಡೋದು ಗೂಗಲ್ಲಿನ ಉದ್ದೇಶವಾಗಿರಬಹುದು. ಆದರೆ ನಿಧಾನವಾಗಿ ಹೆಚ್ಚುತ್ತಿದ್ದ ಫೇಸ್ಬುಕ್ಕಿನ ಪ್ರಖ್ಯಾತಿಯ ಮುಂದೆ ಇದು ನಿಲ್ಲಲಿಲ್ಲ ಮತ್ತು ೨೦೧೪ರಲ್ಲಿ ಗೂಗಲ್ಲು ಆರ್ಕುಟನ್ನು ಬಂದ್ ಮಾಡಬೇಕಾಯಿತು ! ಆಗ ಜನರಿಗಿದ್ದ ಆಶಾಕಿರಣವೆಂದರೆ ಗೂಗಲ್ ಪ್ಲಸ್. ಅದಾಗಿ ನಾಲ್ಕೇ ವರ್ಷಗಳಲ್ಲಿ ಗೂಗಲ್ ತನ್ನ ಮತ್ತೊಂದು ತಾಣವಾದ ಗೂಗಲ್ ಪ್ಲಸ್ ಅನ್ನೂ ಬಂದ್ ಮಾಡಬೇಕಾಗಿದೆ. ಕಮ್ಮಿಯಾಗುತ್ತಿರುವ ಬಳಕೆ ಮತ್ತು ಗ್ರಾಹಕರ ಮೆಚ್ಚಿನ ಉತ್ಪನ್ನವನ್ನು ನಿರ್ವಹಿಸೋಕೆ ಆಗುತ್ತಿರೋ ಕಷ್ಟದಿಂದ ಇಂತಹ ನಿರ್ಧಾರವನ್ನು ಕೈಗೊಳ್ಳಬೇಕಾಗ್ತಿದೆ ಅಂತ ಡಿಸೆಂಬರ್ ೨೦೧೮ರಲ್ಲಿ ಗೂಗಲ್ ಪ್ರಕಟಿಸಿದ್ದರೂ ಇದರ ಮುಖ್ಯ ಕಾರಣ ಕಮ್ಮಿಯಾಗುತ್ತಿರೋ ಬಳಕೆ ಅಂತಲೇ ಕಾಣುತ್ತಿದೆ. 

ಎಂದು ಬಾಗಿಲು ಗೂಗಲ್ ಪ್ಲಸ್ಸಿನ ಮನೆಗೆ? : 

ಫೆಬ್ರವರಿ ೩, ೨೦೧೯ರಂದು ಎಲ್ಲಾ ಗೂಗಲ್ ಪ್ಲಸ್ ಬಳಕೆದಾರರಿಗೆ ಗೂಗಲ್ ಕಳಿಸಿರುವ ಮಿಂಚೆಯ ಪ್ರಕಾರ ಏಪ್ರಿಲ್ ೨,೨೦೧೯ಕ್ಕೆ ಗೂಗಲ್ ಪ್ಲಸ್ ಬಾಗಿಲು ಹಾಕಲಿದೆ. ಅಂದರೆ ಇನ್ನು ಎರಡು ತಿಂಗಳೂ ಇಲ್ಲ ! 

ಫೆಬ್ರವರಿ ಮೂರಕ್ಕೇ ಯಾಕೆ ಮಿಂಚೆ? :

ಯಾವುದಾದ್ರೂ ಸೇವೆಯನ್ನ ಸ್ಥಗಿತಗೊಳಿಸೋಕೆ ಮುಂಚೆ ಮಾಹಿತಿ ತಿಳಿಸೋದು ಸಾಮಾನ್ಯವಾದ್ರೂ ಇಷ್ಟು ಮುಂಚೆ ಯಾಕೆ ಅಂತ ಕೆಲವರಿಗಾದ್ರೂ ಅನಿಸಿರಬಹುದು. ಆರ್ಕುಟ್ಟಿನಲ್ಲೆಂತೂ ಇಷ್ಟು ಮುಂಚೆ ತಿಳಿಸಿರಲಿಲ್ಲ. ಗೂಗಲ್ಲಿನ ಮಿಂಚೆಯನ್ನು ಓದಿದವರಿಗೆ ಅದರಲ್ಲಿನ ಒಂದು ಸಾಲು ಮಿಸ್ಸಾಗಿರಬಹುದು. ಅದೆಂದರೆ ಫೆಬ್ರವರಿ ನಾಲ್ಕರ ನಂತರ ಗೂಗಲ್ ಪ್ಲಸ್ಸಿನಲ್ಲಿ ಯಾವುದೇ ಹೊಸ ಪೇಜನ್ನೋ, ಪ್ರೊಫೈಲನ್ನೋ, ಸಮುದಾಯಗಳನ್ನೋ, ಘಟನೆಗಳನ್ನೋ ತೆರೆಯಲಾಗೋದಿಲ್ಲ ಅನ್ನೋದು ! ಲಕ್ಷಾಂತರ ಜನರು ಬಳಸಲ್ಪಡುವ ಯಾವುದೋ ಒಂದು ಸೇವೆಯನ್ನು ಏಕದಂ ಬಂದ್ ಮಾಡಲಾಗೋದಿಲ್ಲ. ಅದರಲ್ಲಿರೋ ಜನರು ತಮಗೆ ಸಂಬಂಧಿಸಿದ ಮಾಧ್ಯಮಗಳನ್ನು ಬೇರೆಡೆ ಸ್ಥಳಾಂತರಿಸೋಕೆ ಒಂದಿಷ್ಟು ಸಮಯ ಕೊಡಬೇಕಾಗುತ್ತೆ. ಆದರೆ ಅವರಿಗೆ ಹೊಸ ಮಾಧ್ಯಮಗಳನ್ನು ಇಲ್ಲಿ ಹಾಕೋಕೆ ಅವಕಾಶ ಕೊಟ್ರೆ ಅವರು ಅದನ್ನು ಇಲ್ಲಿ ಕೊನೆಯ ಕ್ಷಣದವರೆಗೂ ಹಾಕ್ತಾನೇ ಇರ್ತಾರೇ ಹೊರತು ಇರೋದನ್ನ ಬೇರೆಡೆ ಸ್ಥಳಾಂತರಿಸೋಲ್ಲ. ಹಾಗಾಗಿ ಸದ್ಯದಲ್ಲೇ ಇಲ್ಲಿಂದ ಜಾಗ ಖಾಲಿ ಮಾಡಿ ಅನ್ನೋ ಪರೋಕ್ಷ ಸೂಚನೆ ಇದು ! 

ಗೂಗಲ್ ಪ್ಲಸ್ ಬಾಗಿಲು ಹಾಕಿದ್ರೆ ಏನಾಗುತ್ತೆ? 

೧. ಫೋಟೋಗಳು: 

ನಿಮ್ಮ ಮೊಬೈಲಲ್ಲಿ ಜಿಮೇಲ್ ಐಡಿಯನ್ನ್ ಹಾಕಿದ್ರೆ ನಿಮ್ಮ ಫೋಟೋಗಳು ತಾವಾಗೇ ಗೂಗಲ್ ಡ್ರೈವಿನಲ್ಲಿ ಬ್ಯಾಕಪ್ ಆಗ್ತಿರೋದನ್ನು ನೀವು ಗಮನಿಸಿರಬಹುದು ! ಅದನ್ನು ಬದಲಾಯಿಸಬಹುದಾದರೂ ಸುಮಾರು ಜನ ಮೊಬೈಲ್ ತಗೊಂಡವ್ರು ಅದರಲ್ಲಿ ಬರೋ ಎಲ್ಲಾ ಮಾಹಿತಿಗೂ ಸರಿ ಸರಿ ಅಂತ ತಲೆಯಾಡಿಸೋದ್ರಿಂದ ಇದರ ಬಗ್ಗೆ ತಲೆ ಕೆಡಿಸಿಕೊಂಡಿರೋಲ್ಲ ! ಗೂಗಲ್ ಪ್ಲಸ್ ಬಾಗಿಲ್ ಹಾಕಿದ್ರೆ ಗೂಗಲ್ಲಿನ ಆ ಫೋಟೋಗಳೂ ಡಿಲಿಟ್ ಆಗುತ್ತಾ ಅಂತ ಕೆಲವರು ಅಂದುಕೊಂಡಿರಬಹುದು. ಆದರೆ ಹಾಗೇನೂ ಆಗೋಲ್ಲ. ಅವೆಲ್ಲಾ ಇರೋದು ಗೂಗಲ್ಲಿನ ಬೇರೊಂದು ಉತ್ಪನ್ನವಾದ ಗೂಗಲ್ ಫೋಟೋಸ್ ನಲ್ಲಿ. ಗೂಗಲ್ ಪ್ಲಸ್ಸಿನಲ್ಲಿ ನಿಮ್ಮದೊಂದು ಖಾತೆ ತೆಗೆದು ಅದರಲ್ಲೇ ನೇರವಾಗಿ ಅಪ್ಲೋಡ್ ಮಾಡಿರೋ ಫೋಟೋಗಳು ಆ ಅಕೌಂಟಿನಲ್ಲಿರುವ ಬೇರೆ ಮಾಹಿತಿಗಳಂತೆ ಏಪ್ರಿಲ್ ೨ರಂದು ಅಳಿಸಲ್ಪಡುತ್ತೆ. 

೨. ಗ್ರೂಪುಗಳು: 

ಇಲ್ಲಿರೋ ಗ್ರೂಪುಗಳೂ ಏಪ್ರಿಲ್ ೨ರಂದು ಅಳಿಸಲ್ಪಡುತ್ತೆ. ಆದರೆ ಇದರಲ್ಲಿರೋ ಗ್ರೂಪಿನಲ್ಲಿ ಸುಮಾರು ಮುಖ್ಯ ಇಮೇಲ್ ಐಡಿಗಳೆಲ್ಲಾ ಇದ್ವು. ಅದನ್ನೆಲ್ಲಾ ಏನು ಮಾಡೋದಪ್ಪ ಅಂತ ತಲೆಕೊಡಿಸಿಕೊಂಡಿದ್ದೀರಾ ? ಗೂಗಲ್ಲಿನವರ ಪ್ರಕಾರ ಅದಕ್ಕೆ ತಲೆಕೆಡಿಸಿಕೊಳ್ಳೋ ಆಗತ್ಯವಿಲ್ಲಾ. ಎಲ್ಲಾ ಗ್ರೂಪಿನ ಅಡ್ಮಿನ್ನು ಮತ್ತು ಮಾಡರೇಟರುಗಳಿಗೆ ಗುಂಪಿನ ಮಾಹಿತಿಯನ್ನು ಎಕ್ಸಪೋರ್ಟ್ ಮಾಡುವ ಸೌಲಭ್ಯ ಮಾರ್ಚಿನ ಮೊದಲ ವಾರದಿಂದ ಲಭಿಸಲಿದೆ. ಅದು ಎಂದಿನಿಂದ ಎಂದು ಹೇಳದಿದ್ದರೂ ಅದೂ ಮಾರ್ಚ್ ೨ಕ್ಕೇ ಶುರುವಾಗಬಹುದು ಎಂಬುದು ಹಲವರ ಅಂದಾಜು !

೩. ಬ್ಲಾಗರ್: 

ಕನ್ನಡದ ಮಟ್ಟಿಗೆ ಅತೀ ಹೆಚ್ಚು ಅಂತರ್ಜಾಲದ ಬ್ಲಾಗರ್ರುಗಳಿರೋದು ಗೂಗಲ್ಲಿನ ಬ್ಲಾಗರ್ ಮತ್ತು ಪ್ರತಿಸ್ಪರ್ಧಿಯಾದ ವರ್ಲ್ ಪ್ರೆಸ್ಸಿನಲ್ಲಿ. ನೀವು ಈ ಬ್ಲಾಗುಗಳನ್ನ ಓದುತ್ತಿದ್ರೆ , ಮತ್ತು ಅಂತರ್ಜಾಲದ ಹಲವು ತಾಣಗಳನ್ನು ಓದುತ್ತಿದ್ರೆ ಅವುಗಳ ಪ್ರತೀ ಪೋಸ್ಟಿನ ಕೆಳಗೆ ಕಮೆಂಟ್/ಪ್ರತಿಕ್ರಿಯೆ ಎಂಬ ಆಯ್ಜೆಯಿರೋದನ್ನ ನೋಡಿರುತ್ತೀರಿ. ಅಲ್ಲಿ ಕಾಮೆಂಟ್ ಮಾಡಿದವರು ಯಾರು ಎಂಬುದನ್ನು ತಿಳಿಸೋಕೆ ಹಲವು ಆಯ್ಕೆಗಳಿರುತ್ತೆ. ಅಂದರೆ ಅಲ್ಲಿ ನಿಮ್ಮ ಫೇಸ್ಬುಕ್ ಐಡಿಯ ಮೂಲಕ ಕಾಮೆಂಟ್ ಮಾಡಬಹುದು. ಅಥವಾ ಗೂಗಲ್ ಪ್ಲಸ್ಸಿನ ಮೂಲಕ ಮಾಡಬಹುದು. ಇದೇ ತರಹ ಹಲವು ಆಯ್ಕೆಗಳಿರುತ್ತೆ. ಬ್ಲಾಗರ್ರುಗಳಿಗೆ ಈ ಗೂಗಲ್ ಪ್ಲಸ್ಸಿನ ಆಯ್ಕೆ ಫೆಬ್ರವರಿ ನಾಲ್ಕರಿಂದ ಮತ್ತು ಬೇರೆ ತಾಣಗಳಿಗೆ ಮಾರ್ಚ್ ಏಳರಿಂದ  ಕಾಣೆಯಾಗುತ್ತೆ ! ನಿಮ್ಮದೇ ಆದ ಬ್ಲಾಗಿದ್ದರೆ ಆ ಬ್ಲಾಗಿನಲ್ಲಿ ಈ ಹಿಂದೆ ಗೂಗಲ್ ಪ್ಲಸ್ಸಿನ ಮೂಲಕ ಮಾಡಿದ ಕಾಮೆಂಟುಗಳೂ ಗೂಗಲ್ ಪ್ಲಸ್ಸಿನ ಬಾಗಿಲು ಹಾಕೋ ದಿನ ಅಂದರೆ ಏಪ್ರಿಲ್ ಎರಡರಂದು ಅಳಿಸಲ್ಪಡುತ್ತೆ ಅನ್ನುತ್ತೆ ಗೂಗಲ್ಲು ! ಹಾಗಾಗಿ ನೀವೊಬ್ಬ ಬ್ಲಾಗಿಗರಾಗಿದ್ದು ಅದಕ್ಕೆ ಬಂದಿದ್ದ ಹೆಚ್ಚಿನ ಕಮೆಂಟುಗಳು ಗೂಗಲ್ ಪ್ಲಸ್ಸಿನಿಂದಲೇ ಆಗಿದ್ದರೆ ಇದು ನಿಮ್ಮ ಪಾಲಿಗೆ ದೊಡ್ಡ ಹೊಡೆತವೇ ಸರಿ !

೪. ಉಳಿದೆಡೆ: 

ಹಾಗಂತ ಎಲ್ಲೆಲ್ಲಿ ಗೂಗಲ್ ಪ್ಲಸ್ ಬಳಸಲ್ಪಡುತ್ತಿತ್ತೋ ಅಲ್ಲೆಲ್ಲಾ ಬಾಗಿಲು ಹಾಕಲಾಗಿದೆ ಅಂತಲ್ಲ. ನೀವು ಗೂಗಲ್ಲಿನ ಮತ್ತೊಂದು ಉತ್ಪನ್ನವಾದ ಜಿ-ಸೂಟನ್ನು ಬಳಸುತ್ತಿದ್ರೆ ಅದರಲ್ಲಿ ಮುಂದೆಯೂ ಗೂಗಲ್ ಪ್ಲಸ್ಸನ್ನು ಬಳಸಬಹುದೆಂದೂ , ಗೂಗಲ್ ಪ್ಲಸ್ಸಿನ್ ಡೆವಲಪರಾಗಿದ್ರೆ ಅಲ್ಲೂ ಸ್ವಲ್ಪ ಬದಲಾವಣೆಗಳು ಬೇಕಾದ ಹೊರತು ಬೇರೆ ಚಿಂತೆಯಿಲ್ಲವೆಂದು ಗೂಗಲ್ ತಿಳಿಸಿರೋದ್ರಿಂದ ಜನಸಾಮಾನ್ಯರ ಪಾಲಿಗೆ ಗೂಗಲ್ ಪ್ಲಸ್ ಮರೆಯಾದ್ರೂ ತೆರೆಮರೆಯಲ್ಲಿ ಅದು ಕಾರ್ಯ ನಿರ್ವಹಿಸುತ್ತಲೇ ಇರುತ್ತದೆ ಎಂದು ತಿಳಿದುಬರುತ್ತೆ. 

ಮುಂದೇನು ? 

ಆರ್ಕುಟ್ ಹೋಯ್ತು ಗೂಗಲ್ ಪ್ಲಸ್ ಬಂತು ಡುಂ ಡುಂ ಡುಂ. .. ಎಂದು ಹೇಳುತ್ತಿದ್ದ ಜನರಿಗೆ ಗೂಗಲ್ ಪ್ಲಸ್ ಹೋಯ್ತು.. ಮತ್ತೊಂದು ಬಂತು ಎನ್ನೋಕೆ ಆ ಮತ್ತೊಂದು ಯಾವುದು ಎಂದು ಹೇಳೋಕೆ ಗೂಗಲ್ ಯಾವ ಆಯ್ಕೆಯನ್ನೂ ನೀಡಿಲ್ಲ ಸದ್ಯದ ಮಟ್ಟಿಗೆಂತೂ. ಹಾಗಾಗಿ ಇಷ್ಟವಿದ್ದರೂ , ಇಲ್ಲದಿದ್ದರೂ ಫೇಸ್ಬುಕ್ಕಿನ ಪ್ರಾಬಲ್ಯ ಇನ್ನೂ ಹೆಚ್ಚಾಗೋ ಸಾಧ್ಯತೆಯಿದೆ. ವಿಶ್ವದ ಹಲವು ದೇಶಗಳಲ್ಲಿ ಬೇರೆ ಬೇರೆ ಜಾಲತಾಣಗಳಿದ್ದರೂ ಅವ್ಯಾವದೂ ಭಾರತದಲ್ಲಿ ಫೇಸ್ಬುಕ್ ಹೊಕ್ಕಿರುವಷ್ಟು ಹೊಕ್ಕಿಲ್ಲ. ಹಾಗಾಗಿ ಗೂಗಲ್ ಪ್ಲಸ್ಸಿನ ನಿರ್ಗಮನದಿಂದ ಖಾಲಿಯಾಗೋ ಜಾಗವನ್ನು ತುಂಬೋರು ಯಾರು ಎಂಬ ಪ್ರಶ್ನೆಗೆ ಕಾಲವೇ ಉತ್ತರಿಸಬೇಕು. 

ನಾ ನೋಡಿದ ಸಿನೆಮಾ ಕೆ.ಜಿ.ಎಫ್

ಇಲ್ಲಿಯವರೆಗೆ ಬಂದ ಯಾವ ಚಿತ್ರವನ್ನೂ ನಾನು ಮೊದಲ ದಿನವೇ ನೋಡಿರಲಿಲ್ಲ. ಆ ದಾಖಲೆ ಮುರಿಯಬೇಕು ಅಂತ ಈ ಸಲ ಚಿತ್ರವೊಂದನ್ನು ಸುಮಾರು ದಿನ ಮುಂಚೆಯೇ ಅಂತರ್ಜಾಲದಲ್ಲಿ ಬುಕ್ ಮಾಡಿದ್ದೆ. ಆದರೆ ಚಿತ್ರದ ದಿನ ಹತ್ತಿರ ಬಂದಂತೆ ಅದರ ಪ್ರದರ್ಶನಕ್ಕೆ ಕೋರ್ಟ್ ತಡೆಯಾಜ್ಞೆ ಕೊಟ್ಟಿದೆಯಂತೆ ಅನ್ನೋ ಸುದ್ದಿಯಿಂದ ಸ್ವಲ್ಪ ಬೇಸರವಾಗಿತ್ತು. ನಿನ್ನೆ ಬೆಳಗ್ಗೆ ಆ ಚಿತ್ರಕ್ಕೆ ಹೋದ ಗೆಳೆಯರು ಅದರ ಬಗ್ಗೆ ಬರೆದಾಗಲೇ ಸ್ವಲ್ಪ ಸಮಾಧಾನವಾಗಿತ್ತು.ಆದರೂ ಆಮೇಲೇನಾದ್ರೂ ಆದ್ರೆ ಅನ್ನೋ ಪುಕುಪುಕು. ಏನಾದ್ರೂ ಆಗಲಿ ಅಂತ ಮೊದಲ ದಿನ ನೋಡದ ದಾಖಲೆ ಮುರಿಯೋಕೆ ಚಿತ್ರಮಂದಿರಕ್ಕೆ ಹೋಗಿದ್ದೆ. ನೋಡಿದ ಚಿತ್ರವೂ ಸುಮಾರು ದಾಖಲೆಗಳ ಮುರಿಯೋ ನಿರೀಕ್ಷೆ ಹುಟ್ಟಿಸಿದ್ದು ಸುಳ್ಳಲ್ಲ.


ಕಳೆದ ಕೆಲವು ವರ್ಷಗಳ ಹಿಂದೆ ಮೊಬೈಲುಗಳಲ್ಲಿ ಬಂದ ಸ್ಲೋ ಮೋಷನ್ ಫೋಟೋ ಅನ್ನೋ ಮೋಡ್ ಸಖತ್ ಖುಷಿ ಕೊಟ್ಟಿತ್ತು. ಜಲಪಾತವೊಂದರ ಕೆಳಗೆ ನಿಂತು ತೆಗೆದಾಗ ಅದರ ಪ್ರತಿ ಹನಿಯೂ ನಿಧಾನವಾಗಿ ಬೀಳುವಂತೆ ತೆಗೆಯೋದು, ನೀರಿಗೆ ಕಲ್ಲೆಸೆದಾಗ ಅದರಲ್ಲಿ ಮೂಡೋ ತರಂಗಗಳ ತೆಗೆಯೋದು, ಮರಳ ಮೇಲೆ ಬೈಕ ಚಕ್ರಗಳನ್ನು ಸಡನ್ನಾಗಿ ತಿರುಗಿಸಿದಾಗ ಹಾರೋ ಮರಳ ಪ್ರತೀ ಕಣಗಳ ಚಲನೆಯನ್ನು ತೆಗೆಯೋದು ಅದ್ಭುತ ಅನಿಸುತ್ತಿತ್ತು. ಆದರೆ ಈ ತರಹದ್ದೇ ಅದ್ಭುತ ಅನುಭವಗಳ ಚಲನಚಿತ್ರವೊಂದು ಕಟ್ಟಿಕೊಟ್ಟರೆ ? ಇಂಗ್ಲೀಷಿನ ಫ್ಲ್ಯಾಷ್ ಅನ್ನೋ ಧಾರಾವಾಹಿಯನ್ನೋ ಅಥವಾ ಜಸ್ಟೀಸ್ ಲೀಗ್ ಅನ್ನೋ ಚಲನಚಿತ್ರವನ್ನೋ ನೋಡಿದ್ದಿದ್ರೆ ಅದರಲ್ಲಿ ಸಖತ್ ವೇಗವಾಗಿ ಓಡೋದನ್ನ ಸ್ಲೋ ಮೋಷನ್ನಲ್ಲಿ ತೋರಿಸಿದ್ರೆ ಹೇಗಿರುತ್ತೆ ಅನ್ನೋದನ್ನ ಕಟ್ಟಿ ಕೊಡೋ ಪ್ರಯತ್ನವಿದೆ. ಬಾಹುಬಲಿಯಂತ ಚಿತ್ರಗಳಲ್ಲಿ ಕೂಡ ಈ ತರದ ಪ್ರಯತ್ನಗಳ ಮಾಡಿದ್ದರೂ ಕೂಡ ಅದು  ವಿಎಫೆಕ್ಸ್ ಎಫೆಕ್ಟುಗಳು ಅಂತ ಆರಾಮಾಗಿ ಗೊತ್ತಾಗಿಬಿಡುತ್ತೆ. ಅತ್ಯಂತ ಸಹಜವಾಗಿ ಕಾಣುವಂತಹ ನಾಯಕ ನೆಲಕ್ಕೆ ತುಳಿದಾಗ ಏಳೋ ಧೂಳ ಕಣಗಳು, ನೀರಿನಿಂದ ಎದ್ದಾಗ ಚಿಮ್ಮೋ ನೀರ ರಾಶಿ, ರಾಕಿ ಗರುಡನನ್ನು ಕೊಲ್ಲೋಕೆ ಅಂತ ನೀರಿನಿಂದ ತೆಗೆಯೋ ಆಯುಧದ ಸಂಚಾರ ... ಉಫ್ ಹೇಳಹೋದ್ರೆ ಚಿತ್ರದ ತುಂಬೆಲ್ಲಾ ರಾರಾಜಿಸೋ ಸ್ಲೋ ಮೋಷನ್ ದೃಶ್ಯಗಳೇ ನೋಡಿಸಿಕೊಂಡು ಹೋಗುತ್ತೆ ನಿನ್ನೆ ತೆರೆಕಂಡ ಕೆ.ಜಿ.ಎಫ್ ಸಿನೆಮಾವನ್ನು.

೧೯೫೫, ೭೦ರ ದಶಕ, ೮೧ರ ದೃಶ್ಯಗಳನ್ನ ತೆಗೆಯುವಾಗ ತುಂಬಾ ಜಾಗರೂಕತೆಯಿಂದ ತೆಗೆದಿದ್ದಾರೆ ಅಂತ ಚಿತ್ರದ ಚಿತ್ರೀಕರಣದ ಸಂದರ್ಭದಲ್ಲಿ ಓದಿದ್ದೆ. ದೃಶ್ಯವೊಂದರಲ್ಲಿ ಬರೋ ಬೆಂಕಿಪೊಟ್ಟಣ ಕೂಡ ಆ ಕಾಲದ್ದೇ ಬೇಕು ಅಂತ ಗಮನವಹಿಸಿದ್ರು ಅಂತಲೂ ಓದಿದ್ದೆ. ಆಗಿನ ಕಾಲದಲ್ಲಿರುತ್ತಿದ್ದಂತಹ ಪ್ಯಾಂಟುಗಳು, ನಾಯಕಿ ಹಣೆಗೆ ಹಾಕಿಕೊಳ್ಳೋ ಪಟ್ಟಿ, ಆಗಿನ ಕಾಲದಲ್ಲಿರುವಂತಹ ಕ್ಯಾಬರೆಗಳು ಚಿತ್ರ ನಿರ್ಮಾಣದಲ್ಲಿನ ಶ್ರದ್ಧೆಯನ್ನು ತೋರಿಸುತ್ತೆ. ಆದರೆ ಇಷ್ಟೆಲ್ಲಾ ಗಮನವಹಿಸಿದ್ರೂ ಇಷ್ಟು ಸಣ್ಣ
ವಿಷಯ ಹೆಂಗೆ ಮಿಸ್ಸಾಯ್ತು ಅಂತಲೂ ಕೆಲವು ಕಡೆ ಅನಿಸುತ್ತೆ. ಉದಾಹರಣೆಗೆ: ಕೋಲಾರದ ಒಂದು ಗಣಿ. ಅಲ್ಲಿರೋ ಜನರ ಮೈಯೆಲ್ಲಾ ಧೂಳೇ ಧೂಳಾಗಿದೆ. ಎಲ್ಲಿ ನೋಡಿದ್ರೂ ಧೂಳು ಹಾರ್ತಾ ಇದೆ. ಅವರನ್ನು ಕಾಯೋಕೆ ಅಂತ ಕ್ರೂರವಾಗಿ ಕಾಣಿಸೋ ಕಾವಲುಗಾರರಿದ್ದಾರೆ. ಅವರಲ್ಲಿ ಕೆಲವರು ಧೂಳ ಮಧ್ಯೆ ಅಂಗಿ ಬಿಚ್ಚಿಕೊಂಡೂ ಇದ್ದಾರೆ.ಆದರೆ ಈ ಕಾವಲುಗಾರರ ಮೈಮೇಲೆ ಒಂಚೂರೂ ಧೂಳಿಲ್ಲ !

ಕಲಾತ್ಮಕ ಸಿನಿಮಾಟೋಗ್ರಾಫರ್ ಒಬ್ಬರಿಗೆ ಆಕ್ಟನ್ ಚಿತ್ರವನ್ನು ಚಿತ್ರಿಸೋಕೆ ಕೊಟ್ಟರೆ ಹೇಗಿರುತ್ತೋ ಹಾಗಿದೆ ಕೆ.ಜಿ.ಎಫ್. ನಾಯಕ ಗರುಡನ ಜನರೊಂದಿಗೆ ಹೋರಾಡುತ್ತಿರ್ತಾನೆ. ಆಗ ಹಿಮ್ಮೇಳದಲ್ಲಿ ಸೂರ್ಯಾಸ್ತದ ದೃಶ್ಯ ! ಕತ್ತಲ ಗುಹೆಗಳಲ್ಲಿ  ಪಂಜು, ಕಾದ ರಾಡುಗಳಿಂದ ನಡೆಯುವ ಹೊಡೆದಾಟದಲ್ಲಿ ನಂದಿಹೋಗೋ ಬೆಳಕುಗಳ ನಡುವಿನ ಸ್ಲೋಮೋಷನ್ ಚಿತ್ರಣ, ಗಣಿಗಳಲ್ಲಿನ ಬೈಕ್ ರೇಸು , ಮಾರಿಕಾಂಬಾ ಜಾತ್ರೆಯಲ್ಲಿನ ದೀಪಗಳ ಚಿತ್ರಣ, ದೀಪ, ಪಂಜು ಹೊತ್ತು ನಡೆಯುತ್ತಿರೋ ಜನರನ್ನು ಮೇಲಿಂದ ತೆಗೆವ ಬಂಗಾರದ ಎಳೆಯಂತಹ ಚಿತ್ರಣ ಇವೆಲ್ಲಾ ನೋಡಿಸಿಕೊಂಡು ಹೋಗುತ್ತೆ. ಚಿತ್ರದ ಕ್ಲೈಮಾಕ್ಸಿನಲ್ಲಿ ಬರೋ ಮಾರಿ ಜಾತ್ರೆಯ ಚಿತ್ರಣ ಅನೇಕ ರೀತಿಯಲ್ಲಿ ಮುಖ್ಯವೆನಿಸೋದ್ರಿಂದ ಅದನ್ನು ಸಾಕಷ್ಟು ಅದ್ಧೂರಿಯಾಗೇ ತೋರಿಸಲಾಗಿದೆ.

ಯಾರೋ ಹತ್ತು ಜನನ್ನು ಹೊಡೆದು ಡಾನ್ ಆನ್ನಿಸ್ಕೊಂಡಂಗಲ್ಲ ಅನ್ನೋ ಟಾಂಟಿಗೆ, ನಾನು ಯಾರೋ ಹತ್ತು ಜನನ್ನ ಹೊಡೆದಿದ್ದಲ್ಲ ಕಣೋ, ಹೊಡೆದ ಹತ್ತು ಜನಾನೂ ಡಾನ್ಗಳೇ ಅನ್ನೋ ಉತ್ತರ; ನಿನ್ನ ಹಿಂದೆ ಸಾವಿರ ಜನ ಇದ್ದಾರೆ ಅಂತ ನಿನಗೆ ಧೈರ್ಯ ಇದ್ದರೆ ಒಂದು ಯುದ್ಢ ಗೆಲ್ಲಬಹುದು. ಆದರೆ ನೀ ಮುಂದೆ ಇದೀಯ ಅಂತ ಸಾವಿರ ಜನಕ್ಕೆ ನಿನ್ನ ಹಿಂದೆ ನಿಲ್ಲೋಕೆ ಧೈರ್ಯ ಬಂದರೆ ಪ್ರಪಂಚಾನೇ ಗೆಲ್ಲಬಹುದು ಎನ್ನೋ ಡೈಲಾಗುಗಳು, ಅಲ್ಲಲ್ಲಿ ಒಳಸುಳಿವ ಭಾವನೆಗಳು, ಆಗಾಗ ಬರೋ ಹಾಡ ಎಳೆಗಳೂ ಭರ್ಜರಿಯಾಗೇ ಇದೆ. ಕಾಫಿ ತರೋನ ಕಾಮಿಡಿ ಮಧ್ಯ ಮಧ್ಯ ಸ್ವಲ್ಪ ಬಿಡುವು ಕೊಟ್ರೂ ಚಿತ್ರದ ರೌದ್ರ ರಸಾನುಭವಕ್ಕೆ ಎಲ್ಲೂ ಅಡ್ಡಿಯಾಗೋಲ್ಲ.

ಇವೆಲ್ಲಾ ಬೇಡಪ್ಪ, ಸುಮ್ಮನೇ ಟೈಂಪಾಸಿಗೆ ಹೋಗ್ತೀನಿ ಚಿತ್ರ ನೋಡೋಕೆ. ಹೋಗ್ಬೋದಾ ಅಂದ್ರೆ ಧಾರಾಳವಾಗಿ ! ಫೈಟಿಂಗ್ ಅಂದ ಮಾತ್ರಕ್ಕೆ ವಿಕೃತ ಹಿಂಸೆಯನ್ನೋ, ಲಾಜಿಕ್ಕಿಲ್ಲದ ತೆಲುಗು ಚಿತ್ರಗಳಲ್ಲಿರುವಂತಹ ನಾಯಕ ಒದ್ದರೆ ಜೀಪು ತಿರುಗಿ ನಿಲ್ಲುವಂತಹ  ಅಸಂಬದ್ಧಗಳನ್ನೋ ತೋರಿಸಬೇಕು ಅನ್ನೋ ಅನೇಕ ಕನ್ನಡ ನಿರ್ದೇಶಕರ ಭ್ರಮೆಗೆ ಇವರು ಒಳಗಾಗದೇ ಇರೋದು ಕನ್ನಡಿಗರ ಪುಣ್ಯ ಎಂದುಕೊಳ್ಳಬೇಕೇನೋ. ಉದಾಹರಣೆಗೆ ಸುತ್ತಿಗೆ ತೆಗೆದು ಹೊಡೆಯೋ ದೃಶ್ಯವೊಂದು ಬರುತ್ತೆ. ಆದರೆ ಆ ಸುತ್ತಿಗೆ ಎತ್ತಿದ್ದು ಬರುತ್ತೆಯೇ ಹೊರತು ಅದು ತಲೆಗೆ ಬಿದ್ದ ದೃಶ್ಯ ಬರೋಲ್ಲ ! ಹಾಗಾಗಿ ಕುಟುಂಬದವರೊಂದಿಗೂ ಆರಾಮಾಗಿ ನೋಡಬಹುದಾದ ಚಿತ್ರ ಇದು ಅನ್ನಬಹುದೇನೋ. ಯಶ್, ತಮನ್ನಾ, ಶ್ರೀನಿಧಿ ಶೆಟ್ಟಿ, ಅನಂತನಾಗ್, ಮಾಳವಿಕಾ ಅವಿನಾಶ್ ಮುಂತಾದ ತಾರಾಗಣವಿರುವ ಇದರಲ್ಲಿ ನಾಯಕನ ಹೀರೋಯಿಸಂ ತೋರಿಸೋಕೆ ಅಂತ ಅನೇಕ ಕಡೆಗಳಲ್ಲಿ ಎಲ್ಲಾ ಚಿತ್ರಗಳಲ್ಲಿ ಇರುವಂತಹ ಪ್ರಯತ್ನಗಳಿದ್ದರೂ ಚಿತ್ರಕಥೆಯ ಓಘದಿಂದ ಮತ್ತು ಛಾಯಾಗ್ರಾಹಣದ ವೈಭವದಿಂದ ಚಿತ್ರ ಎಲ್ಲೂ ಬೋರ್ ಹೊಡೆಸದೇ ನೋಡಿಸಿಕೊಂಡು ಹೋಗುತ್ತೆ.

Marriage , Reception and Book Release Invitation , ಮದುವೆ, ಆರತಕ್ಷತೆ ಮತ್ತು ಪುಸ್ತಕ ಬಿಡುಗಡೆಯ ಕರೆಯೋಲೆ

Dear Friends, 

As you might be already aware, I am getting married with Akshata on Nov 2nd and here is the wedding invite if you did not get it already . Please consider this as my personal invitation and bless us on the occasion. 

ಆತ್ಮೀಯ ಗೆಳೆಯರೇ, 

ಮುಂಬರುವ ನವೆಂಬರ್ ಎರಡರಂದು ನಾನು ಮತ್ತು ಅಕ್ಷತಾ ಹೊಸ ಬಾಳ ಹಾದಿಯಲ್ಲಿ ಜೊತೆಯಾಗಲಿದ್ದೇವೆ. ಅಂದು ತಾವೆಲ್ಲರೂ ಆಗಮಿಸಿ ನಮ್ಮನ್ನು ಆಶೀರ್ವದಿಸಬೇಕಾಗಿ ಈ ಆತ್ಮೀಯ ಕರೆಯೋಲೆ.. 

Nov 3rd is a special day for me as well as i would be releasing my first book in Kannada by the name "Prashantavana" which is a collection of short stories and followed by the reception in the same venue. Location details are above. Front page of the book is given below. We would also like to invite you for the auspicious day  with a small video


ಮಾರನೆಯ ದಿನ ಅಂದರೆ ನವೆಂಬರ್ ಮೂರರಂದು ನನ್ನ ಕಥಾಸಂಕಲನ "ಪ್ರಶಾಂತವನ" ದ ಲೋಕಾರ್ಪಣೆಯೂ ನಡೆಯಲಿದೆ. ತಾವುಗಳು ಎರಡೂ ಕಾರ್ಯಕ್ರಮಗಳಿಗೆ ಆಗಮಿಸಿ ಅವುಗಳನ್ನು ಚೆಂದಗಾಣಿಸಿಕೊಡಬೇಕಾಗಿ ವಿನಂತಿ .. ಒಂದೊಮ್ಮೆ ಅನಿವಾರ್ಯ ಕಾರಣಗಳಿಂದ ಪುಸ್ತಕ ಬಿಡುಗಡೆಗೆ ಬರಲಾಗದಿದ್ದು, ಪ್ರತಿಗಳ ಕೊಳ್ಳುವ ಆಸೆಯಿದ್ದಲ್ಲಿ  ಕೆಳಗಿನ ಮಿಂಚೆಗೆ ನಿಮ್ಮ ವಿಳಾಸವನ್ನು ಕಳುಹಿಸಿ. ಪುಸ್ತಕದ ಮುಖಪುಟ ಕೆಳಗಿದೆ ಮತ್ತು ಕರೆಯೋಲೆಯ ವೀಡಿಯೋ ಕೊಂಡಿ ಇಲ್ಲಿದೆ
prashasti.p@gmail.com 

ಇಂತಿ,
ತಮ್ಮ ವಿಶ್ವಾಸಿ/ Regards
ಪ್ರಶಸ್ತಿ/Prashasti

ದೇಶದ ಪ್ರಗತಿಯಲ್ಲಿ ಸುದ್ದಿ ಮಾಧ್ಯಮಗಳ ಪಾತ್ರ

ಶತಮಾನಗಳ ಹಿಂದಿದ್ದಂತೆ ನಮ್ಮ ಮನೆಗೆ ಹೊರಗಿನಿಂದ ಯಾರಾದರೂ ಬಂದಾಗಲೋ ಅಥವಾ ಪೇಟೆಯಲ್ಲಿ ಕಂಡು ಕೇಳಿದ ವರ್ತಮಾನಗಳಿಂದಲೋ ದೇಶದಲ್ಲಿ, ಪ್ರಪಂಚದಲ್ಲಿ ಏನಾಗ್ತಿದೆ ಅಂತ ತಿಳಿದುಕೊಳ್ಳಬೇಕಾದ ಪರಿಸ್ಥಿತಿ ಇಂದಿಲ್ಲ. ಬೆಳಗಾದರೆ ಮನೆಬಾಗಿಲಿಗೆ ಬಂದು ಬೀಳೋ ಪೇಪರ್ರು, ಸ್ವಿಚ್ ಅದುಮಿದರೆ ಬಿತ್ತರಗೊಳ್ಳೋ ಟಿವಿ, ಎಡತಾಕಿದರೆ ಸಿಗೋ ಮೊಬೈಲಲ್ಲಿನ ಅಂತರ್ಜಾಲ ಮತ್ತು ಅದರ ಮೂಲಕ ತೆರೆದುಕೊಳ್ಳೋ ಸುದ್ದಿಗಳ ಅಗಾಧ ಸಾಧ್ಯತೆಗಳು, ಹಳ್ಳಿಗಳಲ್ಲಿ ಈಗಲೂ ಸಕ್ರಿಯವಾಗಿರೋ ರೇಡಿಯೋ ಸೆಟ್ಟುಗಳು ಮತ್ತು ಅವುಗಳ ವಿಸ್ತೃತ ಜಾಲ, ಹಾಡುಗಳಿಗೆ  ಸೀಮಿತವಾಗಿರದೇ ಮಾಹಿತಿಗಳ ಬಿತ್ತರಕ್ಕೂ ತಮ್ಮನ್ನು ತೆರೆದುಕೊಂಡ  ಎಫ್ ಎಂಗಳು, ಕಾಲಹರಣಕ್ಕೆ ಸೀಮಿತಗೊಳ್ಳದೇ ಮಾಹಿತಿಗಳ ಬಿತ್ತರಕ್ಕೂ ಉಪಯೋಗವಾಗುತ್ತಿರೋ ಸಾಮಾಜಿಕ ಮಾಧ್ಯಮಗಳಾದ ಟ್ವಿಟ್ಟರ್, ಫೇಸ್ಬುಕ್, ವಾಟ್ಸಾಪ್ಪುಗಳು.. ಹೀಗೆ ದಿನಬೆಳಗಾದರೆ , ಕಣ್ಣುಹಾಯಿಸಿದತ್ತೆಲ್ಲಾ ಸುದ್ದಿಗಳು  ತೆರೆದುಕೊಳ್ಳುತ್ತಾ ಸಾಗುತ್ತವೆ. ಸಾವಿರಾರು ಸುದ್ದಿಗಳೇನೋ ನಿತ್ಯ ನಮ್ಮ ತಲುಪುತ್ತಿರುತ್ತೆ. ಆದರೆ ಈ ರೀತಿಯ ಸುದ್ದಿಗಳಿಂದ ಮನೋರಂಜನೆ, ಸಮಯಹರಣಗಳಾಗೋದು ಮಾತ್ರವಾ ಅಥವಾ ದೇಶದ ಪ್ರಗತಿಗೂ ಅವು ಕಾಣಿಕೆ ನೀಡುತ್ತವಾ ಅನ್ನೋದು ಸದ್ಯದ ಪ್ರಶ್ನೆ. ಅದಕ್ಕೆ ಉತ್ತರಹುಡುಕುವತ್ತ ನಮ್ಮ ಪಯಣವನ್ನು ಮುಂದುವರೆಸೋಣ

ಬೆಳಬೆಳಗ್ಗೆ ಒಂದು ಫೋನ್ ಕಾಲ್. 

ಹಲೋ, .. ಇವರಾ ? ಹೌದು ನೀವ್ಯಾರು ? 

ನಾನು ... ... ಬ್ಯಾಂಕಿನ ಮ್ಯಾನೇಜರ್. 

ಹೌದಾ. ಹೇಳಿ ಸಾರ್. ನನ್ನಿಂದೇನಾಗಬೇಕಿತ್ತು ? 

... ಇವರೇ ನಿಮ್ಮ ಎಟಿಎಂ ಕಾರ್ಡಲ್ಲಿ ತಾಂತ್ರಿಕ ದೋಷವೊಂದಿದೆ. ಅದನ್ನು ಸರಿಪಡಿಸುತ್ತಿದ್ದೇವೆ. ಅದಕ್ಕಾಗಿ ನಿಮ್ಮ ಕಾರ್ಡಿನ ನಂಬರ್ ಮತ್ತೆ ಪಿನ್ ಹೇಳ್ತೀರಾ ? 

ಇಂತಹ ಕಾಲ್ ಬಂದಿದ್ದು ಹಳ್ಳಿಗರೊಬ್ಬರಿಗೆ. ಯಾರು ಮಾಡಿರಬಹುದು ? ಅವರು ಕೇಳಿದ ಮಾಹಿತಿ ಕೊಟ್ಟರೆ ಏನಾಗಬಹುದು ? ಅಂತಲೂ ಅರಿಯದ ಮುಗ್ದರವರು. ಸರಿ ಅಂತ ಕೊಟ್ಟ ಅವರಿಗೆ ಐದು ನಿಮಿಷಗಳಲ್ಲೇ ಶಾಕ್ ಕಾದಿತ್ತು. ಪ್ರತೀ ಸಲ ಹತ್ತು ಸಾವಿರ ಅಂತ ಐವತ್ತು ಸಾವಿರ ಮುಂದಿನ ಮೂವತ್ತು ನಿಮಿಷಗಳಲ್ಲಿ ಅವರ ಖಾತೆಯಿಂದ ತೆಗೆಯಲ್ಪಟ್ಟಿತ್ತು ! ಈ ತರಹ ಎಷ್ಟು ಜನಕ್ಕೆ ಕಾಲ್ ಬಂದಿರಬಹುದು ? ಫೇಕ್ ಕಾಲ್ ಅಂತ ಗೊತ್ತಿರೋರಾದರೆ ಅದನ್ನು ಕಟ್ ಮಾಡಿರಲೂ ಬಹುದು. ಆದರೆ ಆದದ್ದಾಯಿತು. ಮುಂದೇನು ? ದುಡ್ಡು ಕಳೆದುಕೊಂಡವರು ಬ್ಯಾಂಕಿಗೆ ಹೋಗಿ ದೂರು ಕೊಟ್ಟರೂ ಏನೂ ಪ್ರಯೋಜನವಾಗಲಿಲ್ಲ. ಹೋದ ದುಡ್ಡು ಹೋಯಿತು.ಅದಕ್ಕೆ ಏನೂ ಮಾಡೋಕಾಗೋಲ್ಲ ಅನ್ನೋ ಬೇಜವಾಬ್ದಾರಿ ಉತ್ತರ  ಬ್ಯಾಂಕಿನವರಿಂದ !. ಯಾರೋ ಕಾಲ್ ಮಾಡಿದವರಿಗೆ ಇವರ ನಂಬರ್ ಸಿಕ್ಕಿದ್ದು ಹೇಗೆ ? ಕಾರ್ಡ್ ಇವರ ಬಳಿಯೇ ಇದ್ದರೂ ಇವರ ನಂಬರ್ ಪಡೆದು ಐದು ಸಲ ಇಂಟರ್ನೆಟ್ ಇಂದ ದುಡ್ಡು ತೆಗೆದದ್ದಾದರೂ ಹೇಗೆ ಅನ್ನೋ ಪ್ರಶ್ನೆಗಳಿಗೆ ಉತ್ತರ ಸಿಗಲಿಲ್ಲ. ದಿಕ್ಕೇ ತೋಚದಂತೆ ಕೂತಿದ್ದ ಅವರ ನೆರವಿಗೆ ಬಂದದ್ದು ಸುದ್ದಿ ಮಾಧ್ಯಮಗಳು. ಪೇಪರ್ರಲ್ಲಿ ಈ ಸುದ್ದಿ ಬಂದದ್ದೇ ತಡ ... ಬ್ಯಾಂಕಿನವರು ಜಾಗೃತರಾದರು.  ಬ್ಯಾಂಕಿನ ಮಾಹಿತಿಗಳನ್ನು ಹ್ಯಾಕರ್ಗಳು ದುರುಪಯೋಗ ಪಡಿಸಿಕೊಳ್ಳುತ್ತಿರುವ ಬಗ್ಗೆ, ಈ ತರಹ ಹೊರಗಡೆಯಿಂದ ದುಡ್ಡು ತೆಗೆಯೋಕೆ ಹೋದರೂ ಇಂಟರ್ನೆಟ್ ಬ್ಯಾಂಕಿಂಗ್ ಪೇಮೆಂಟ್ ಗೇಟ್ ವೇ ಗೆ ಯಾವ ಅನುಮಾನಗಳೂ ಬಾರದೇ, ಮೊಬೈಲ್ ಓಟಿಪಿಯನ್ನೂ ಕೇಳದೇ ಐದೈದು ಸಲ ದುಡ್ಡು ತೆಗೆದದ್ದಾರೂ ಹೇಗೆ ? ಕಾರ್ಡ್ ಇವರ ಬಳಿಯೇ ಇರುವ ಕಾರಣ ಎಲ್ಲೂ ಸ್ವೈಪ್ ಮಾಡಲೆಂತೂ ಸಾಧ್ಯವಿಲ್ಲ. ಹಾಗಾಗಿ ಇವರ ದುಡ್ಡು ಹೊಡೆದ ವ್ಯವಸ್ಥಿತ ಜಾಲವನ್ನು ಭೇದಿಸಿ ಮುಂದೆ ಇಂತಹ ಮೋಸಗಳಾಗದಂತೆ ತೆಡೆಯೋ  ಕೆಲಸ ಬ್ಯಾಂಕು ಮತ್ತು ಸೈಬರ್ ಸುರಕ್ಷತೆಯವರಿಂದ ನಡೆಯುತ್ತಿದೆ ಅಂತ ನಂತರ ವರದಿ ಬಂತು. ಒಬ್ಬನೇ ವ್ಯಕ್ತಿ ತನಗಾದ ಮೋಸದ ಬಗ್ಗೆ ಅಳುತ್ತಾ ಕೂತಿದ್ದರೆ ಏನೂ ಆಗುತ್ತಿರಲಿಲ್ಲ. ಸುದ್ಧಿ ಮಾಧ್ಯಮಗಳು ನೆರವಿಗೆ ಬಂದದ್ದೇ ತಡ, ಎಷ್ಟೆಲ್ಲಾ ಬದವಾವಣೆಗಳು ಶುರುವಾದವು ನೋಡಿ. ಈ ತರಹದ ಕಾಲ್ ಬರುತ್ತೆ , ಎತ್ತಲೇ ಬೇಡಿ ಅಂತ ವಾಟ್ಸಾಪಿನ ಎಲ್ಲಾ ಗ್ರೂಪುಗಳಲ್ಲಿ ತುಂಬಾ ಸಮಯದ ಹಿಂದಿನಿಂದಲೇ ಮಾಹಿತಿ ಹರಿದಾಡುತ್ತಿತ್ತು. ಈ ವಾಟ್ಸಾಪು, ಸುದ್ಧಿ ಮಾಧ್ಯಮಗಳಿರಲಿಲ್ಲ ಅಂದರೆ ಇಂತಹ ಸುದ್ಧಿಗಳು ಜನರಿಗೆ ತಲುಪೋದಾದರೂ ಹೇಗೆ ? ದೇಶದ ಅರ್ಥವ್ಯವಸ್ಥೆಯ ಆಧಾರಸ್ಥಂಭಗಳಾದ ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ತ್ವರಿತಗತಿಯ ಬದಲಾವಣೆಗಳು ಆಗೋದಾದರೂ ಹೇಗೆ ? 

ಕೃಷಿ: 

ಏಟಿ, ಬಿಟಿ, ಸರ್ಕಾರಿ ನೌಕರಿ, ಖಾಸಗಿ ನೌಕರಿ ಅಂತ ಹತ್ತು ಹಲವು ಉದ್ಯೋಗಾವಕಾಶಗಳು ದಿನನಿತ್ಯ ತೆರೆದುಕೊಳ್ಳುತ್ತಿದ್ದರೂ ಭಾರತದಲ್ಲಿ ಇಂದಿಗೂ ಅರವತ್ತು ಪ್ರತಿಶತಕ್ಕಿಂತಲೂ ಹೆಚ್ಚು ಜನರ ಜೀವನ ಪ್ರತ್ಯೇಕ ಪರೋಕ್ಷವಾಗಿ ಕೃಷಿಯ ಮೇಲೆ ಅವಲಂಭಿತವಾಗಿದೆ ಅಂದರೆ ನಂಬುತ್ತೀರಾ ? ಅದೆಂಗೆ ಅಂದಿರಾ ? ಹೊಲದಲ್ಲಿ ನೇರವಾಗಿ ಬೆಳೆ ಬೆಳೆಯೋನು ರೈತ. ಆದರೆ ಅವನೊಬ್ಬನೇ ಎಲ್ಲವನ್ನೂ ಮಾಡಲಾದೀತೇ ? ಬೆಳೆಯೋಕೆ ಗೊಬ್ಬರ, ಬಿತ್ತನೆ ಬೀಜ, ರಾಸಾಯನಿಕ, ಯಂತ್ರಗಳು ಬೇಡವೇ ? ಬೆಳೆದದ್ದನ್ನು ಪೇಟೆಗೆ ತರಲು, ಅಲ್ಲಿ ಸಂಗ್ರಹಿಸಿಡಲು, ಅದನ್ನು ತಿನ್ನುವ ಪ್ರತೀ ಗ್ರಾಹಕನವರೆಗೆ ತಲುಪಿಸಲು.. ಹೀಗೆ ಪ್ರತಿಯೊಂದರಲ್ಲೂ ಸಾವಿರಾರು ಹಲವು ವರ್ಗದವರು ಬಂದು ಸೇರಿಕೊಳ್ಳುತ್ತಾರೆ. ಈಗ ಕೃಷಿಯೇ ಇಲ್ಲವೆಂದರೆ ಇವರೆಲ್ಲರ ಬದುಕು ಮೂರಾಬಟ್ಟೆಯಾಗಬಹುದು. ಸರಿ, ಕೃಷಿಯಿಂದ ಬರುವ ಆದಾಯದಿಂದ ದೇಶದ ಪ್ರಗತಿಗೆ ಸಹಾಯಕ ಅಂದುಕೊಂಡರೂ ಅದಕ್ಕೂ ಸುದ್ಧಿ ಮಾಧ್ಯಮಗಳಿಗೂ ಏನು ಸಂಬಂಧ ಅನ್ನುತ್ತೀರಾ ? ಇದೆ ಸ್ವಾಮಿ. ಭಾರತದಲ್ಲೆಂತೂ ಅವು ಬಹುದೊಡ್ಡ ಪಾತ್ರ ವಹಿಸುತ್ತಿದೆ. ಮಳೆ ನಕ್ಷತ್ರಗಳ ಮೇಲೆ ನಂಬಿಕೆಯಿಟ್ಟು ಬೇಸಾಯದ ಹಲವು ಋತುಗಳನ್ನು ಹಿರಿಯರು ನಿರ್ಧರಿಸುತ್ತಿದ್ದರು. ಆದರೆ ಈಗ ಭೂತಾಪ ಹೆಚ್ಚಳದ ಕಾರಣದಿಂದ ಋತುಗಳು ಬದಲಾಗುತ್ತಿದೆ. ಯಾವಾಗಲೋ ಮಳೆ ಬರುತ್ತೆ. ಇನ್ಯಾವಾಗಲೋ ಬಿಸಿಲು ಕಾಡುತ್ತೆ. ಕೃಷಿಗೆ ಅತೀ ಮುಖ್ಯವಾದ ಮುಂಗಾರು ಹಿಂಗಾರುಗಳೂ ಪ್ರತೀ ವರ್ಷ ಆಚೀಚೆಯಾಗುತ್ತಿವೆ. ಈ ಮುಂಗಾರು ಯಾವಾಗ ಬರುತ್ತೆ ಅನ್ನೋದೇ ರೈತನಿಗೆ ತಿಳಿಯದಿದ್ದರೆ ಆತ ಜಮೀನನ್ನು ಹಸನುಗೊಳಿಸೋದು ಯಾವಾಗ, ಬೀಜಗಳನ್ನೆಲ್ಲಾ ಕೊಂಡು ಬಿತ್ತನೆಗೆ ತಯಾರಾಗೋದು ಯಾವಾಗ ? ಜೂನಲ್ಲಿ ಮಳೆ ಬರುತ್ತೆ ಅಂತ ಪ್ರತೀ ವರ್ಷದಂತೆ ಜಮೀನು ಹಸನು ಮಾಡಿಕೊಂಡು ಕಾಯ್ತಾ ಇದ್ದು ಮುಂಗಾರು ಅದೇ ವರ್ಷ ಲೇಟಾದ್ರೆ ? ಹಸನುಗೊಳಿಸೋ ಮುಂಚೆಯೇ ಜೋರು ಮಳೆಗಾಲ ಶುರುವಾದ್ರೆ ? ಇಂತಹ ಸಮಯದಲ್ಲಿ ನೆರವಿಗೆ ಬರೋದು ಸುದ್ಧಿ ಮಾಧ್ಯಮಗಳು. ಕೇರಳಕ್ಕೆ ಮುಂಗಾರು ಇಂತಹ ದಿನ ಕಾಲಿಡ್ತಿದೆ. ಕರ್ನಾಟಕಕ್ಕೆ ಇಂತಹ ದಿನ ಬರಬಹುದು ಅಂತ ಹವಾಮಾನ ಇಲಾಖೆ ಕೊಡೋ ಮಾಹಿತಿಯನ್ನು ಪ್ರತೀ ರೈತನ ಬಳಿ ತಲುಪಿಸೋ ಕೆಲಸವನ್ನು ವೃತ್ತಪತ್ರಿಕೆಗಳು, ರೇಡಿಯೋ ಮತ್ತು ಟಿವಿ ಮಾಡುತ್ತಿವೆ. ಅನಾವೃಷ್ಠಿಯಾಗಿ ಬೆಳೆಹಾನಿಯಗ್ತಿದೆ, ಮಳೆ ಹೆಚ್ಚಾಗಿ ಫಸಲು ತೊಳೆದುಹೋಯ್ತು ಅನ್ನೋ ಅಳಲುಗಳೆಲ್ಲಾ ರೈತರಿಂದ ಅಧಿಕಾರಿಗಳಿಗೆ, ಅವರಿಂದ ಸರ್ಕಾರಕ್ಕೆ ತಲುಪೋಕೆ ತಿಂಗಳುಗಳೇ ಹಿಡಿಯುತ್ತಿದ್ದವು ಮುಂಚೆ. ಈಗ ಸುದ್ಧಿ ಮಾಧ್ಯಮಗಳು ಸಕ್ರಿಯವಾಗಿರುವುದರಿಂದ ಅವೆಲ್ಲಾ ಚಕಾಚಕ್ ! ಬರಗಾಲದ ತೀವ್ರತೆ ಸುದ್ಧಿ ಮಾಧ್ಯಮಗಳಲ್ಲಿ ಬಿತ್ತರಗೊಂಡು ರಾಜ್ಯಾದ್ಯಂತದ ಜನರಿಂದ ಸರ್ಕಾರದ ಬಗ್ಗೆ ಆಕ್ರೋಶ ಮುಗಿಲುಮುಟ್ಟೋಕೆ ಶುರುವಾದಾದ ಸರ್ಕಾರ ಮೋಡ ಬಿತ್ತನೆಗೆ ಮುಂದಾಗುತ್ತೆ ! ಅತೀವೃಷ್ಠಿಯಿಂದ ಜನ ಹಾಹಾಕಾರ ಮಾಡ್ತಿರೋ ಸುದ್ದಿ ಎಲ್ಲೆಡೆ ಬಿತ್ತನೆಗೊಂಡು ಜನ ರೊಚ್ಚಿಗೇಳುವ ಹೊತ್ತಿಗೆ ರಾಜ್ಯ , ಕೇಂದ್ರ ಸರ್ಕಾರಗಳು ಪ್ಯಾಕೇಜ್ ಘೋಷಿಸುತ್ತೆ. ನಕಲಿ ಬಿತ್ತನೆ ಬೀಜ, ಗೊಬ್ಬರ ಪೂರೈಸೋ ಧೂರ್ತರ ಸುದ್ದಿಯಾಗಿರಬಹುದು, ಸರ್ಕಾರದಿಂದ ಆ ಯೋಜನೆ ಈ ಯೋಜನೆ ಅಂತ ಸುಳ್ಳೇ ಹಳ್ಳಿಗಳಿಗೆ ಬಂದು ಹಣ ಪೀಕುವ ಏಜೆಂಟರುಗಳ ಬಗ್ಗೆಯಾಗಿರಾಹುದು, ಸುದ್ಧಿ ಮಾಧ್ಯಮಗಳಿಲ್ಲದ ದಿನಗಳಲ್ಲಿ ಅಂತಹ ಸುದ್ಧಿಗಳು ಎಲ್ಲರಿಗೂ ತಲುಪಿ ಅವರೆಲ್ಲಾ ಎಚ್ಚರಗೊಳ್ಳೋಕೆ ಎಷ್ಟು ಸಮಯ ಹಿಡಿಯುತ್ತಿತ್ತೋ ದೇವರೇ ಬಲ್ಲ. ಹಾಗಾದ್ರೆ ಸುದ್ಧಿ ಮಾಧ್ಯಮಗಳೇ ಇಲ್ಲವೆಂದರೆ ಸರ್ಕಾರಕ್ಕೆ ಮಾಹಿತಿಯೇ ಸಿಗುತ್ತಿರಲಿಲ್ಲವೇ, ಕೃಷಿ ಕ್ಷೇತ್ರ ಉಳಿಯೋಕೆ ಸಾಧ್ಯವೇ ಇಲ್ಲವೇ  ಅನ್ನುತ್ತೀರಾ ? ಖಂಡಿತಾ ಇದೆ. ಆದರೆ ಜನರಿಂದ ಜನರಿಗೆ, ಅಧಿಕಾರಿಗಳಿಂದ ಸರ್ಕಾರಕ್ಕೆ ಆ ಮಾಹಿತಿ ಸಿಕ್ಕು, ಅದಕ್ಕೆ ಪರಿಹಾರ ಸಿಕ್ಕೋ ಹೊತ್ತಿಗೆ ಅದೆಷ್ಟೋ ರೈತರ ಜೀವ ಹೋಗಿರುತ್ತಿತ್ತು. ಹಾಗಾಗಿ ಬದಲಾಗುತ್ತಿರೋ ಹವೆ ಮತ್ತು ಜಮಾನಾದಲ್ಲಿ ಕೃಷಿ ಸಾಯದೇ ಉಳಿಯಬೇಕಾದರೆ, ಉನ್ನತಿ ಹೊಂದಬೇಕಾದರೆ ಅದರ ಬಗ್ಗೆ ಸುದ್ಧಿ ಮಾಧ್ಯಮಗಳು ಮಹತ್ತರ ಪಾತ್ರ ವಹಿಸಬೇಕು. 

ಭ್ರಷ್ಟಾಚಾರ:

ಆದಾಯ ತೆರಿಗೆ ಇಲಾಖೆಗಳು ಅಲ್ಲಿ ದಾಳಿ ನಡೆಸಿದರು. ಇಲ್ಲಿ ದಾಳಿ ನಡೆಸಿದರು ಅನ್ನೋ ಸುದ್ಧಿ ನಿತ್ಯ ಪೇಪರ್ರುಗಳಲ್ಲಿ ಬರುತ್ತಲೇ ಇದೆ ಮತ್ತು ಅಂತಹ ಭ್ರಷ್ಟ ಅಧಿಕಾರ ಬಳಿಯಿದ್ದ ದುಡ್ಡು ಸರ್ಕಾರದ ಖಜಾನೆಗೆ ಸೇರ್ಪಡೆಗೊಳ್ಳತ್ತಲೇ ಇದೆ. ಸದ್ಯದ ಉದಾಹರಣೆ ಎಂದರೆ ತಮಿಳುನಾಡಿನ ಜಯಲಲಿತಾ ಒಡನಾಡಿ ಶಶಿಕಲಾ ಪ್ರಕರಣ. ಜನರಿಂದ ದೋಚಿದ್ದ ಕೋಟಿ ಕೋಟಿ ಹಣವನ್ನು ವಿದ್ಯಾರ್ಥಿನಿಲಯದಲ್ಲಿ ಬಚ್ಚಿಡಲಾಗಿತ್ತು ಎಂಬ ಮಾಹಿತಿ ಆದಾಯ ತೆರಿಗೆ ದಾಳಿಯ ವೇಳೆ ಸಮಸ್ತ ಜನರೆದುರು ಬಯಲಾಗಿದೆ ! ಅಮ್ಮ , ಚಿನ್ನಮ್ಮ ಅಂದ್ಕೊಂಡು ಮತ್ತದೇ ಭ್ರಷ್ಟ ರಾಜಕಾರಣಿಗಳನ್ನು ಆರಿಸಿ ಕಳಿಸೋ ಮುಗ್ದ ಜನರಿಗೆ ಈ ಮೂಲಕವಾದರೂ ಬುದ್ದಿ ಬಂದರೆ ಅದು ಸುದ್ದಿ ಮಾಧ್ಯಮಗಳ ಜಯವೇ ಮತ್ತು ಆ ಮೂಲಕ ಸಮರ್ಥ ರಾಜಕಾರಣಿಗಳು ಆಯ್ಕೆಯಾಗಿ ಬಂದರೆ ಅದು ದೇಶದ ಪ್ರಗತಿಗೆ ಸಹಾಯಕವೇ. ಅಮೇರಿಕಾದ ವಾಷಿಗ್ಟಂನ್ ಪೋಸ್ಟ್ ಪತ್ರಿಕೆಯ ಬಾಬ್ ವುಡ್ ವರ್ಲ್ಡ್ ಮತ್ತು ಕಾರ್ಲ್ ಬರ್ನ್ ಸ್ಟೀನ್ ಎಂಬ ಪತ್ರಕರ್ತರು ೧೯೭೩ರಲ್ಲಿ ವಾಟರ್ ಗೇಟ್ ಹಗರಣವನ್ನು ಬಯಲಿಗೆಳೆಯುತ್ತಾರೆ. ಅಮೇರಿಕಾದ ಅಧ್ಯಕ್ಷ ರಿಚರ್ಡ್ ನಿಕ್ಸನ್ ಅವರಿಗೆ ನಿಕಟವರ್ತಿಗಳಾಗಿದ್ದ ೧೯ಜನ ಮಾಡಿದ್ದ ಹಗರಣ ಜನಸಾಮಾನ್ಯರ ಎದುರಿಗೆ ಬಂದು ಅಮೇರಿಕಾದಲ್ಲಿ ರಾಜಕೀಯ ಅಲ್ಲೋಲ ಕಲ್ಲೋಲಗಳೇ ಆಗಿಹೋಗುತ್ತವೆ. ಅಲ್ಲಿಗೇಕೆ ಹೋಗಬೇಕು ? ನಮ್ಮ ಉದಾಹರಣೆಯನ್ನೇ ತೆಗೆದುಕೊಂಡರೆ ೧೯೮೭ರಲ್ಲಿ ದಿ ಹಿಂದು ಪತ್ರಿಕೆಯ ವರದಿಗಾರರಾದ ಚಿತ್ರಾ ಸುಬ್ರಹ್ಮಣ್ಯಂ ಮತ್ತು ಎನ್ ರಾಂ ಅವರು ಬೋಫೋರ್ಸ್ ಹಗರಣವನ್ನು ಬಯಲಿಗೆಳೆದ ರೀತಿ ನೆನಪಾಗುತ್ತೆ. ಆ ಸುದ್ದಿ ಅದೆಷ್ಟು ಹಾಹಾಕಾರವೆಬ್ಬಿಸಿತು ಅಂದರೆ ನಂತರವೇ ಬಂದ ಚುನಾವಣೆಯಲ್ಲಿ ಹಾಲಿ ಪ್ರಧಾನಿ ರಾಜೀವ್ ಗಾಂಧಿಯವರು ಅಧಿಕಾರ ಕಳೆದುಕೊಳ್ಳಬೇಕಾಯಿತು ! ಬಿಹಾರದ ಮೇವು ಹಗರಣ, ರಾಜ್ಯದ ಗಣಿ ಲೂಟಿ, ಜಮೀನುಗಳ ಅಕ್ರಮ ಡಿನೋಟಿಫಿಕೇಶನ್ ಹಗರಣ.. ಹೀಗೆ ಸಾಲು ಸಾಲು ಹಗರಣಗಳು ಜನರೆದುರು ಬಂದು ಭ್ರಷ್ಟ ರಾಜಕಾರಣಿಗಳು ಅಧಿಕಾರ ಕಳೆದುಕೊಳ್ಳುತ್ತಿದ್ದಾರೆ ಅಂದರೆ ಸುದ್ಧಿಮಾಧ್ಯಮಗಳಿಗೆ ಅವುಗಳ ಈ ಕೆಲಸಕ್ಕೆ ಶ್ಲಾಘಿಸಲೇ ಬೇಕು

ಇಲಾಖೆಗಳ ಜನಪರ ನಡೆಗಳು ಮತ್ತು ತ್ವರಿತ ಕ್ರಮ:

ಮುಂಚೆಯೆಲ್ಲಾ ನಮ್ಮೂರುಗಳ ಮುನ್ಸಿಪಾಲಿಟಿ, ಕರೆಂಟ್, ಫೋನ್ ಇಲಾಖೆಗಳೆಂದರೆ ಹೇಳೋರಿಲ್ಲ ಕೇಳೋರಿಲ್ಲ ಅನ್ನುವ ಹಂಗಾಗುತ್ತಿತ್ತು. ಮನಸ್ಸಿಗೆ ಬಂದಾಗ ಕರೆಂಟ್ ತೆಗೆಯೋರು. ಟೆಲಿಫೋನ್ ವೈರು ತುಂಡಾಗಿ ವಾರಗಟ್ಟಲೇ ಆಗಿ ಇಲಾಖೆಗಳಿಗೆ ಕಂಪ್ಲೇಂಟ್ ಬರೆಯುತ್ತಾ ಅದೆಷ್ಟು ಅಲೆದರೂ ಕೆಲಸ ಆಗುತ್ತಿರಲಿಲ್ಲ. ಆದರೆ ಈಗ ಹಾಗಿಲ್ಲ. ಮನಸ್ಸಿಗೆ ಬಂದಂತೆ ಕರೆಂಟ್ ತೆಗೀತಿದ್ದಾರೆ ಅಂತ ಟಿವಿ ನೈನಲ್ಲೋ, ಪಬ್ಲಿಕ್ ಟೀವಿಯಲ್ಲೋ ಬಂತೋ ಮುಗೀತು. ಮುಟ್ಟಬೇಕಾದಲ್ಲಿ ಬಿಸಿ ಮುಟ್ಟತ್ತೆ. ಆ ದಿನವೇ , ಇಲ್ಲಾ ಮಾರನೇ ದಿನ ಟಿವಿಯಲ್ಲೋ ಪತ್ರಿಕೆಯಲ್ಲೋ ಆ ಇಲಾಖೆಯಿಂದ ೈಂತಿಂತಾ ಕೆಲಸಕ್ಕಾಗಿ ವಿದ್ಯುತ್ ತೆಗೆಯಲಾಗಿತ್ತು ಅಂತ ಸ್ಪಷ್ಟೀಕರಣ ಬರುತ್ತೆ. ಮುಂದೆ ಇಂತಹ ದಿನ ಇಂತಿಂತಾ ಸಮಯದಲ್ಲಿ ಕರೆಂಟ್ ತೆಗೆಯಲಾಗುತ್ತೆ ಅನ್ನೋ ಮಾಹಿತಿಯನ್ನೂ ಕೊಡಲಾಗುತ್ತೆ ! ಕರೆಂಟಿನ ಲಭ್ಯತೆಯನ್ನು ನಂಬಿಕೊಂಡು ಅದೆಷ್ಟೆಂದು ಜನರಿದ್ದಾರೆ . ಬೇಕಾಬಿಟ್ಟಿ ಕರೆಂಟ್ ತೆಗೆದು ಅವರೆಲ್ಲರ ಆರ್ಥಿಕ ಚಟುವಟಿಕೆಗಳಿಗೆ ಹಾನಿಗೊಳಿಸೋದು ಅಂದ್ರೆ ಹೇಗೆ ? ಮಂಚಿತವಾಗಿ ಹೇಳೋ ಮೂಲಕ ಅವರು ಅದಕ್ಕೆ ಪರ್ಯಾಯ ವ್ಯವಸ್ಥೆಗಳನ್ನು ಮಾಡಿಕೊಂಡು ಆರ್ಥಿಕತೆ ಎಂದಿನಂತೆ ಮುಂದುವರೆಯುತ್ತೆ. ಇದಕ್ಕೆ ಇನ್ನೊಂದು ಉದಾಹರಣೆ ಮುನ್ಸಿಪಾಲಿಟಿಯವರು ಎಲ್ಲೆಂದರಲ್ಲಿ ಕಸ ತಂದು ಸುರಿಯೋದು, ಇಲಾಖೆಗಳು ಕಂಡಲ್ಲೆಲ್ಲಾ ರಸ್ತೆ ಅಗಿಯೋದು ! ನಮ್ಮೂರ ಬಳಿ ಇದ್ದಕ್ಕಿದ್ದಂತೆ ಮುನ್ಸಿಪಾಲಿಟಿಯವರು ಕಸ ತಂದು ಸುರಿಯೋಕೆ ಶುರುಮಾಡಿದಾಗ ನಮಗೆಲ್ಲಾ ಶಾಕ್. ಯಾರೋ ಒಬ್ಬರೋ, ಇಬ್ಬರೋ ಇದರ ವಿರುದ್ದ ಹೋರಾಡಿ ಪ್ರಯೋಜನವಿಲ್ಲ ಎಂದು ಊರಿಗೆ ಊರೇ ಒಟ್ಟಾಗಿ ಹೋರಾಡಬೇಕಾಯಿತು. ವೃತ್ತ ಪತ್ರಿಕೆಗಳಲ್ಲಿ ಇದರ ಸುದ್ದಿ ಮುಟ್ಟಿ, ಅಂದಿನ ಜಿಲ್ಲಾ ಉಸ್ತುವಾರಿ ಸಚಿವರೇ ಅಲ್ಲಿಗೆ ಬಂದು ಮನವಿ ಸ್ವೀಕರಿಸಿದ್ದಾಯಿತು. ನಮ್ಮೂರ ಹೊರಗೊಂದು ಶಾಶ್ವತ ಕಸ ವಿಲೇವಾರಿ ಕೇಂದ್ರ ನಿರ್ಮಾಣವಾಗಿದೆ ಅಂದರೆ ಅದರ ಶ್ರೇಯದ ಕೊಂಚ ಪಾಲು ಮಾಧ್ಯಮಗಳಿಗೂ ಸಲ್ಲಬೇಕು. 

ಬದಲಾವಣೆಗಳ ಹರಿಕಾರ: 

ಉತ್ತರದಲ್ಲಿ ಸುಂದರ್ ಲಾಲ್ ಬಹುಗುಣ  ಅವರು ಮರಗಳನ್ನು ಉಳಿಸಲು ನಡೆಸುತ್ತಿದ್ದ ಚಿಪ್ಕೋ ಚಳುವಳಿಯ ಬಗೆಗಿನ ಮಾಹಿತಿ ಕರ್ನಾಟಕ್ಕೂ ತಲುಪಿ ಇಲ್ಲಿ ನಡೆದ ಅಪ್ಪಿಕೋ ಚಳುವಳಿ, ಸಾಲು ಮರದ ತಿಮ್ಮಕ್ಕನವರ ಬಗೆಗಿನ ಮಾಹಿತಿ ಎಲ್ಲೆಡೆ ತಲುಪಿ ಅನೇಕ ಜನ ಹಸಿರು ಯೋಗಿಗಳಾಗಿದ್ದು, ಸದ್ಯ ನಡೆಯುತ್ತಿರುವ ವೃಕ್ಷ ಲಕ್ಷ ಆಂದೋಲನ, ಮಳೆ ಕೊಯ್ಲಿನ ಬಗ್ಗೆ ಶ್ರೀಪಡ್ರೆ ಮುಂತಾದವರು ಬರೆದ ಅಂಕಣಗಳಿಂದ ಜನ ಸಾಮಾನ್ಯರಲ್ಲಿ ಆ ಬಗ್ಗೆ ಜಾಗೃತಿ ಮೂಡಿದ್ದು.. ಹೀಗೆ ಮಾಧ್ಯಮಗಳಲ್ಲಿ ಬರೋ ಮಾಹಿತಿಗಳಿಂದ ಹಲವು ಬದಲಾವಣೆಗಳು ಆ ಮೂಲಕ ದೇಶದ ಪ್ರಗತಿ ಸಾಧ್ಯವಾಗುತ್ತಿದೆ. ಟಿವಿ, ರೇಡಿಯೋ, ವೃತ್ತಪತ್ರಿಕೆಗಳು ಇರಲಿಲ್ಲ ಅಂದರೆ ನವೆಂಬರ್ ಎಂಟರ ಮಧ್ಯರಾತ್ರಿಯಿಂದ ಐನೂರು , ಸಾವಿರದ ನೋಟುಗಳು ಬ್ಯಾನಾಗುತ್ತಿವೆ ಅಂತ ಸಮಸ್ತ ದೇಶವಾಸಿಗಳಿಗೆ ತಿಳಿಯೋಕೆ ಸಾಧ್ಯವಾಗುತ್ತಿತ್ತಾ ? ತನ್ನೂರಲ್ಲಿ ಕರೆಂಟಿಲ್ಲ ಅಂತ ಪ್ರಧಾನಿ ಮೋದಿಯವರಿಗೆ ಶಾಲಾ ಬಾಲಕನೊಬ್ಬ ಬರೆದ ಪತ್ರದ ಬಗ್ಗೆ ಎಲ್ಲರಿಗೂ ತಿಳಿದು ಆ ಬಗೆಗಿನ ತ್ವರಿತ ಕೆಲಸವಾಗಿ ಆ ಊರಿಗೆ ಕರೆಂಟ್ ಬರುತ್ತಿತ್ತಾ ? ಅಣ್ಣಾ ಹಜಾರೆಯವರ ಬಗ್ಗೆ ಮತ್ತು ಅವರು ಹೋರಾಡುತ್ತಿದ್ದ  ಜನಲೋಕ್ ಪಾಲ್ ವಿಧೇಯಕದ ಬಗ್ಗೆ ಹಳ್ಳಿಹಳ್ಳಿಗೂ ತಿಳಿಯಿತೆಂದರೆ ಅದರ ಶ್ರೇಯ ಸುದ್ದಿ ಮಾಧ್ಯಮಗಳಿಗೆ ಸಲ್ಲಬೇಕು. ಜಲ್ಲಿಕಟ್ಟಿಗೆ ವಿಧಿಸಿದ್ದ ನಿಷೇಧ ತೆಗೆಯಬೇಕು ಅಂತ ತಮಿಳುನಾಡಿಗೆ ತಮಿಳುನಾಡೇ ಹೋರಾಡಿದ್ದು , ಅದೇ ಮಾದರಿಯಲ್ಲಿ ಕರ್ನಾಟಕದ ಕಂಬಳದ ಮೇಲಿನ ನಿಷೇಧದ ತೆರವಿಗೆ ಸರ್ಕಾರ ಪ್ರಯತ್ನಿಸಬೇಕು ಅಂತ ಒತ್ತಡ ಬಿದ್ದಿದ್ದರ ಹಿಂದೆ ಜನಾಭಿಪ್ರಾಯ ಮೂಡಿಸೋಕೆ ಸುದ್ದಿ ಮಾಧ್ಯಮಗಳು, ಸಾಮಾಜಿಕ ಮಾಧ್ಯಮಗಳು ನೆರವಾಗಿದ್ದವು. 

ಹುಡುಕುತ್ತಾ ಹೋದರೆ ದೇಶದ ಒಪ್ಪುಓರೆಗಳನ್ನು ತಿದ್ದೋಕೆ ಸುದ್ಧಿ ಮಾಧ್ಯಮಗಳು ನೆರವಾದ ಅಸಂಖ್ಯಾತ ಉದಾಹರಣೆಗಳು ಸಿಗುತ್ತಾ ಹೋಗುತ್ತದೆ. 

ಹಾಗಂತ ಸುದ್ಧಿಮಧ್ಯಮಗಳು ಮಾಡಿದ್ದೆಲ್ಲಾ ಸರಿ ಅಂತಲ್ಲ. ನಿಷ್ಪಕ್ಷಪಾತವಾಗಿ ಕಾರ್ಯ ನಿರ್ವಹಿಸಬೇಕಾಗಿದ್ದ ಪತ್ರಿಕೆಗಳು, ಟೀವಿ ಚಾನೆಲ್ಗಳು ಹಣದಾಸೆಗೆ ರಾಜಕೀಯ ಪಕ್ಷಗಳತ್ತ ವಾಲುತ್ತಿವೆ. ದುಡ್ಡಿಗಾಗಿ ನಕಲಿ ಕುಟುಕು ಕಾರ್ಯಾಚರಣೆ ನಡೆಸೋದು, ಇಂತಹ ಸುದ್ಧಿ ಬಿತ್ತರಿಸಬಾರದೆಂದರೆ ಇಷ್ಟು ದುಡ್ಡು ಕೊಡಿ ಅಂತ ಧಮಕಿ ಹಾಕೋ ಪ್ರಕರಣಗಳು ಆ ಮಾಧ್ಯಮಗಳ ಬಗ್ಗೆ ಹೇಸಿಗೆ ಹುಟ್ಟಿಸುತ್ತವೆ. ಈ ಚಾನೆಲ್ಲು, ಈ ಪತ್ರಿಕೆ ಇಂತಹ ಪಕ್ಷದ ಪರವಾಗಿದೆ. ಇಂತದ್ದು ಈ ಪಕ್ಷದ ಕಡೆಗಿದೆ ಅಂತ ಕೆಲವೇ ದಿನಗಳಲ್ಲಿ ಹೇಳಬಹುದಾದ ಪರಿಸ್ಥಿತಿ ಬಂದಿರುವುದು ಸದ್ಯದ ವಿಪರ್ಯಾಸ. ಕೆಲವೆಡೆಯೆಂತೂ ಕೊಲೆ ಸುಲಿಗೆಗಳೇ ಮುಖ್ಯ ಪುಟಕ್ಕೆ ಬಂದು ರಾಜಕೀಯ ನಾಯಕರುಗಳ ಬಹುಪರಾಕುಗಳೇ ಮೇಲಾಗಿ ಮುಖ್ಯವಾಹಿನಿಗೆ ಬರಬೇಕಾದ ಸುದ್ದಿ ಸಾಯುತ್ತಿರುವುದು ಬೇಸರ ತರಿಸುತ್ತೆ. ಕೆಲವೊಮ್ಮೆ ಉತ್ತರ ಕೊರಿಯಾದ ಪರಿಸ್ಥಿತಿಯ ನೆನಪೂ ತರಿಸುತ್ತೆ. ನಮ್ಮ ರಾಜ ಶಕ್ತಿಮಾನ್, ಅವ ಎಲ್ಲಕ್ಕಿಂತ ಮಹಾನ್ ..ಅಂತ ಶಾಲಾ ಮಕ್ಕಳು ದಿನನಿತ್ಯ ಹಾಡಬೇಕಾದಂತಹ ಅಲ್ಲಿನ ಪರಿಸ್ಥಿತಿಗೆ ಹೋಲಿಸಿದರೆ ಪ್ರಜಾಪ್ರಭುತ್ವದ ನಮ್ಮ ನಾಡು ಸ್ವರ್ಗವೆನಿಸುತ್ತೆ. ಕುಂಟುತ್ತಾದರೂ ಸಾಗುತ್ತಿರುವ ನಮ್ಮ ಆರ್ಥಿಕತೆಯ ಬಗ್ಗೆ, ಇಲ್ಲಾಗುತ್ತಿರುವ ಸುಧಾರಣೆಗಳ ಬಗ್ಗೆ ಹೆಮ್ಮೆಯೆನಿಸುತ್ತೆ. ಅದು ಇನ್ನೂ ಚುರುಕುಗೊಳ್ಳಬೇಕಾದರೆ ಆ ನಿಟ್ಟಿನಲ್ಲಿ ನಮ್ಮ ನಿಮ್ಮೆಲ್ಲರ ಕಾಣಿಕೆ, ಜನಾಭಿಪ್ರಾಯವನ್ನು ಮೂಡಿಸುವಲ್ಲಿ ಮಹತ್ತರ ಪಾತ್ರ ವಹಿಸೋ ಸುದ್ಧಿ ಮಾಧ್ಯಮಗಳು ಗಣನೀಯ ಪಾತ್ರ ವಹಿಸಬೇಕಾಗುತ್ತೆ. ಆ ನಿಟ್ಟಿನಲ್ಲಿ ಎಲ್ಲರ ಗಮನಹರಿಯಲಿ ಎಂದು ಆಶಿಸುತ್ತಾ ಇಂದಿನ ವಿಚಾರಲಹರಿಗೆ ಸದ್ಯಕ್ಕೊಂದು ವಿರಾಮ. 

ಮೆಕ್ಸಿಕೋ ಮಳೆ ಮತ್ತೆ ಮೊಬೈಲು

ಇದ್ದಕ್ಕಿದ್ದಂತೆ ಮಧ್ಯರಾತ್ರಿ ವಿಪರೀತ ಮಳೆಯಾದ್ರೆ ಏನಾಗುತ್ತೆ ಅಂದ್ರೆ ನಾವು ಯಾವ ಜಾಗದಲ್ಲಿದ್ದೀವಿ ಅನ್ನೋದ್ರ ಮೇಲೆ ಉತ್ತರ ಕೊಡಬಹುದು ಅನ್ನಿಸುತ್ತೆ. ಬೆಂಗಳೂರಲ್ಲಾದ್ರೆ ಅಪಾರ್ಟುಮೆಂಟುಗಳಲ್ಲೆಲ್ಲಾ ನೀರು ತುಂಬಬಹುದು ಅಂತಲೋ, ಮಲೆನಾಡಲ್ಲಾದ್ರೆ ಒಂದಿಷ್ಟು ಫಸಲು ಕೊಚ್ಚಬಹುದು ಅಂತಲೋ ಅನ್ನಬಹುದು. ಆದರೆ ಮೊಬೈಲ್ ಕ್ಯಾಮೆರಾ ಮಟಾಷ್ ಆಗುತ್ತೆ ಅಂತ ಕನಸಲ್ಲೂ ಅಂದುಕೊಂಡಿರಲಿಲ್ಲ !

ಕ್ಯಾಮರಾ ಮತ್ತು ನೀರು: 

ಏನಾಯ್ತು ಅಂದ್ರಾ ? ಹಿಂದಿನ ದಿನ ರಾತ್ರಿಯ ಭಾರಿ ಮಳೆಗೆ ಬೇಸ್ಮೆಂಟಿನಲ್ಲಿದ್ದ ನಮ್ಮ ಅಪಾರ್ಟುಮೆಂಟಿಗೆ ನೀರು ನುಗ್ಗಿ ಮೊಬೈಲು, ಲ್ಯಾಪ್ತಾಪು, ಬೆಡ್ಡುಗಳೆಲ್ಲಾ ನೀರಲ್ಲಿ ತೇಲಾಡಿದ್ವು ! ನೀರು ಹೊರಗಾಕೋಕೆ ಎರಡೂವರೆ ಘಂಟೆ ಒದ್ದಾಡಿದ ಮೇಲೆ ಮಲಗೋಕೆ ಒಂದಿಷ್ಟು ಒಣ ನೆಲ ಸಿಕ್ಕಿತ್ತು ! ಬ್ಯಾಟರಿ ತೆಗೆದು ಅಕ್ಕಿಡಬ್ಬದೊಳಗಿಟ್ಟ ಮೊಬೈಲಿಗೆ ಮಾರನೇ ದಿನ ಜೀವ ಬಂತು. ಕಾಲ್ ಹೋಗ್ತಿದೆ, ವಾಟ್ಪಾಸ್ ಆನಾಗ್ತಿದೆ ಅಂದ ಮೇಲೆ ನನ್ನ ಖುಷಿಗೆ ಮೇರೆಯೇ ಇಲ್ಲ. ಆ ಮಧ್ಯಾಹ್ನವಷ್ತೇ ಕ್ಯಾಮೆರಾ ಯಾಕೋ ಆನಾಗ್ತಿಲ್ಲವಲ್ಲ ಅಂತ ಗಮನಿಸಿದ್ದು. ಕಂಪ್ಯೂಟರಲ್ಲೂ ಕೆಲವೊಮ್ಮೆ ಸ್ಪೀಕರ್ ಕೆಲಸ ಮಾಡದಿದ್ದಾಗ , ವೆಬ್ ಕ್ಯಾಮ್ ಕೆಲಸ ಮಾಡದಿದ್ದಾಗ ಅದನ್ನು ರೀಬೂಟ್ ಮಾಡಿದಾಗ ಸರಿಯಾಗುತ್ತಲ್ಲ ಅದೇ ತರಹ ಇಲ್ಲೂ ಪ್ರಯತ್ನ ಮಾಡಾಯ್ತು. ಪ್ರಯೋಜನವಿಲ್ಲ. ಮೊಬೈಲಿನ ಸೆಟ್ಟಿಂಗ್ಸಿಗೆ ಹೋಗಿ ಅಲ್ಲಿನ ಅಪ್ಲಿಕೇಶನ್ ಮ್ಯಾನೇಜುಮೆಂಟಿನಲ್ಲಿ ಕ್ಯಾಶೆ ಕ್ಲಿಯರ್ ಮಾಡಾಯ್ತು. ಊಹೂಂ. ಅದರಲ್ಲಿದ್ದ ಡಾಟಾ ಕೂಡ ಕ್ಲಿಯರ್ ಮಾಡಾಯ್ತು. ಊಹೂಂ. ಮೊಬೈಲು ಆಫ್ ಮಾಡಿ , ಬ್ಯಾಟರಿ ತೆಗೆದು ಒಂದೆರಡು ಘಂಟೆಯ ಬಿಟ್ಟು ಮತ್ತೆ ಹಾಕಾಯ್ತು. ಊಹೂಂ. ಮತ್ತದೇ 'unfortunately camera has stopped working' ಅನ್ನೋ ಸಂದೇಶ. ಲೆನೊವೋ ಮೊಬೈಲಾದ ಕಾರಣ ಲೆನೊವೋ ಸಹಾಯಕ್ಕೆ ಹೋಗಿ ಅದರಲ್ಲಿ self diagnostics ಗೆ ಹೋಗಿ ಅಲ್ಲಿದ್ದ ಎಲ್ಲ ಟೆಸ್ಟುಗಳನ್ನೂ ಮಾಡಾಯ್ತು. ಬ್ಲೂಟೂತ್, ವೈಫೈ ಎಲ್ಲಾ ಸ್ರಿಯಾಗೇ ಇದೆ. ಆದರೆ ಮೊಬೈಲಿನ ಮುಂದಿನ ಮತ್ತು ಹಿಂದಿನ ಕ್ಯಾಮೆರಗಳೆರಡಕ್ಕೂ ಇದು ಕೆಲಸ ಮಾಡುತ್ತಿಲ್ಲ ಅನ್ನೋ ಎರರ್ ಮೆಸೇಜ್. ಎರಡು ವರ್ಷವಾಗೋ ಹೊತ್ತಿಗೆ ಮೊಬೈಲು ಎಸೆಯೋ ಹಾಗಾಗಿರುತ್ತೆ ಅಂತಿರ್ತಾರೆ. ಆದರೆ ಚೆನ್ನಾಗೇ ಇಟ್ಟುಕೊಂಡಿದ್ದ ಮೊಬೈಲಿನ ಎರಡೂ ಕ್ಯಾಮೆರಾಗಳು ಇದ್ದಕ್ಕಿದ್ದಂತೆ ಬಂದಾದ್ರೆ ಏನನ್ನೋದು ? ಎಲ್ಲ ಕಡೆ ಇದ್ದಂತೆ ಕಾಂಟಾಕ್ಟುಗಳ ಬ್ಯಾಕಪ್ ತೆಗೆದುಕೊಂಡು ಫಾರ್ಮಾಟೂ ಮಾಡಾಯ್ತು. ಆದರೆ ಅದರಿಂದ ಕ್ಯಾಮರಾ ಸರಿಯಾಗಲಿಲ್ಲ. ಹೊಸ ಸಮಸ್ಯೆಗಳು ಶುರುವಾದ್ವು. 

ಫಾರ್ಮಾಟು ಮತ್ತು ವಾಟ್ಸಾಪು: 

ಫಾರ್ಮಾಟು ಮಾಡೋ ಮೊದಲು ಅಪ್ಲಿಪ್ಕೇಷನ್ನುಗಳ ಬ್ಯಾಕಪ್ ತೆಗೆದುಕೊಂಡಿದ್ರೂ ಹೊಸದಾಗಿ ಶುರುವಾಗೋ ಮೊಬೈಲಿನಲ್ಲಿ ವಾಟ್ಸಾಪು ಹೊಸದಾಗಿ ಇನ್ ಸ್ತಾಲ್ ಆಗುತ್ತೆ. ವಾಟ್ಸಾಪಿನ ಪಾಲಿಗೆ ಅದು ಹೊಸ ಮೊಬೈಲಿನಂತೆಯೇ. ಹಾಗಾಗಿ ಸಹಜವಾಗೇ ಅದು ವೆರಿಫಿಕೇಶನ್ನಿಗೆ ಪ್ರಯತ್ನಿಸುತ್ತೆ. ವೆರಿಫಿಕೇಶನ್ನಿನ ಸಂದೇಶ ಸ್ವೀಕರಿಸಲು ನನ್ನ ಭಾರತೀಯ ಸಂಖ್ಯೆ ರೀಚಬಲ್ ಆಗಿದ್ರೆ ತಾನೇ ! ಇಂತಿಪ್ಪ ವಾಟ್ಸಾಪು ಮತ್ತು ಅಲ್ಲಿ ನನ್ನ ಭಾರತೀಯ ಹೆಸರಿನ ಮೂಲಕ ನನ್ನ ಪರಿಚಯವಿದ್ದ ಎಲ್ಲರ ಸಂದೇಶಗಳಿಗೂ ಇತಿಶ್ರಿ ಹಾಡಿತ್ತು ಮೊಬೈಲ್  ಫಾರ್ಮಾಟು ! ಇನ್ನು ಮಾಡೋದಿನ್ನೇನು, ಇದ್ದ ಮೆಕ್ಸಿಕೋ ಸಂಖ್ಯೆಯ ಮೂಲಕ ಹೊಸದಾಗಿ ರಿಜಿಸ್ಟರ್ ಮಾಡಿ ಖಾಲಿ ವಾಟ್ಸಾಪಿನ ದುನಿಯಾಕ್ಕೆ ಪ್ರವೇಶಿಸಿದೆ. 

ಕಳೆದೋದ ಕಾಂಟಾಕ್ಟುಗಳ ಹುಡುಕಿ: 

ಕಾಂಟಾಕ್ಟುಗಳು ಕಾರ್ಡಿಗೆ ಎಕ್ಸ್ ಪೋರ್ಟೆಂತೂ ಆಗಿದ್ವು. ಆದರೆ ಇಂಪೋರ್ಟಿಗೆ ಹೋದರೆ ಅದು ವೀ ಕಾರ್ಡಿನ ರೂಪದಲ್ಲಿ ಬೇಕು ಅಂತಿದೆ. ಆದರೆ ಎಕ್ಸ್ ಪೋರ್ಟಾಗಿದ್ದು ಟೆಕ್ಸ್ಟ್ ಫಾರ್ಮಾಟಿನಲ್ಲಿ.ಅದನ್ನು ನಾನು ಓದಬಹುದಾಗಿತ್ತಾದರೂ ಮೊಬೈಲಿಗೆ ಗೊತ್ತಾಗುತ್ತಿಲ್ಲವೇ ? ಪ್ರತಿಯೊಂದನ್ನೂ ಓದಿ ಓದಿ ಹೊಸದಾಗಿ ಸೇವ್ ಮಾಡಬೇಕಾ ಶಿವನೇ ಅಂದುಕೊಳ್ಳುವ ಹೊತ್ತಿಗೆ ಗೂಗಲ್ ಕಾಂಟಾಕ್ಟಿನಲ್ಲಿಟ್ಟಿದ್ದ ಬ್ಯಾಕಪ್ ನೆನಪಾಯ್ತು. ಗೂಗಲ್ಲಿಗೆ ಹೋಗಿ ನೊಡಿದ್ರೆ ಬರೀ ೧೯೦ ಮಾತ್ರವೇ ತೋರಿಸ್ತಿದೆ. ಆ ೧೯೦ ಆಗಲೇ ಮೊಬೈಲಿಗೆ ಬಂದಾಗಿತ್ತು. ಇದ್ದ ೯೦೦ ಚಿಲ್ಲರೆ ಕಾಂಟಾಕ್ಟುಗಳಲ್ಲಿ ಉಳಿದಿದ್ದು ಎಲ್ಲೋಯ್ತಪ್ಪ ಅಂತ ತಲೆಬಿಸಿಯಾಯ್ತು. ಆಫೀಸಿನ ಸಹೋದ್ಯೋಗಿಗಳ ನಂಬರು ಇತ್ಯಾದಿ ಸದ್ಯಕ್ಕೆ ಸೇವ್ ಮಾಡಿಕೊಂಡ ಯಾವೊಂದೂ ಗೂಗಲಿನಲ್ಲಿರಲಿಲ್ಲ.  ಅಂತೂ ಹುಡುಕುಡುಕಿ ಸೆಟ್ಟಿಂಗ್ಸಿಗೆ ಹೋಗಿ ಅಲ್ಲಿದ್ದ recover from sd card ಅನ್ನೋ ಆಯ್ಕೆ ಸಿಕ್ಕಿದ ಮೇಲೆ ಅಲ್ಲಿದ್ದ ಕಾಂಟ್ಯಾಕ್ಟಿನ ಬ್ಯಾಕಪ್ ಸಿಕ್ಕಿತು ! ಅಲ್ಲಿಂದ ರಿಕವರ್ ಕೊಟ್ಟ ಮೇಲೆ ಎಲ್ಲ ಕಾಂಟಾಕ್ಟುಗಳೂ ವಾಪಾಸ್ಸಾದ್ವು. ಅದರ ಮಧ್ಯೆ ಗೂಗಲ್ಲಿಂದ ಕಾಪಿ ಮಾಡೋಕೆ ಹೋಗಿ ಅದೇ ಕಾಂಟ್ಯಾಕ್ಟುಗಳು ಮೂರು ಮೂರು ಬಾರಿ ತೋರಿಸೋಕೆ ಶುರುವಾದ್ವು ! ಕಾಂಟಾಕ್ಟ್ಸು ಗಳಲ್ಲಿನ ಉನ್ನತ ಆಯ್ಕೆಗಳಿಗೆ ಹೋಗಿ merge contacts ಆಯ್ಕೆ ಮಾಡಿದ ಮೇಲೆ ಅವು ಮುಂಚೆಯಿದ್ದ ಸ್ಥಿತಿಗೆ ಬಂದವು. ನಂತರ ಮಾಡಿದ್ದ ಮೊದಲ ಕೆಲಸವೆಂದ್ರೆ ಅವೆಲ್ಲವನ್ನೂ ಗೂಗಲ್ ಕಾಂಟಾಕ್ಟಿಗೆಸೇರಿಸೋಕೆ ಪ್ರಯತ್ನಿಸಿದ್ದು. ಆದರೆ ಈಗಿನ ಗೂಗಲ್ ಕಾಂಟಾಕ್ಟಿಗೆ ಮೊಬೈಲಿಂದ ಸೇರಿಸೋಕೆ ಆಗೋಲ್ಲ. ಅದಕ್ಕೇಂತ ಹಳೆಯ ಆವೃತ್ತಿಗೆ ಹೋದರೆ ಅದು ಮೊಬೈಲಿದ್ದ ವಿಕಾರ್ಡ್ ಕೇಳಬೇಕೆ ? ಜೊತೆಗೆ ಮೊಬೈಲು ಮೆಕ್ಸಿಕೋದಲ್ಲಿದ್ದ ಕಾರಣ ಜೀಮೇಲಿನ ಭಾಷೆ ಇಂಗ್ಲೀಷಾಗಿ ಬದಲಾಗ್ತಿದ್ದಿದ್ದು ಬೇರೆ. ಕಾಂಟಾಕ್ಟಿಗೆ ಮತ್ತೆ ಮರಳಿ ಅದನ್ನು ವಿಕಾರ್ಡಾಗಿ ಎಕ್ಸ್ ಪೋರ್ಟ್ ಮಾಡಾಯ್ತು. ಜೀಮೇಲ್ ಕಾಂತಾಕ್ಟಿನ ಹಳೆಯ ಆವೃತ್ತಿಗೆ ಬಂದು ಅಲ್ಲಿ ಆ ವೀಕಾರ್ಡನ್ನು ಅಪ್ಲೋಡ್ ಮಾಡಿದರೆ ಮುಂಚೆಯಿದ್ದ ಕಾಂಟಾಕ್ಟುಗಳ ಜೊತೆ ಇವು ಡೂಪ್ಲಿಕೇಟಾದವು. ಅಲ್ಲಿದ್ದ ಸೇರಿಸುವ ಆಯ್ಕೆ ಉಪಯೋಗಿಸಿ ಕೊನೆಗೂ ಮೊಬೈಲಿನಲ್ಲಿದ್ದ ಎಲ್ಲಾ ಕಾಂಟಾಕ್ಟುಗಳನ್ನೂ ಗೂಗಲ್ಲಿಗೆ ಸೇರಿಸೋ ಹೊತ್ತಿಗೆ ಮಧ್ಯರಾತ್ರಿ ಹನ್ನೆರಡು ದಾಟಿತ್ತು. 

ಸ್ಕೈಪ ಸಾಹಸ: 

ಬೇರೆ ಎಲ್ಲಕ್ಕಿಂತ ಬೇಜಾರಾದ ವಿಷಯವಂದ್ರೆ ಅಮ್ಮನೊಂದಿಗೆ ಹೇಗೆ ಮಾತಾಡೋದು ಅಂತ. ದಿನಾ ಮಾತಾಡುತಿದ್ದ ವಾಟ್ಸಾಪಿನ ವೀಡಿಯೋ ಕಾಲ್ ಕೆಲಸ ಮಾಡುತ್ತಿಲ್ಲ. ಸ್ಕೈಪ್ ಬಳಸಿ ಲ್ಯಾಪ್ಟಾಪಿನ ಮೂಲಕ ಮಾತಾಡಬಹುದಾದರೂ ಊರಲ್ಲಿದ್ದ ಅಮ್ಮನ ಮೊಬೈಲಲ್ಲಿ ಅದನ್ನು ಹೇಗೆ ಇನ್ಸ್ಟಾಲ್ ಮಾದೋದು ಅಂತ . ಅಂತೂ ಅಮ್ಮನಿಗೆ ಕಾಲ್ ಮಾಡಿ ಗೂಗಲ್ಲಿಂದ ಆದನ್ನು ಡೌನ್ಲೋಡು ಮಾಡಿ ಇನ್ಟಾಲ್ ಮಾಡೋಕೆ ಹೇಳಾಯ್ತು. ಆದರೆ ಜಾಗವಿಲ್ವೆ. ವಾಟ್ಸಾಪಿನ ವೀಡಿಯೋ, ಫೋಟೋಗಳನ್ನು ಡಿಲಿಟ್ ಮಾಡಿಸಿದ್ರೂ ಜಾಗವಿಲ್ಲ. ಕೊನೆಗೆ ಸೆಟ್ಟಿಂಗ್-ಅಪ್ಲಿಕೇಷನ್ ಮ್ಯಾನೇಜ್ಮೆಂಟ್ ಗೆ ಹೋಗಿ ಅದರಲ್ಲಿದ್ದ ಕೆಲವು ಆಟಗಳನ್ನು ತೆಗೆದ ಮೇಲೆ ಜಾಗವಾಯ್ತು.ಅವರಿಗಾಗಿ ಒಂದು ಹೊಸ ಮೈಕ್ರೊಸಾಫ್ಟ್ ಖಾತೆ ತೆರೆದು ಅವರ ಮೊಬೈಲಿಗೆ ಬಂದ ವೆರಿಫಿಕೇಷನ್ ಕೋಡ್ ಕೇಳಿ ಅವರ ಮೊಬೈಲಲ್ಲಿದ್ದ ಸ್ಕೈಪೆಯಲ್ಲಿ ಅವರನ್ನು ಲಾಗಿನ್ ಮಾಡಿಸಿದ್ದೂ ಆಯ್ತು. ಇಷ್ಟೆಲ್ಲ ಕತೆಯಾಗಿ ಅವರಲ್ಲಿಂದ ಕಾಲ್ ಮಾಡೋಕೆ ಪ್ರಯತ್ನಿಸೋ ಹೊತ್ತಿಗೆ ನನ್ನ ಲ್ಯಾಪ್ಟಾಪಲ್ಲಿದ್ದ ಸ್ಪೀಕರ್ ಮಟ ಹತ್ತಬೇಕೆ ? ಮಳೆಯ ಹೊಡೆತಕ್ಕೆ ಇದ್ದ ಹೆಡ್ ಫೋನೂ ಮಟ :-( ಸರಿ ಅಂತ ಲ್ಯಾಪ್ಟಾಪ್ ರಿಬೂಟ್ ಮಾಡಿ ಸ್ಪೀಕರ್ ಸರಿಯಾಗಿಸೋ ಹೊತ್ತಿಗೆ ಭಾರತದಲ್ಲಿ ಮಧ್ಯರಾತ್ರಿ. ಅಂತೂ ಎರಡು ದಿನಗಳ ನಂತರ ಮಗನ ಮುಖ ಕಂಡಾಗ ಅವರಿಗದೆಷ್ಟೋ ಖುಷಿ. ಬೆಳಗ್ಗಿಂದ ಒದ್ದಾಡಿ ಕೊನೆಗೂ ಯಶಸ್ವಿಯಾಗಿದ್ದಕ್ಕೆ ನನಗೂ ಖುಷಿ. 

ಫಾರ್ಮಾಟು ಮತ್ತು ಉಬರ್: 

ಫಾರ್ಮಾಟಾದ ಮೇಲೂ ಕ್ಯಾಮೆರಾ ವರ್ಕಾಗಲಿಲ್ಲ ಅನ್ನೋದು ಬಿಟ್ಟರೆ ಬೇರೆಲ್ಲಾ ಅಪ್ಲಿಕೇಶನ್ನುಗಳು ಕೆಲಸ ಮಾಡುತ್ತಿದ್ದವು. ಹೊರಹೋದವ ಬರಬೇಕು ಅಂತ ಉಬರ್ ತೆರೆದರೆ ಅದೇ ಕೆಲಸ ಮಾಡುತ್ತಿಲ್ವೇ ? ಕ್ಯಾಮೆರಾಕ್ಕೆ ಬಂದ ಸಂದೇಶವೇ ಇಲ್ಲಿ ! ಕ್ಯಾಶೆ, ಡಾಟಾ ಕ್ಲಿಯರ್ ಮಾಡಿದ್ರೂ ಉಪಯೋಗವಾಗದಿದ್ದಾಗ ಅದನ್ನೂ ಅನ್ ಇನ್ತಾಲ್ ಮಾಡಿ ಮತ್ತೆ ಡೌನ್ಲೋಡ್ ಮಾಡಿದೆ. ಹೊಸದು ಓಪನ್ನೇನೋ ಆಯ್ತು. ಆದ್ರೆ ಮತ್ತೆ ವೆರಿಫಿಕೇಷನ್ ಸಾಹಸ ! ಈಮೇಲಿನ ಸಹಾಯದಿಂದ ಲಾಗಿನ್ ಆಗೋಕೆ ಪ್ರಯತ್ನ ಪಟ್ಟು ಮೆಕ್ಸಿಕನ್ ಸಂಖ್ಯೆ ನೀಡಿದ್ರೂ ವೆರಿಫಿಕೇಷನ್ ಕೋಡ್ ಬರುತ್ತಿಲ್ಲ. ಅದನ್ನೇ ಉಪಯೋಗಿಸಿ ರಿಜಿಸ್ಟರ್ ಮಾಡೋಣ ಅಂದರೆ ಈ ಈಮೇಲ್ ಆಗಲೇ ನೋಂದಣಿಯಾಗಿದೆ ಅನ್ನೋ ಸಂದೇಶ. ಒಳ್ಳೆ ತಲೆನೋವಾಯ್ತಲ್ಲ ಗುರುವೇ ಅಂತ ಫೇಸ್ಬುಕ್ಕಿನ ಮೂಲಕ ಲಾಗಿನ್ ಆಗೋಕೆ ಪ್ರಯತ್ನ ಪಟ್ರೆ ನನ್ನ ಭಾರತೀಯ ನಂಬರಿನ ಮೂಲಕವೇ ಲಾಗಿನ್ ಆಯ್ತು ! ಅದೂ ಯಾವ ವೆರಿಫಿಕೇಷನ್ ಕೊಡ್ ಕೇಳದೇ ! ಇದ್ದ ಉಬರಿನ ಮೂಲಕವೇ ಬೇರೆ ದೇಶಕ್ಕೆ ಹೋದಾಗ ಅಲ್ಲಿನ ಸಂಖ್ಯೆಗೆ ಬದಲಾಯಿಸೋಕೆ ಹೋದ್ರೆ ಆ ದೇಶದ ನಂಬರಿಗೆ ಮಾತ್ರ ಬದಲಾಯಿಸಬಹುದು. ಬೇರೆ ದೇಶದ ಸಂಖ್ಯೆಗೆ ಬದಯಾಯಿಸಬೇಕಂದ್ರೆ ಒಂದು ವೆಬ್ ಸೈಟಿಗೆ ಹೋಗಬೇಕನ್ನೋ ಆಯ್ಕೆ ಬರುತ್ತೆ. ಅಲ್ಲಿಗೆ ಹೋಗಿ ಪ್ರಯತ್ನ ಪಟ್ರೂ ಆಗಿರಲಿಲ್ಲ ನನಗೆ. ಆದರೆ ಅನ್ ಇನ್ಸ್ಟಾಲ್ ಮಾಡಿ, ಹೊಸದಾಗಿ ಇನ್ ಸ್ಟಾಲ್ ಮಾಡಿದಾಗ ಆದ ಲಾಭವೆಂದರೆ ಇಲ್ಲಿನ ಸಂಖ್ಯೆಗೆ ಬದಲಾಯಿಸೋ ಅವಕಾಶ ಸಿಕ್ಕಿದ್ದು. ಸುಮ್ಮನೇ ನೊಡೋಣ ಅಂತ ಬದಲಾಯಿಸೋಕೆ ನೋಡಿದ್ರೆ ವೆರಿಫಿಕೇಷನ್ ಕೋಡ್ ಬರಬೇಕೆ ? ಮಳೆಯಿಂದ ಎಷ್ಟೆಲ್ಲಾ ಅದ್ವಾನವಾಗಿದ್ರೂ  ಇದಾದ್ರೂ ಒಳ್ಳೆದಾಯ್ತಲ್ಲ ಅಂತಂದ್ಕೊಂಡು  ಮನೆಗೆ ಬಂದೆ. 

ಕೆಲವು ಗೆಳೆಯರಿಗೆ ಹೊಸ ಸಂಖ್ಯೆಯಿಂದ ಮೆಸೇಜ್ ಮಾಡಿ ಈ ತರ ಆಗಿದೆ ಅಂತ ಹೇಳಿದ್ಮೇಲೆ ಅವರ ಮೂಲಕ ಮುಂಚೆಯಿದ್ದ ಹಳೆಯ ವಾಟ್ಸಾಪ್ ಗುಂಪುಗಳಿಗೆ , ಅಮ್ಮನ ಮೂಲಕ ನೆಂಟರ ಗುಂಪುಗಳಿಗೆ ಮರಳಿ ಬಂದರೂ ಮುಂಚೆಯಿದ್ದ ವಾಟ್ಸಾಪಿನ ಕಳೆಯಿಲ್ಲ ಇದಕ್ಕೆ. ಉಪಯೋಗಿಸದೇ ಇದ್ದರೆ ೨೦೨೧ರ ವರೆಗೆ ವ್ಯಾಲಿಡಿಟಿ ಇದ್ದ ಸಿಮ್ಮನ್ನೂ ೩ ತಿಂಗಳಲ್ಲಿ ಡಿ ಆಕ್ಟಿವೇಟ್ ಮಾಡ್ತಾರೆ ಅನ್ನೋ ಹೊಸ ಹುಳ ತಲೆಯೊಳಗಿ ಬಿಟ್ಟಿದ್ದಾರೆ ಒಂದಿಷ್ಟು ಜನ. ಕ್ಯಾಮೆರಾ ಕೊನೆಗೂ ಸರಿಯಾಗುತ್ತಾ ಅಥವಾ ಅದಕ್ಕಾಗಿ ಹೊಸ ಮೊಬೈಲೇ ಕೊಳ್ಳಬೇಕಾ ಅಂತ ಮೊಬೈಲ್ ಸರ್ವೀಸ್ ಸೆಂಟರವರಿಂದಲೇ ಖಚಿತಪಡಿಸಿಕೊಳ್ಳೋ ಅಗತ್ಯವಿದೆ. ಎರಡು ದಿನವಾದರೂ ಒಣಗಲಿಟ್ಟ ಬೆಡ್ ಇನ್ನೂ ಆರದೇ ಇರೋ ಕಾರಣ ಹೊಸ ಬೆಡ್ ಕೊಳ್ಳೋ ಖರ್ಚೊಂದು ಕಾದಿದೆಯಾ ಗೊತ್ತಿಲ್ಲ. ಮಳೆಯ ಹೊಡೆತಕ್ಕೆ ಮನೆಯ ಹೊರಗಿದ್ದ ಹೀಟರಿನ ಇಗ್ನೈಟರಿಗೆ ನೀರು ನುಗ್ಗಿ ದಿನಾ ಬೆಳಗೆದ್ದರೆ ಸ್ನಾನಕ್ಕಾಗಿ ಕೊರೆಯೋ ತಣ್ಣೀರಲ್ಲಿ ಮಾಡಬೇಕಾದ ಐಸ್ವಾಟರ್ ಛಾಲೆಂಜಿಗೆ ಎಂದು ಮುಕ್ತಿಯೋ ಗೊತ್ತಿಲ್ಲ. ರಿಪೇರಿಯವನಿಗೆ ಹೇಳಿದರೂ ಅವರು ತಕ್ಷಣಕ್ಕೆ ಬರಬೇಕಲ್ಲ. ಎರಡು ದಿನವಾದರೂ ಒಣಗದ ಲ್ಯಾಪ್ಟಾಪ್ ಬ್ಯಾಗಿನ ಒಳಾಂಗಣಗಳ ಕಾಟ ಲ್ಯಾಪ್ಟಾಪಿಗೆ ಎಂದು ಬಿಡುಗಡೆಯೋ ಗೊತ್ತಿಲ್ಲ. ಏನೇ ಅಂದರೂ ಮೆಕ್ಸಿಕೋಕೆ ಬಂದು ಮೂರು ತಿಂಗಳಲ್ಲಿ ಕಾಡದಷ್ಟು ಸಮಸ್ಯೆಗಳನ್ನು ಮತ್ತು ಸಾಧ್ಯತೆಗಳನ್ನು ಒಟ್ಟಿಗೇ ತಂದಿಟ್ಟ ಶ್ರೇಯ ಇಲ್ಲಿನ ಮಳೆಗೆ ಅನ್ನೋ ಮಾತನ್ನಂತೂ ತಳ್ಳಿ ಹಾಕೋಕೆ ಸಾಧ್ಯವಿಲ್ಲ ಅನ್ನುತ್ತಾ ಸದ್ಯಕ್ಕೊಂದು ವಿರಾಮ. 

ಮೆಕ್ಸಿಕೋ ಮಳೆಗಾಲ

ನಾವು ಸಣ್ಣವರಿದ್ದ ದಿನಗಳಲ್ಲಿ ಮಳೆಗಾಲ ಬಂತಂದ್ರೆ ಕಂಬಳಿಕೊಪ್ಪೆ ತಯಾರಿಮಾಡೋ ಬಗ್ಗೆಯೋ, ಕೆಲಸಕ್ಕೆ ಹೋಗೋಕೆ ಪ್ಲಾಸ್ಟಿಕ್ ಕೊಪ್ಪೆ ಮಾಡೋ ಬಗ್ಗೆಯೋ, ಮಳೆಗಾಲಕ್ಕಾಗುವಷ್ಟು ಹಪ್ಪಳ-ಸಂಡಿಗೆ ಮಾಡೋ ಬಗ್ಗೆಯೋ ಮಾತುಕತೆ ನಡೆಯುತ್ತಿತ್ತು. ಶಾಲಾ ಕಾಲೇಜಿಗೆ ಹೋಗೋ ಸಮಯದಲ್ಲಿ ರೈನ್ ಕೋಟು, ಛತ್ರಿ ಖರೀದಿಯ ಬಗ್ಗೆಯೋ, ಸೈಕಲ್ಲಿಗೆ ಓವರಾಲ್ ಮಾಡಿಸೋ ಬಗ್ಗೆಯೋ ಚರ್ಚೆ ನಡೆಯುತ್ತಿತ್ತು. ಬೆಂಗಳೂರಿಗೆ ಬಂದ ದಿನಗಳಲ್ಲಿ ಇವತ್ತು ಮಳೆ ಬರತ್ತಾ ಇಲ್ಲವಾ, ಯದ್ವಾ ತದ್ವಾ ಮಳೆಯಾಗಿ ರಸ್ತೆಗಳೆಲ್ಲಾ ಮುಳುಗಡೆಯಾಗಿ ಆಫೀಸಿಗೇನಾದ್ರೂ ರಜೆ ಸಿಕ್ಕಬಹುದಾ ಅಂತಲೋ, ಆಫೀಸಿಗೋಕೋಕೆ ಆಗದೇ ಇದ್ದರೂ ಕರೆಂಟಿಲ್ಲದಿದ್ದರೂ ವರ್ಕ್ ಫ್ರಂ ಹೋಮ್ ಮಾಡಿ ಅಂತೇನಾದ್ರೂ ಕಾಲ್ ಬರಬಹುದಾ ಅನ್ನೋ ಆಲೋಚನಾ ಲಹರಿಗಳಿರುತ್ತಿದ್ದವು. ಆದರೆ ಮೆಕ್ಸಿಕೋಕೆ ಬಂದ ಮೇಲೆ ಮಳೆಗಾಲ ಅಂದ್ರೆ ಹೊಸ ಬೆಡ್, ಹೊಸ ಮೊಬೈಲ್ ತಗೊಳ್ಳೋ ಕಾಲ ಅನ್ನುವಂತಾಗೋಯ್ತು !. ಯಾಕೆ ಅಂದ್ರಾ ? ಅದೇ ಇವತ್ತಿನ ಲೇಖನದ ವಿಷಯ

೮.೫ ಮತ್ತು ೭.೧ ತೀವ್ರತೆಯ ಭೂಕಂಪಗಳು ಎರಡು ವಾರಗಳಲ್ಲಿ ಆಗಿ ಮೆಕ್ಸಿಕೋದಲ್ಲಿದ್ದವರ ಮತ್ತು ಅವರಿಗೆ ಸಂಬಂಧಪಟ್ಟಂತೆ ವಿಶ್ವದಾದ್ಯಂತ ಇದ್ದವರನ್ನ ನಡುಗಿಸಿದ್ದವು. ಮೆಕ್ಸೀಕೋ ದೇಶದಲ್ಲಿ ಭಾರತೀಯರು ಹೆಚ್ಚಿರುವ ಗ್ವಾದಲಹರ ಮತ್ತು ಮಾಂಟೆರರಿ ನಗರಗಳಿಗೆ ಏನೂ ಆಗದಿದ್ದರೂ, ಮೆಕ್ಸಿಕೋ ನಗರದಲ್ಲೇ ಇದ್ದ ಭಾರತೀಯರಿಗೆ ಹೆಚ್ಚೇನೂ ತೊಂದರೆಯಾಗದಿದ್ದರೂ ಭೂಕಂಪಗಳು ತಂದಿತ್ತ ಭಯ ಅಷ್ಟಿಷ್ಟಲ್ಲ. ಕಣ್ಣೆದುರೇ ಮಗುಚಿ ಬಿದ್ದ ಕಟ್ಟಡಗಳ ಕಂಡವರಿಗೆ ದಿನಗಟ್ಟಲೇ ನಿದ್ದೆಯಿಲ್ಲ. ಬೆಳಗಾಗೆದ್ದು ನ್ಯೂಸ್ ನೋಡಿದ ಅವರ ಭಾರತದಲ್ಲಿದ್ದ ಹೆತ್ತವರಿಗೆ ಮಕ್ಕಳಿಗೆ ಕಾಲ್ ಮಾಡೋವರಿಗೆ ಸಮಾಧಾನವಿಲ್ಲ. ಭಾರತಕ್ಕಿಂದ ಹದಿಮೂರೂವರೆ ಘಂಟೆ ಹಿಂದಿರುವ ಕಾರಣ ರಾತ್ರಿಯಿಡೀ ಭಾರತದಿಂದ ಬರುತ್ತಿದ್ದ ಕಾಲು, ಮೆಸೇಜುಗಳಿಗೆ ಉತ್ತರಿಸುತ್ತಾ ಇಷ್ಟೆಲ್ಲಾ ಜನರಿಗೆ ನಮ್ಮ ಮೇಲಿರೋ ಕಾಳಜಿಗೆ ಖುಷಿ ಪಡೋದಾ ? ಅಥವಾ ಅದೇ ಉತ್ತರ ಎಲ್ಲರಿಗೂ ಹೇಳೇಳಿ ಬೇಜಾರು ಮಾಡ್ಕೊಳ್ಳೋದಾ ಗೊತ್ತಾಗುತ್ತಿರಲಿಲ್ಲ. ವಾರಗಟ್ಟಲೆ ಇಲ್ಲಿನ ವೃತ್ತಪತ್ರಿಕೆಗಳಲ್ಲಿ ಬಿದ್ದ ಕಟ್ಟಡಗಳ , ನೊಂದ ಜೀವಗಳ ಸುದ್ದಿಯೇ.  ಮೂರನೆಯ ವಾರ ನಾಲ್ಕರ ತೀವ್ರತೆಯ ಮತ್ತೊಂದು ಭೂಕಂಪವಾದರೂ ಅದರ ಬಗ್ಗೆ ತಲೆಕೆಡಿಸಿಕೊಳ್ಳುವಷ್ಟು ಸಮಯವಿರಲಿಲ್ಲ. ಮೊದಲೆರಡರಿಂದ ಹಾನಿಗೊಳವಾದವರಿಗೆ ನೆರವಾಗಬೇಕಲ್ಲ. ಕೆಂಪೆನಿಗಳು, ಎನ್ಜಿವೋ ಗಳು ತಮ್ಮ ಉದ್ಯೋಗಿಗಳಿಂದ ಬಟ್ಟೆ, ಆಹಾರ, ದುಡ್ಡು.. ಹೀಗೆ ಕೈಲಾದದ್ದನ್ನು ಸಂಗ್ರಹಿಸಿ ಹಂಚೋ ಪ್ರಯತ್ನದಲ್ಲಿದ್ದಾಗ ನಮ್ಮಿಂದಲೂ ಆದಷ್ಟು ಸಹಾಯ ಮಾಡೋ ಭಾವ. ದೇವರ ದಯೆಯಿಂದ ನಮಗೇನೋ ಆಗಿಲ್ಲವಲ್ಲ ಅನ್ನೋ ನೆಮ್ಮದಿಯ ನಿಟ್ಟುಸಿರು ಕೂಡ. 

ಭೂಕಂಪಗಳು ಸಾಕಾಗಿಲ್ಲ ಅಂತ ಅವುಗಳ ಜೊತೆ ಚಂಡಮಾರುತ ಇರ್ಮ ದ ಕಾಟ ಬೇರೆ. ಮಾಂಟೆರರಿ ಮುಂತಾದ ನಗರಗಳಲ್ಲಿ ಚಂಡಮಾರುತ ನೇರವಾಗಿ ಕಾಡದಿದ್ದರೂ ಅದರ ಪರೋಕ್ಷ ಪರಿಣಾಮಗಳು ಕಾಡುತ್ತಿದ್ದವು. ಇದ್ದಕ್ಕಿದ್ದಂಗೆ ಶುರುವಾಗಿ ಧೋ ಎಂದು ಸುರಿಯೋ ಮಳೆ. ಸಾಯಂಕಾಲ ಶುರುವಾದ್ರೆ ರಾತ್ರೆಯವರೆಗೂ ಬಿಡುವಿಲ್ಲದೇ ಸುರಿಯೋ ಕುಂಭದ್ರೋಣ ಮಳೆ. ಸಂಜೆಯೆಲ್ಲ ಮೋಡ ಮುಸುಕಿದ ವಾತಾವರಣವಿದ್ದರೆ ಮಧ್ಯರಾತ್ರಿಯೆಲ್ಲೋ ಶುರುವಾಗೋ ಮಳೆಗೆ ಬೆಳಗಾಗೋ ಹೊತ್ತಿಗೆ ಕಂಡಲ್ಲೆಲ್ಲಾ ನೀರು. ಇಂತದ್ದೇ ಒಂದು ರಾತ್ರಿ ಸುರಿದ ಮಳೆಗೆ ಟ್ರಾನ್ಸ್ ಫಾರ್ಮರ್ ಉಡೀಸ್ ಆಗಿ ಆಫೀಸಿಗೆ ೪ ಪಟ್ಟು ಹೆಚ್ಚು ದುಡ್ಡು ಕೊಟ್ಟು ತಲುಪಿದ್ದ ನಮಗೆಲ್ಲಾ ಆಘಾತ.ದಿನಾ ಬರುವ ಮುಕ್ಕಾಲು ಕಿ.ಮೀ ಸುರಂಗದ ಲೈಟುಗಳೆಲ್ಲಾ ಬಂದಾಗಿ ಬೆಳಗ್ಗೆಯೂ ಘೋರ ಕತ್ತಲೆ. ಟ್ರಾಫಿಕ್ ಲೈಟುಗಳೆಲ್ಲಾ ಬಂದು, ನೀರು ನಿಂತ ರಸ್ತೆಗಳಲ್ಲಿ ದಿನಾ ಇರಬೇಕಾದ ಚೆಂದದ ಪೋಲೀಸವಳೂ ಇಲ್ಲ ! ಅಂತೂ ಆಫೀಸಿಗೆ ತಲುಪಿದ್ರೆ ಅಲ್ಲೂ ಕತ್ತಲ ಸಾಮ್ರಾಜ್ಯ. ಆಫೀಸಲ್ಲಿದ್ದ ಪವರ್ ಬ್ಯಾಕಪ್ಪೂ ಮಟಾಷ್ ಆಗಿ ಇಂಟರ್ನೆಟ್ಟಿದೆ. ಕರೆಂಟಿಲ್ಲ. ಲ್ಯಾಪ್ಟಾಪಲ್ಲಿ ಪವರಿರುವಷ್ಟು ಹೊತ್ತು ಕತ್ತಲಲ್ಲೇ ಕೆಲಸ ಮಾಡಿ ಮನೆಗೆ ಹೋಗಿ ಕನೆಕ್ಟ್ ಮಾಡಿ ಅನ್ನೋ ಆದೇಶ ಅಲ್ಲಿಯವರಿಂದ. ಅಂತೂ ಹೀಗೇ ಮುಕ್ಕಾಲು ಘಂಟೆ ಕಳೆಯುವಷ್ಟರಲ್ಲಿ ಟ್ರಾನ್ಸ್ ಫಾರ್ಮರ್ ಸರಿಯಾಗಿ ಕರೆಂಟ್ ಬಂತು ಅನ್ನುವಲ್ಲಿಗೆ ಅವತ್ತಿನ ವ್ಯಥೆ ಕೊನೆಯಾಗಿತ್ತು. 

 

ಮಳೆಗಾಲದ ಆಟಗಳು ಅಲ್ಲಿಗೇ ಮುಗಿಯಲಿಲ್ಲ. ಆ ದಿನ ರಾತ್ರಿಯೇ ನಾವೆಲ್ಲಾ ಮಲಗಿರುವಾಗ ಶುರುವಾದ ಭಯಂಕರ ಮಳೆಗೆ ಬೇಸ್ಮೆಂಟಿನಲ್ಲಿದ್ದ ನಮ್ಮ ಅಪಾರ್ಟ್ ಮೆಂಟಿಗೆ ನೀರು ನುಗ್ಗಿತ್ತು. ಮುರು ಅಂತಸ್ತುಗಳ ನಮ್ಮ ಕಟ್ಟಡದಲ್ಲಿ ಬಿದ್ದ ಮಳೆ ನೀರೆಲ್ಲಾ ನಮ್ಮ ರೂಮಿನ ಪಕ್ಕದಲ್ಲೇ ಕೆಳಕ್ಕೆ ಬಂದು ಹೊರ ಹೋಗೋ ವ್ಯವಸ್ಥೆ. ಮೇಲಿನವರು ಎಸೆದ ತೋರ್ತಿಲ್ಲ(ರೊಟ್ಟಿಯಂತಹ ತಿಂಡಿ) ಮುಂತಾದ ಖಾಲಿ ಕವರುಗಳಿಂದ ನೀರು ಹೊರಹೋಗೋ ಜಾಗ ಬ್ಲಾಕಾಗಿ ನೀರಿಗೆ ಹೊರಹೋಗೋಕೆ ಕಷ್ಟವಾಗಿತ್ತು ಅಂತ ಹಿಂದಿನ ದಿನಗಳ ಮಳೆಯಿಂದ ನಮಗೆ ಅಂದಾಜಾಗಿರಲಿಲ್ಲ. ಬಿದ್ದ ಭಾರೀ ಮಳೆಗೆ ನೀರು ಹೊರಹೋಗೋಕೆ ಜಾಗವಿಲ್ಲದೆ ನಮ್ಮ ರೂಮಿಂದ ಆ ಪ್ಯಾಸೇಜಿಗೆ ಹೋಗೋ ಜಾಗವೆಲ್ಲ ಬಂದಾಗಿ ಅಲ್ಲಿದ್ದ ಬಾಗಿಲಿನ ಮೂಲಕ ಮನೆಗೆ ನೀರು ನುಗ್ಗಿತ್ತು. ಹತ್ತಿರದಲ್ಲಿದ್ದ ಅಡಿಗೆ ಮನೆ, ಹಾಲುಗಳನ್ನೆಲ್ಲಾ ಆವರಿಸಿದ ನೀರು ನಂತರದ ಬಚ್ಚಲುಗಳನ್ನೂ ದಾಟಿ ಮುಂದಿದ್ದ ನನ್ನ ರೂಮಿಗೆ ಬಂದರೂ ನನಗೆ ಎಚ್ಚರವಿಲ್ಲ. ಪಕ್ಕದೆರೆಡು ರೂಂ ಮೇಟುಗಳ ಕಾಟಿನ ಮೇಲೆ ಬೆಡ್ಡಿದ್ದರಿಂದ ಅವರಿಗೆ ಅಷ್ಟೇನೂ ತೊಂದರೆಯಾಗದಿದ್ದರೂ ಅವರು ಎಚ್ಚರವಾಗಿ ನೀರು ಹೊರಚೆಲ್ಲೋ ಕೆಲಸದಲ್ಲಿ ತೊಡಗಿದ್ದರು. ಹೊಸದಾಗಿ ಬಂದವನಾದ ನಾನು ಕಾಟಿಲ್ಲದೇ ನೆಲದ ಮೇಲೆ ಬೆಡ್ ಹಾಕಿದ್ದೆ. ಮಲಗಿದ್ದವನಿಗೆ ಕಾಲ್ಯಾಕೋ ತೇವವಾದಂತಿದೆಯಲ್ಲ ಅನಿಸಿ ಎದ್ದು ನೋಡಿದರೆ ಸುತ್ತೆಲ್ಲಾ ನೀರು ! ತೆಪ್ಪದಲ್ಲಿ ಕೂತವನಿಗೆ ಕಾಣುವಂತೆ ಸುತ್ತೆಲ್ಲಾ ನೀರು ! ಪಕ್ಕ ನೋಡಿದ್ರೆ ಚಾರ್ಜಿಗಿಟ್ಟಿದ್ದ ಮೊಬೈಲು ನೀರಲ್ಲಿ ತೇಲಾಡುತ್ತಿತ್ತು. ಲ್ಯಾಪ್ಟಾಪಿನ ಬ್ಯಾಗೂ ನೀರಲ್ಲಿ ಒದ್ದೆಯಾಗಿದೆ. ಎದ್ದೆನೋ ಬಿದ್ದೆನೋ ಅಂತ ಮೊಬೈಲನ್ನು ಚಾರ್ಜಿಂಗಿದ ತೆಗೆದೆ. ಲ್ಯಾಪ್ಟಾಪನ್ನು ಬ್ಯಾಗಿಂದ ತೆಗೆದು ಆದಷ್ಟು ನೀರೊರೆಸಿ ಮೇಲಿಟ್ಟೆ. ಆಫೀಸಿನ ಲ್ಯಾಪ್ಟಾಪು ಮಟ ಹತ್ತಿದರೆ ಎಷ್ಟು ದಂಡ ಕಟ್ಬೇಕಾಗತ್ತಪ್ಪ ಅನ್ನೋ ಭಯ. ಅದನ್ನು ಸದ್ಯಕ್ಕೆ ಅತ್ತಲಿರಿಸಿ ಮೊಬೈಲಿನ ಬ್ಯಾಟರಿ ತೆಗೆದು ಅಕ್ಕಿ ಡಬ್ಬದೊಳಗಿಟ್ಟೆ. ಮಧ್ಯರಾತ್ರಿ ಒಂದೂವರೆಯಾಗಿದೆ. ರೂಮಲ್ಲೆಲ್ಲಾ ನೀರು. ರೂಮಲ್ಲೇನು, ಎಲ್ಲೆಡೆ ನೀರು. ರೂಂ ಮೇಟು ಅವನ ರೈನ್ ಕೋಟ್ ಹೊರತೆಗೆದು ಹೊರಗಡೆಯಿದ್ದ ಮಳೆನೀರು ಹೋಗೊಕೆ ಇದ್ದ ಬ್ಲಾಕ್ ಸರಿ ಮಾಡಿ ಬರೋ ಹೊತ್ತಿಗೆ ನಾನು ಮತ್ತು ಮತ್ತೊಬ್ಬ ರೂಂ ಮೇಟು ನೀರು ಹೊರಹಾಕೋ ಪ್ರಯತ್ನದಲ್ಲಿದ್ದೆವು. ಸ್ವೀಪರ್ ಇಲ್ಲದ ಕಾರಣ ನೀರನ್ನು ಮಗೆದು ಹೊರಹಾಕೋದು ಕಷ್ಟದ ವಿಷಯವೇ. ಮೊಪ್ ಇಂದ ಎಷ್ಟೂಂತ ಗುಡಿಸೋದು ಅಥವಾ ಕಾಲುಗಳಿಂದ ಎಷ್ಟೂಂತ ತಳ್ಳೋದು ? ಆಗ ಹೊಳೆದ ಐಡಿಯಾವೇ ಬೆಡ್ ಶೀಟು !

ಬೆಡ್ ಶೀಟನ್ನೇ ನೀರಲ್ಲಿ ಉದ್ದ ಹಾಸೋದು. ಅದು ಹೀರಿಕೊಳ್ಳೋ ನೀರ ಜೊತೆಗೆ ಅದನ್ನು ಹೊರಗೆಳೆದು ಹಿಂಡೋದು ಅನ್ನೋ ಐಡಿಯಾ ವರ್ಕಾಯ್ತು. ಎರಡೂ ಕಾಲವರೆಗೂ ಎಳೆದೆಳೆದು ಕೈಗಳೆಲ್ಲಾ ನೋವ ತೊಡಗಿ ಉಳಿದೆರೆಡು ರೂಂ ಮೇಟುಗಳು ನಾವು ಸ್ವಲ್ಪ ಹೊತ್ತು ಮಲಗ್ತೀವಿ ಅಂತ ಹೊರಟ್ರು. ಮತ್ತೆ ನೀರು ನುಗ್ಗಿದ್ರೆ ಗೊತ್ತಾಗ್ಲಿ ಅಂತ ಹಾಲ ಮತ್ತು ಅಡಿಗೆ ಮನೆಯ ಲೈಟುಗಳ ಹಾಗೇ ಇಟ್ಟೆವು. ಅವರ ಮಂಚಗಳೇನೂ ಆಗಿರಲಿಲ್ಲ. ಆದ್ರೆ ನನ್ನ ಬೆಡ್ ಪೂರ್ತಿ ನೀರು ಮಯ. ನಾ ಮಲಗೋದೆಲ್ಲಿ ? ನೀವು ಮಲ್ಕೊಳ್ಳಿ ನಾನು ಉಳಿದ ನೀರ ಸಾಧ್ಯವಾದಷ್ಟು ತಳ್ತೀನಿ ಅಂತ ನೋಯುತ್ತಿದ್ದ ಕೈಗಳಲ್ಲಿ ನಾ ಎರಡನೆಯ ಇನ್ನಿಂಗ್ಸಿಗೆ ಮುಂದಾದೆ. ಬರೀ ಮಳೆ ನೀರಾಗಿದ್ರೆ ಬೇಜಾರಾಗ್ತಿರಲಿಲ್ಲ. ಅದು ಕಾಲೊರೆಸೋ ಮ್ಯಾಟಿನ ಮಣ್ಣು, ಬಾತ್ರೂಮಿನ ಹೊರಗಿದ್ದ ಕಸ ಎಲ್ಲವನ್ನೂ ತಂದು ಎಲ್ಲೆಡೆ ಹರಡಿತ್ತು. ಬೆಡ್ಡನ್ನು ಗೋಡೆಗೆ ಸಾಚಿದ್ರೆ ಅದರೊಳಗಿಂದ ಮಳೆಗಾಲದಲ್ಲಿ ಗುಡ್ಡದಿಂದ ಜಿಮುರುವಂತೆ ನೀರು ಜಿಮುರುತ್ತಿತ್ತು. ಅದರ ಕೆಳಗೆ ಒರಸಿ ರೂಮಿನ ಒಂದು ಮೂಲೆ ಉರಸುವಷ್ಟರಲ್ಲಿ ಬೆಡ್ಡಿಂದ ಮತ್ತಷ್ಟೆ ನೀರು ! ಅಂತೂ ಇಂತೂ ರೂಂ ಕ್ಲೀನ್ ಮಾಡಿ ಹೊರಗಡೆಯಿದ್ದ ನೀರು ಮುಕ್ಕಾಲು ಭಾಗ ಖಾಲಿ ಮಾಡಿ ಹೊರಗಡೆಯಿದ್ದ ಏಸಿಯ ಫ್ಯಾನನ್ನು ಹಾಕುವಷ್ಟರಲ್ಲಿ ಮುಖದಲ್ಲೆಲ್ಲಾ ಬೆವರ ಧಾರೆ ! ಘಂಟೆ ಎರಡೂಮುಕ್ಕಾಲಾಗುತ್ತಾ ಬಂದಿತ್ತು. ಮತ್ತೊಮ್ಮೆ ಹೊರಗೋಗಿ ಮತ್ತೆ ಬ್ಲಾಕಾಗೋಕೆ ರೆಡಿಯಾಗಿದ್ದ ನೀರು ಹೊರಹೋಗೋ ದಾರಿಯನ್ನು ಸರಿ ಮಾಡಿ ಅಲ್ಲಿದ್ದ ಕಸವೆಲ್ಲಾ ಹೊರಹೋಗಿ ನೀರು ಸಾಮಾನ್ಯವಾಗಿ ಹೋಗ್ತಿದೆ ಅಂತ ಖಾತ್ರಿಪಡಿಸಿಕೊಂಡೇ ಒಳಬಂದೆ. 

ಘಂಟೆ ಮೂರಾಗ್ತಾ ಬಂದಿದೆ. ಆದ್ರೇನು. ಬೆಳಗ್ಗೆ ಆಫೀಸಿಗೆ ಏಳಲೇಬೇಕು. ಏಳೋದಾದ್ರೂ ಹೇಗೆ ? ಅಲಾರಾಮಿಡಲು ಮೊಬೈಲು ಬ್ಯಾಟರಿಯಿಲ್ಲದೆ ಅಕ್ಕಿಡಬ್ಬದಲ್ಲಿ ಮಲಗಿದೆ. ಇನ್ನೊಂದು ಮೊಬೈಲು ನೋಡೋಣ ಅಂದರೆ ಅದರಲ್ಲಿ ಚಾರ್ಜೇ ಇಲ್ಲದೆ ಅದು ಆನೂ ಆಗುತ್ತಿಲ್ಲ. ಅದರ ಚಾರ್ಜರ್ ಹುಡುಕಿ ಅದನ್ನು ಚಾರ್ಜಿಗೆ ಹಾಕಿ ಹದಿನೈದು ನಿಮಿಷ ಕಷ್ಟಪಟ್ಟು ನಿದ್ರೆ ತಡೆದುಕೊಳ್ಳೋ ಹೊತ್ತಿಗೆ ಅದಕ್ಕೆ ಸ್ವಲ್ಪ ಜೀವ ಬಂತು. ಅದರಲ್ಲಿ ಬೆಳಗ್ಗಿಗೆ ಅಲಾರಾಮಿಟ್ಟು ಒದ್ದೆಯಾಗದೇ ಇದ್ದ ಒಂದು ಜೊತೆ ಬೆಡ್ ಶೀಟುಗಳನ್ನೇ ಹಾಸಿಕೊಂಡು ಮಲಗಿಬಿಟ್ಟೆ. ಹಾಸಿಗೆಯ ಮೇಲೆ ಮಲಗಿದ್ದವರಿಗೆ ಖಾಲಿ ಬೆಡ್ ಶೀಟಿನ ಮೇಲೆ ನಿದ್ದೆಯಾದ್ರೂ ಹೇಗೆ ಬರಬೇಕು ?   ಮಾರನೆಯ ದಿನ ನನಗೆ ಕಾದಿರಬಹುದಾದ ಇನ್ನಷ್ಟು ಆಘಾತಗಳ ಅರಿವಿಲ್ಲದಿದ್ದರಿಂದ ಆ ರಾತ್ರಿಯ ಸುಸ್ತಿನಿಂದ ಮಲಗಿದಲ್ಲೇ ನಿದ್ದೆ ಹತ್ತಿತ್ತು

ನಾನೋದಿದ ಪುಸ್ತಕ - ಅಷ್ಟಾವಕ್ರ ೧,೨

ಯಂಡಮೂರಿ ವೀರೇಂದ್ರನಾಥರ "ತುಳಸಿ", "ತುಳಸೀ ದಳ" ಕಾದಂಬರಿಗಳನ್ನು ಓದಿದ್ದರೆ, ಅವು ಇಷ್ಟವಾಗಿದ್ದರೆ ಇಷ್ಟವಾಗಬಹುದಾದ ಮತ್ತೆರಡು ಪುಸ್ತಕಗಳು "ಅಷ್ಟಾವಕ್ರ ಭಾಗ ೧" ಮತ್ತು "ಅ.ಭಾಗ ೨" ಆ ಕತೆಗಳಲ್ಲಿ ಬರುವ ಕ್ಷುದ್ರ ದೇವತೋಪಾಸಕರಾದ ವಿಷಾಚಿ, ಕಾದ್ರಾ, ದಾರ್ಕಾ ಮಾಂತ್ರಿಕರು, ಕುಟ್ಟಿ ಸೈತಾನ್,ಕಾಷ್ಮೋರ,ಖೇಛರಿ ಮುದ್ರೆಗಳ ಮೆಲುಕು,ಪಾತ್ರಗಳಾದ ಸಂತಾನ್ ಫಕೀರ, ಶ್ರೀಧರರ ನೆನಪು ಇಲ್ಲೂ ಬಂದರೂ ಆ ಕತೆಗೂ ಈಕತೆಗೂ ಸುಮಾರು ೨೫ ವರ್ಷಗಳ ಅಂತರವಿದೆ. ಅದೇನು ಅಂದಿರಾ ? ಮೊದಲೆರಡು ಭಾಗಗಳಲ್ಲೂ ಇಲ್ಲಿಯೂ ಇರುವ ಏಕೈಕ ಪಾತ್ರ ಪ್ರೊಫೆಸರ್ ಜಯದೇವ್ ಆದರೂ ಇದರಲ್ಲಿ ಬರುವ ಪ್ರಧಾನ ಪಾತ್ರಗಳಲ್ಲಿ ಅವರ ಮೊಮ್ಮಗಳು ರಂಜಿತಾ ಬರುತ್ತಾಳೆ. ಹಿಂದಿನ ಕತೆಯಲ್ಲಿ ಮುಖ್ಯ ಪಾತ್ರವಾಗಿದ್ದ ಯುವಕ ಜಯದೇವ್ ಗೆ ಇಪ್ಪತ್ತೈದು ವರ್ಷಗಳಲ್ಲಿ ಮೊಮ್ಮಗಳಾಗಿ ಅವಳೂ ಬಿ.ಎಸ್ಸಿ ಓದುವಷ್ಟು  ದೊಡ್ಡವಳಾಗಿದ್ದು ಹೇಗಪ್ಪಾ ಅನ್ನುವಂತಹ ಪ್ರಶ್ನೆ ಬಂದರೂ ಮೊದಲೆರಡು ಕಾದಂಬರಿಗಳಲ್ಲಿದ್ದಷ್ಟು ಈ ತರದ ಲಾಜಿಕ್ಕಿಗೆ ಪ್ರಾಮುಖ್ಯತೆಯಿಲ್ಲವೇನೋ ಅನಿಸುತ್ತದೆ. ಕಾದಂಬರಿಯ ಮಧ್ಯದಲ್ಲೇ ಬರುವ ರಾಕೇಶನೆಂಬ ಪಾತ್ರ ತಾಳೆಗರಿಯಲ್ಲಿವ ಮಾಹಿತಿಯನ್ನು ಡಿಕೋಡ್ ಮಾಡಿದಾಗ ಅದರಲ್ಲಿರುವ ನಾಲ್ಕನೆಯ ಅಂಶ ಕ್ಷುದ್ರಯಜ್ಞವನ್ನು ನಡೆಸುವುದರ ಬಗ್ಗೆಯಾಗಿರುತ್ತದೆ. ಆದರೆ ಆ ತಾಳೆಗರಿಯ ಪ್ರಸ್ತಾಪವನ್ನು ಮತ್ತೊಂದು ಪಾತ್ರವಾದ ಸಿದ್ದಾರ್ಥನ ಬಳಿ ಮಾಡುವಾಗ ನಾಲ್ಕನೆಯ ಅಂಶ ಸೂಫಿ ಅಕ್ಷರಗಳ ಬಗ್ಗೆಯಾಗಿತ್ತು ಎಂದು ತಿಳಿಸುತ್ತಾನೆ. ತಾಳೆಗರಿಯಲ್ಲಿ, ಕಾದಂಬರಿಯಲ್ಲಿ ಉಲ್ಲೇಖವೇ ಇರದ ಸೂಫಿಯ ವಿಷಯ ಇದ್ದಕ್ಕಿಂದಂತೆ ಪ್ರತ್ಯಕ್ಷವಾಗೋದೇಕೆ ? ಮೊದಲೆರಡು ಕಾದಂಬರಿಯಲ್ಲಿ ನಾಡಿಗಳ, ಚಕ್ರಗಳ, ಗಾಯತ್ರೀ ಮಂತ್ರದ ಪ್ರಸ್ತಾಪವಾದ್ದರಿಂದ ಈ ಸಲ ಸೂಫಿಸಂ ಬಂತೇ ಅನ್ನೋ ಅನುಮಾನ ಕಾಡಿದರೂ ಆಶ್ಚರ್ಯವಿಲ್ಲ. ಈ ತರದ ಋಣಾತ್ಮಕ ಅಂಶಗಳನ್ನು ಬದಿಗಿಟ್ಟು ನೋಡುವುದಾದರೆ
ಪಾತ್ರಗಳ ವೈವಿಧ್ಯತೆಯಲ್ಲಿ, ಅವುಗಳ ಪೋಷಣೆ ಮತ್ತು ಸಂಬಂಧಗಳ ಸೃಷ್ಠಿಯಲ್ಲಿ ಮೊದಲೆರಡು ಕಾದಂಬರಿಗಳಿಗಿಂತಲೂ ಚೆನ್ನಾಗಿರುವ ಇದನ್ನು ಮೊದಲೆರೆಡು ಕಾದಂಬರಿಗಳಿಗೆ ಸಂಬಂಧವಿಲ್ಲದ ಒಂದು ಕಾದಂಬರಿಯಂತೆಯೇ ಓದಿದರೆ ಇದರ ರಸಾಸ್ವಾದನೆ ಮಾಡಬಹುದು.

ಈ ಕಾದಂಬರಿಯಲ್ಲಿ ಚೈನೀಸ್, ಜಪಾನೀಸ್ ಬ್ರೈನ್ ವಾಷಿಂಗ್, ಅಗ್ರಿಕಲ್ಚರಲ್ ಬಿ.ಎಸ್ಸಿ, ಜೀನುಗಳ ಬಗ್ಗೆ ಹೇಳುವ  ಜೆನೆಟಿಕ್ಸ್, ರೋಗಗಳ ಬಗೆಗಿನ ಪೆಥಾಲಜಿ, ವಿಕಿರಣ ಬಗ್ಗೆ ಹೇಳೋ ರೆಂಟ್ಜನ್ , ಥರ್ಮೋ ನ್ಯೂಕ್ಲಿಯರ್ ಬಾಂಬ್ಗಳು, ಭ್ರಮಾಸ್ತಿತಿಯಲ್ಲಿನ ಜನರ ಮನೋಸ್ಥಿತಿ,ಹಳ್ಳಿಗರಲ್ಲಿನ ಮೂಢ ನಂಬಿಕೆಗಳು ಮತ್ತದನ್ನು ದುರುಪಯೋಗ ಮಾಡಿಕೊಳ್ಳೋ ಜನರು,  ಕೃತಕ ಗರ್ಭಧಾರಣೆಯ ಐ.ವಿ.ಎಚ್ ಮತ್ತು ಐ.ವಿ.ಡಿ ತಂತ್ರಜ್ಞಾನಗಳು, ಯಕ್ಷಿಣಿ, ಕ್ಷುದ್ರದೇವತೋಪಾಸನೆ,ಕಮ್ಯುನಿಸಂ, ರಹಸ್ಯವಾಗಿ ಕಾರ್ಯನಿರ್ವಹಿಸೋ ದೇಶವೊಂದರ ಪ್ರಧಾನಿಯನ್ನೋ ಕೊಲ್ಲಲು ಮುಂದಾಗೋ ಎಸ್ಸೋಕ್ ಎಂಬ ಸಂಘಟನೆ, ಅಂಗವೈಕಲ್ಯತೆಯಿರುವ ಜನರಲ್ಲಿರುವ ಕೀಳರಿಮೆ ಮುಂತಾದ ಹಲವಾರು ವಿಷಯಗಳನ್ನು ತರಲಾಗಿದೆ.ಯಕ್ಷಿಣೆಯ ರೂಪಕವಾಗಿ ರಂಜಿತಾ, ವೈಟ್ ಶಾಡೋ/ರವಿ, ಫ್ರೊಫೆಸರ್ ರವಿ ಬಂದರೆ , ತಮ್ಮ ಮನೋವೈಕಲ್ಯಗಳಿಂದ ಜಗತ್ತಿಗೇ ಕಂಟಕರಾಗ ಹೊರಟ ಮಹಾದ್ರಷ್ರ/ಡಾ| ಹರಹರಿರಾವ್ , ಅವತಾರ್ ಬಾಬಾ/ಡಾ| ವಂಶೀಕೃಷ್ಣ ,ರಾಕೇಶ್ ಕಾಣಸಿಗುತ್ತಾರೆ. ಅರ್ಧಂಬದ್ರ ಕಮುನಿಷ್ಟರಾಗಿ ಶಂಕರಶಾಸ್ತ್ರಿ/ಭವಾನಿಶಂಕರ್, ಡಾ| ವಿಲಿಯಮ್ಸ್ ಕಂಡರೆ , ತಮ್ಮ ರೂಪ, ಅಂಗವೈಕಲ್ಯತೆಯ ಮೆಟ್ಟಿನಿಂತು ಯಾವ ಪರಿಸ್ಥಿತಿಗೂ ಎದೆಗುಂದದ ಹೋರಾಟಗಾರರಾಗಿ ಸಿದ್ದಾರ್ಥ ಮತ್ತು ಕೇದಾರಗೌರಿ ಕಾಣುತ್ತಾರೆ. ಸ್ಪರ್ಮ್ ಸೆಲ್ಲಿಂಗ್ ಏಜೆನ್ಸಿಯ ಮತ್ತು ಪರಿಸ್ಥಿತಿಯ ಕೈಗೊಂಬೆಗಳಂತೆ ಆಗುವ ಶೇಟ್ ದಂಪತಿ, ಕಾದಂಬರಿಗೆ ಹೊಸ ತಿರುವು ಕೊಡೋ ಡಾ| ನಿವೇದಿತಾ.  ಕ್ಲೈಮಾಕ್ಸಿನಲ್ಲಿ ಬರೋ ಸೂಫಿಯಲ್ಲಿನ ಅತ್ಯುನ್ನತ ಸಂತೆ ಮುರ್ಷಿದಾ , ಅಲ್ಲಲ್ಲಿ ಬರೋ ಬ್ಲೂ/ಬ್ಲಾಕ್/ವೈಟ್/ಯೆಲ್ಲೋ/ರೆಡ್ ಸ್ಕೆಲಿಟನ್ಗಳು ಪ್ರತೀ ಪುಟವನ್ನು ಕುತೂಹಲಕಾರಿಯಾಗಿಟ್ಟಿದ್ದಾರೆ. ಕಾದಂಬರಿಯಲ್ಲಿ ಬರೋ ಮತ್ತೊಂದು ಮುಖ್ಯ ಪಾತ್ರ ಡಾ| ರಂಗಪ್ರಸಾದ್. ಕೃತಕ ಗರ್ಭದಾರಣೆಯ ಪರವಿರೋಧಗಳ ಬಗ್ಗೆ ನಡೆಯೋ ವಿಚಾರವಿನಿಮಯಗಳು ಕಾದಂಬರಿ ಸೃಷ್ಠಿಯಾದಕಾಲವನ್ನು ಗಮನಿಸಿದಾಗ ಅಚ್ಚರಿಮೂಡಿಸದೇ ಇರವು. ಇದರಲ್ಲಿ ಮೂಡಿದ ಅನೇಕ ಚರ್ಚೆಗಳು ಇಂದಿಗೂ ಪ್ರಸ್ತುತ ಅನ್ನೋದೇ ಇಲ್ಲಿನ ಸ್ವಾರಸ್ಯ.

ಇಷ್ಟೆಲ್ಲಾ ಪಾತ್ರಗಳು ಬಂದಿದೆಯಲ್ಲಾ ಅವರೆಲ್ಲಾ ಯಾರು ಅಂದ್ರಾ ? ಕಾದಂಬರಿ ಮುಗಿಯೊ ಹೊತ್ತಿಗೆ ಅವರೆಲ್ಲಾ ಒಂದೇ ಎಳೆಯಲ್ಲಿ ಒಗ್ಗೂಡುತ್ತಾರೆ.ಈ ಸ್ಕೆಲಿಟನ್ನು, ಮುರ್ಷಿದಾ ಯಾರೆನ್ನೋ ಕುತೂಹಲಕ್ಕೆ ಕಾದಂಬರಿಯನ್ನೇ ಓದಬೇಕು. ಅದೆಲ್ಲಾ ಸರಿ, ಕಾದಂಬರಿಗೆ ಅಷ್ಟಾವಕ್ರ ಅಂತಲೇ ಹೆಸರಿಟ್ಟಿದ್ದೇಕೆ? ಅವನೇನು ವಿಲನ್ನಾ ? ಹೀರೋವಾ ಅನ್ನೋ ಪ್ರಶ್ನೆಗೆ ಸದ್ಯಕ್ಕೆ ಉತ್ತರ ಹೇಳಲಾರೆ. ಯಾಕೆಂದರೆ ಅಷ್ಟಾವಕ್ರನ ಜನನ ಮೇಲೆ ಬಂದ ಎಲ್ಲಾ ಪಾತ್ರಗಳಿಗೂ ಸಂಬಂಧಿಸಿದೇ ಆಗಿದೆ ! ಇನ್ನು ಕುಟ್ಟಿಸೈತಾನ್ ಮತ್ತು ಕಾಷ್ಮೋರಾ . ಮೊದಲೆರಡು ಕಾದಂಬರಿಗಳಲ್ಲಿ ಬಂದಷ್ಟು ಅಧಿಕವಾಗಿ ಇದರ ಬಗ್ಗೆ ಮಾಹಿತಿಯಿಲ್ಲದಿದ್ದರೂ ಅದನ್ನು ಇಂದಿನ ದಿನಕ್ಕೆ ಪ್ರಸ್ತುತವಾಗಿಸಿದ ಇಲ್ಲಿನ ರೀತಿ ಮೊದಲೆರಡಕ್ಕಿಂತ ಭಿನ್ನ. ಮೊದಲೆರಡರಲ್ಲಿ ಕ್ಷುದ್ರ ದೇವತೋಪಾಸನೆಯನ್ನು ಮನೋಶಾಸ್ತ್ರ, ವೈದ್ಯಕೀಯ ಶಾಸ್ತ್ರ, ಹಿಪ್ನಾಟಿಸಂಗಳೊಂದಿಗೆ ತಳುಕು ಹಾಕಿದ್ದರೆ ಇಲ್ಲದನ್ನು ಭ್ರಾಂತಿ, ಜೀನ್ ಮ್ಯುಟೇಷನ್, ಬ್ರೈನ್ ವಾಷಿಂಗ್ ಮುಂತಾದ ಅಂಶಗಳೊಂದಿಗೆ ಹೋಲಿಸಲಾಗಿದೆ. ಮೊದಲೆರಡರಲ್ಲಿ ವಿಜಯ ಯಾವುದರದ್ದು ಎಂದು ತೀರ್ಮಾನಿಸೋ ಆಯ್ಕೆಯನ್ನು ನಮಗೇ ಕೊಟ್ಟರೆ ಇಲ್ಲಿ ಬರೋ ಡಾ| ವಂಶೀಕೃಷ್ಣರ ಮಾತುಗಳುದೊಂದಿಗೆ ಒಂದು ಸಾಧ್ಯತೆಯನ್ನು ಲೇಖಕರೇ ಕೊಂದು ಹಾಕುತ್ತಾರೆ. ಆದರೂ ಹಿಡಿದ ಪುಸ್ತಕ ಕೆಳಗಿಳಲು ಬಿಡದಂತೆ ಓದಿಸಿಕೊಂಡ ಪುಸ್ತಕಗಳಿವು. ಒಮ್ಮೆ ಓದೋಎ ಯಾವ ಅಡ್ಡಿಯೂ ಇಲ್ಲ.

3k ರಾಜ್ಯೋತ್ಸವ ಸಂಭ್ರಮ

ನವೆಂಬರ್ ಒಂದಕ್ಕೆ ನಮ್ಮೂರಲ್ಲೇ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮ ಸಿಕ್ಕಿತ್ತು. ಹತ್ತಕ್ಕೆ ಆಫೀಸಲ್ಲೇ ನಡೆದ ರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ಅನಿರೀಕ್ಷಿತವಾಗಿ ನಿರೂಪಕನಾಗೋ ಭಾಗ್ಯವೂ ಸಿಕ್ಕಿತ್ತು. ನನ್ನ ಭಾವಯ್ಯನ ಹುಟ್ಟಿದಬ್ಬದ ದಿನದ ಸಂಭ್ರಮದಲ್ಲಿ, ಮುಂಬಯಿಯಲ್ಲಿ ಹುತಾತ್ಮರಾದವರ ನೆನಪು ಕಣ್ಣಂಚಿನ ನೀರಾಗೋ  ಹೊತ್ತಲ್ಲಿ 3k ಯ ಕಾರ್ಯಕ್ರಮ ಅವತ್ತು ಮಧ್ಯಾಹ್ನವೇ ಇರುವ ನೆನಪಾಗಿತ್ತು. ಅದಕ್ಕೆ ಸರಿಯಾಗಿ  ೧೬ ದಿನ ಮುಂಚೆ 3k ಯ ಕವನ ಸ್ಪರ್ಧೆಗೆ ಕವನ ಕಳಿಸಿದ್ದೂ ನೆನಪಾಗಿತ್ತು. ಎರಡು ದಿನ ಮುಂಚೆಯೇ 3k ಯ ನವೀನ್ ಅವರು ಫೋನ್ ಮಾಡಿ ಅವತ್ತು ಕವಿಗೋಷ್ಠಿಯೂ ಇರುವ ಬಗ್ಗೆ, ಅದಕ್ಕೆ ಬಂದು ಕವನವಾಚನದಲ್ಲಿ ಪಾಲ್ಗೊಳ್ಳಬೇಕೆಂದು 3k ಯ ಪರವಾಗಿ ಆಹ್ವಾನವಿತ್ತಿದ್ದೂ ನೆನಪಾಗಿ ನಾಗರಭಾವಿಯ ಭೈರವೇಶ್ವರ ಸಂದ್ರದ ಬಳಿಯಿರುವ ಬ್ಲಾಸಂ ಶಾಲೆಯತ್ತ ಹೊರಟು ನಿಂತೆ. ಮಧ್ಯಾಹ್ನ ೧:೩೦ ಕ್ಕೆ ಹೊರಟವನಿಗೆ ಶ್ರೀಕಾಂತಣ್ಣನೂ ಸಿಕ್ಕು ಬ್ಲಾಸಂ ಶಾಲೆ ತಲುಪೋ ಹೊತ್ತಿಗೆ ನಾಲ್ಕೂ ಕಾಲು.

ಕವಿ ಗೋಷ್ಠಿ:

ನಮ್ಮದ್ರುಷ್ಟಕ್ಕೆ ಅವತ್ತಿನ ಕಾರ್ಯಕ್ರಮವೂ ಲೇಟಾಗಿ ಮೊದಲ ಮೂವರ ಕಾವ್ಯವಾಚನ ಮುಗಿದು ನಾಲ್ಕನೇಯವರ ನೀಳ್ಗವನ ವಾಚನ ನಡೆಯುತ್ತಿತ್ತು . ಹೋಗಿ ಮಹೇಶ್ ಗೌಡ, ಗೋರವಿ ಮುಂತಾದವರ ಜೊತೆ ಹಾಯೆನ್ನೋ ಹೊತ್ತಿಗೆ, ಇವರು ಈಗ ಕವನ ಓದ್ತಾ ಇದ್ದಾರೆ ಅಂತ ನನ್ನೆಸರೇ ಕರೆದು ಬಿಡಬೇಕಾ ? ! ಇದೇನಪ್ಪಾ ಅಂದ್ಕೊಳ್ಳೋ ಹೊತ್ತಿಗೆ ಐದನೇಯವ ನಾನೇ ಅಲ್ವಾ ಅಂತ ನೆನಪಾಯ್ತು ! ಸರಿ ಅಂತ ಮೊಬೈಲಲ್ಲಿದ್ದ ಕವನ ಮೇಲೆ ತಂದು ಕೊಳ್ತಾ ವೇದಿಕೆಯತ್ತ ಹೆಜ್ಜೆ ಹಾಕೋ ಹೊತ್ತಿಗೆ ಸತೀಶ ಬಂದು ಹಾರ್ಡ್ ಕಾಪಿ ಕೊಡ್ತಾರೆ ತಡಿ ಅಂದ. ವೇದಿಕೆಯ ಬಳಿಯೇ ಇದ್ದ ರೂಪಕ್ಕ ಇದೇ ಅಲ್ವಾ ನಿಮ್ಮ ಕವನ ಅಂತ ತಮ್ಮತ್ರ ಇದ್ದ ಪ್ರಿಂಟೌಟ್ ಕೊಟ್ಟಿದ್ದು ಐನೂರು ರೂಪಾಯಿ ನೋಟವನಿಗೆ ಚೇಂಜ್ ಕೊಟ್ಟಂಗಾಗಿತ್ತು :-) ಪ್ರಶಸ್ತಿ ಅವರು ಬರ್ತಾರೆ ಅಂದಾಗ ಇದೇನು ಕಾವ್ಯ ನಾಮನಾ , ಉಪಮೆನಾ ಅಂತ ಗೊಂದಲದಲ್ಲಿ ಕೂತಿದ್ದ ಹಲವು ಮುಖಗಳು ನನ್ನತ್ತನೇ ನೋಡ್ತಿದ್ದವು. ವೇದಿಕೆಯ ಮೇಲಿದ್ದ ಶ್ರೀ ಮಣಿಕಾಂತ್ , ಶ್ರೀ ಮಂಜುನಾಥ್ ಕೊಳ್ಳೇಗಾಲ ಅವರು ಮತ್ತು ಶ್ರೀ ಅಶೋಕ್ ಅವರು ಕೂತಿರುವಾಗ ನಾನೇನಪ್ಪ ಓದೋದು ಅನ್ನೋ ಅಳುಕು ಬೇರೆ. ಬ್ಲಾಗಲ್ಲಿ, ಫೇಸ್ಬುಕ್ಕಲ್ಲಿ ಬರೆಯೋದು ಬೇರೆ, ಮೈಕ್ ಕೊಟ್ಟು ಕವನ ಓದು ಅನ್ನೋದು ಬೇರೆ. ಮಾತಾಡು ಅಂದ್ರೆ ಏನಾದ್ರೂ ಒಂದು ಮಾತಾಡ್ಬಹುದು. ಬರೆದಿರೋ ಕತೆಯನ್ನೋ, ಕವನವನ್ನೋ ಓದು ಅಂದ್ರೆ ಅದೆಷ್ಟು ಕಷ್ಟ ಅಂತ ಮೈಕ್ ಹಿಡಿದಾಗ್ಲೇ ಗೊತ್ತಾಗಿದ್ದು. ವೇದಿಕೆ ಅಂತ ಹತ್ತಿ ಕತೆಯನ್ನೋ ಕವನವನ್ನೋ ಓದದೇ ವರ್ಷಗಳಾಗಿದ್ದರೂ ಎಲ್ರಿಗೂ ಒಮ್ಮೆ ನಮಸ್ಕರಿಸಿ, ನನ್ನೆಸ್ರೇ ಪ್ರಶ್ರಸ್ತಿ ಅಂದಾಗ ಎಲ್ಲೆಡೆ ಒಮ್ಮೆ ನಗೆಯ ಅಲೆ. ಆಗ ವಾತಾವರಣವೂ ಸ್ವಲ್ಪ ಲೈಟಾದ ಭಾವವುಂಟಾಗಿ ನನ್ನ ಕವನ "ಸಲಿಲಕ್ಕೊಂದು ಸಾಲು" ಓದೋಕೆ ಪ್ರಾರಂಭಿಸಿದೆ. ಬರೆದಿದ್ದ ಕವನದ ಏಳು ಪ್ಯಾರಾಗಳನ್ನ ಇನ್ನೊಂದಿಷ್ಟು ಚೆನ್ನಾಗಿ ಬರೆಯಬಹುದಿತ್ತು ಅಂತ ಬೆಳಗ್ಗೆ ಅನಿಸಿದ್ರೂ ಕವನಕ್ಕೆ ಆಮೇಲೆ ಸಿಕ್ಕ ಚಪ್ಪಾಳೆಗಳಿಂದ, ಜಯಪ್ರಕಾಸ್ ಸರ್ ಮುಂತಾದವರ ಮೆಚ್ಚುಗೆಗಳಿಂದ ನನ್ನ ಖುಷಿಗೆ ಮೇರೆಯೇ ಇರಲಿಲ್ಲ.

ನಂತರದ ಕವನ ವಾಚನ ಶ್ರೀಕಾಂತಣ್ಣ ಅವರದ್ದಾಗಿತ್ತು. ನನ್ನ ಜೊತೆಗೇ ಬಂದರೂ ಅವರು ಗಾಡಿ ನಿಲ್ಲಿಸೋಕೆ ಹೋಗಿದ್ರಿಂದ ನನ್ನ ಕವನ ಮುಗಿಯೋ ಹೊತ್ತಿಗೆ ಬಂದಿದ್ರು. ಅವರು ಬರ್ತಿದ್ದ ಹಾಗೆಯೇ ಅವರ ಹೆಸರೂ ಬರಬೇಕೇ ?   ಏ, ನಾನು ಆಮೇಲೆ ಓದ್ತೀನಿ ಅಂತ ಮುಂದಿನ ಕವಿಯನ್ನು ಕರೆಯೋಕೆ ಹೇಳಿದ್ರು. ಆದ್ರೆ ಅವರು ಬಾರದಿದ್ದ ಕಾರಣ 3kಯ ನೂತನ್ ಅವರು ಅವರ ಪರವಾಗಿ ಓದಿದ್ರು. ನಂತರ ಮತ್ತೆ ತಪ್ಪಿಸಿಕೊಳ್ಳಲಾಗದ ಶ್ರೀಕಾಂತಣ್ಣ ವೇದಿಕೆಗೆ ಬರಲೇಬೇಕಾಯಿತು :-) ಎದುರಿಗೇ ಕೂತ ಮಡದಿ, ಮಕ್ಕಳ ಮುಂದೆ ಕವಿಗೋಷ್ಠಿಯಲ್ಲಿ ಕವನವೋದುವ ಭಾಗ್ಯ ಶ್ರೀಕಾಂತಣ್ಣನಿಗೆ :-) ಅವರ ಮಹಾಭಾರತದ ಕಾವ್ಯ ಅವರ ಅನುಭವದ ಮಾತುಗಳಿಗೂ ಸಾಕ್ಷಿಯಾಗಿ ಗದ್ಯ-ಪದ್ಯಗಳ ಸಮ್ಮಿಶ್ರಣವಾಗಿ ಒಂತರಾ ಭಿನ್ನ ಭಾವವನ್ನಿತ್ತಿತು. ನಂತರ ಆ ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಬಂದಿದ್ದ ಲೇಖಕಿ, ಕವಯಿತ್ರಿ ಶ್ರೀಮತಿ ಜಯಲಕ್ಷ್ಮೀ ಪಾಟೀಲ್ ಅವರ ಕವನವಾಚನ. ನಂತರ ಅಂದಿನ ಅತಿಥಿಗಳಾಗಿದ್ದ ಶ್ರೀ ಮಂಜುನಾಥ ಕೊಳ್ಳೇಗಾಲ ಅವರು ಅಂದಿನ ಕವನವಾಚನದ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನೂ ತಿಳಿಸಿದರು.

ಕರ್ನಾಟಕ ನಾಟಕ ಪಿತಾಮಹ ಟಿ.ಪಿ ಕೈಲಾಸಂ:
ಎರಡು ವರ್ಷದ ಹಿಂದೆ ಹೀಗೇ 3k ಯ ಕಾರ್ಯಕ್ರಮದಲ್ಲಿ ಮೊದಲು ಕಂಡಿದ್ದು ಶ್ರೀ ಮಂಜುನಾಥ ಕೊಳ್ಳೇಗಾಲ ಅವರನ್ನು. ಅಂದು ಓದಿನ ಮಹತ್ವ ಏನು ಎಂಬುದರ ಬಗ್ಗೆ ಹೇಳುತ್ತಾ ಕುಮಾರ ವ್ಯಾಸ ಭಾರತ, ಬೊಮ್ಮನ ಹಳ್ಳಿಯ ಕಿಂದರಿ ಜೋಗಿ ಮುಂತಾದ ಕೃತಿಗಳ ಸಾರವನ್ನು ಉಣಬಡಿಸಿದ್ದ ಮಂಜುನಾಥ್ ಸರ್ ಅವರ ಪರಿಚಯವನ್ನು ಅಂದು ಮಾಡಿಕೊಟ್ಟಿದ್ದು ಸತೀಶ್ ನಾಯಕ್ ಭದ್ರಾವತಿ. ಇಂದೂ ಅವರೇ :-) ಟಿ.ಪಿ ಕೈಲಾಸಂ ಅವರ ನಾಟಕಗಳ ಬಗ್ಗೆ ಕೇಳಿದ್ದ ನಮಗೆ ಅವರ ವ್ಯಕ್ತಿತ್ವದ ಪರಿಚಯವಾಗಿದ್ದು ಇಂದೇ.

ತಮಿಳು ಮೂಲದ ಜಸ್ಟೀಸ್ ಪರಮಶಿವಯ್ಯ ಮತ್ತು ಕಮಲಮ್ಮ ದಂಪತಿಗಳ ಮಗನಾಗಿ ಬೆಂಗಳೂರಿನಲ್ಲಿ ಹುಟ್ಟಿದ್ದ ಕೈಲಾಸಂ ಅವರು ಭೂವಿಜ್ಞಾನ ಶಾಸ್ತ್ರದಲ್ಲಿ ಬಿ.ಎ, ಎಂ.ಎ ಪಡೆದು ಲಂಡನ್ನಿನ ರಾಯಲ್ ಕಾಲೇಜ್ ಆಫ್ ಸೈನ್ಸಿನಲ್ಲಿ ಏಳು ವಿಷಯಗಳಲ್ಲಿ ಪ್ರಥಮ ದರ್ಜೆಯಲ್ಲಿ ಪಾಸಾದರು. ಅಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ ಜಾರ್ಜ್ ಬರ್ನಾಡ್ ಶಾ ಅವರ ನಾಟಕಗಳಿಂದ ಅಪಾರ ಪ್ರಭಾವ ಹೊಂದಿದ್ದ ಅವರು ನಂತರ ಕರ್ನಾಟಕ ನಾಟಕ ರಂಗದತ್ತ ಹೊರಳಿದರು. ಉನ್ನತ ದರ್ಜೆಯ ಕುಟುಂಬದಿಂದ ಬಂದ ಕೈಲಾಸಂ ಅವರು ಕನ್ನಡ ಸಾಹಿತ್ಯಕ್ಕಾಗಿ ಒದ್ದಾಡುವುದು ಅವರ ತಂದೆಗೆ ಸುತರಾಂ ಇಷ್ಟವಿರಲಿಲ್ಲ. ಆ ಅಪ್ಪ, ಮಗನ ನಡುವೆ ನಡೆಯೋ ಮನಸ್ತಾಪಗಳನ್ನೂ ಹಾಸ್ಯವಾಗಿ ಪರಿವರ್ತಿಸಿದ ಸನ್ನಿವೇಶಗಳನ್ನು ಕೈಲಾಸಂ ಅವರ ಕೃತಿಗಳಲ್ಲೇ ಓದಬೇಕು. ಆದರೂ ಕೆಲವು ಪ್ರಸಂಗಗಳನ್ನು ನಿನ್ನೆ ಕೇಳಿದ ನೆನಪಿನಲ್ಲಿ ತೆಗೆದುಕೊಳ್ಳುವುದಾದರೆ..


ಪ್ರಸಂಗ ೧: ಕೈಲಾಸಂ ಅವರು ತುಂಬಾ ಕೊಳೆಯಾಗಿದ್ದ ರೂಂ ಒಂದರಲ್ಲಿ ಇರುತ್ತಾರೆ. ಅದಕ್ಕೆ nook(ಮೂಲೆ) ಅಂತ ಕರೆಯುತ್ತಿದ್ದರು.ಅಲ್ಲಿಗೆ ಬಂದ ಅವರ ಹಿತೈಷಿಯೊಬ್ಬರು. ಏನಪ್ಪಾ ಕೈಲಾಸಂ, ನಿನ್ನ ರೂಂ ಇಷ್ಟೊಂದು ಕಸದಿಂದ ತುಂಬಿದೆ ಅಂದ್ರೆ ಕೈಲಾಸಂ ಅವರು, ಸ್ವಾಮಿ ಕಸ ಅಂದರೆ ಏನು ? ಯಾವುದು ಎಲ್ಲಿರಬಾರದು ಅಲ್ಲಿದ್ದರೆ ಕಸ. ಉದಾಹರಣೆಗೆ ನೀವು ಇಲ್ಲಿರಬಾರದು, ನೀವು ಇಲ್ಲಿಗೆ ಬಂದರೆ ಅದು..!!!
ಪ್ರಸಂಗ ೨:ಕೈಲಾಸಂ ಅವರ ತಂದೆಯವರಿಗೆ ತುಂಬಾ ಅನಾರೋಗ್ಯವುಂಟಾಗಿದೆಯೆಂಬುದನ್ನು ತಿಳಿದು ಅವರು ತಮ್ಮ ತಂದೆಯನ್ನು ನೋಡಲು ಬರುತ್ತಾರೆ. ತಂದೆಗೆ ಕೊನೆಗೂ ತಮ್ಮ ಮಗ ತಮ್ಮನ್ನು ನೋಡಲು ಬಂದನಲ್ಲಾ ಅನ್ನೋ ಸಂತೋಷಕ್ಕಿಂತ ಆತ ಹೇಗಿದ್ದಾನೋ ಏನೋ ಎಂಬ ಆತಂಕ. Are you having money to have one square meal per day ಅಂತ ಕೇಳುತ್ತಾರೆ. ಅದಕ್ಕೆ ಕೈಲಾಸಂ ಅವರು ಏನೂ ಉತ್ತರಿಸದಿರುವುದನ್ನ ಕಂಡ ಅವರು what do you need . tell me ಅಂತ ಕೇಳುತ್ತಾರೆ. ಅದಕ್ಕೂ ಸಮರ್ಪಕ ಉತ್ತರ ಸಿಗದಿದ್ದನ್ನ ಕಂಡ ಅವರ ತಂದೆ Are you serious ಎನ್ನುತ್ತಾರೆ . ಅದಕ್ಕೆ ಕೈಲಾಸಂ ಅವರು. I am not serious. you are serious . Take care of your health ಅಂತ ಹೇಳಿ ಅಲ್ಲಿಂದ ತೆರಳುತ್ತಾರೆ !
ಪ್ರಸಂಗ ೩:  ಕೈಲಾಸಂ ಅವರು ಕೊನೆಗೂ ತಮ್ಮ ತಂದೆಯವರಿದ್ದ ಭವ್ಯ ಬಂಗಲೆ whitehouse ಗೆ ಬಂದು ನೆಲಸಬೇಕಾಗುತ್ತದೆ. ಆದರೆ ಅಲ್ಲಿ ಇರುವುದು ಇಷ್ಟವಿಲ್ಲದ ಅವರು ಅದರ ಹೊರಭಾಗದಲ್ಲಿರುವ ಕೊಠಡಿಯೊಂದರಲ್ಲಿ ನೆಲೆಸುತ್ತಾರೆ. ಅದನ್ನು ನೋಡಿದ ಒಬ್ಬರು ಇವರಿಗೆ ಪ್ರಶ್ನಿಸುತ್ತಾರೆ. Finally you are in whitehouse ? ಕೈ:No I am in outhouse !
ಪ್ರಸಂಗ ೪: whitehouse ನಲ್ಲಿ ಕೈಲಾಸಂ ಅವರು ನೆಲೆಸಿದ್ದನ್ನು ತಿಳಿದ ಒಬ್ಬರು ಇವರನ್ನು ಪ್ರಶ್ನಿಸುತ್ತಾರೆ. everything is good in whitehouse ? ಕೈ:yes. I am the only blackspot in it !.  ಕೈಲಾಸಂ ಅವರಿಗೆ ಉತ್ತಮ ಕುಟುಂಬದಿಂದ ಬಂದತಹ ತಾವು ಕೆಳಮಟ್ಟದ ಜೀವನ ನಡೆಸುತ್ತಿರುವುದನ್ನ ಸಮಾಜದಲ್ಲಿ ಕೆಲವರು ಹಾಸ್ಯದ ಸರಕಾಗಿಸಿದ್ದಾರೆ ಅನ್ನೋದು ಗೊತ್ತಿತ್ತು. ಆದರೂ ಅದಕ್ಕೆ ತಲೆಕೆಡಿಸಿಕೊಳ್ಳದ ಅವರು ಅದನ್ನೇ ಹಾಸ್ಯದ ಸರಕಾಗಿಸಿದ್ದರು ಅನ್ನೋದು ಮೇಲಿನ ಪ್ರಸಂಗಗಳಿಂದ ತಿಳಿದುಬರುತ್ತೆ.

ಮೈಸೂರು ಮಹಾರಾಜರ ಧಡೂತಿತನದ ಬಗ್ಗೆಯೂ ಕೈಲಾಸಂ ಅವರು ಹಾಸ್ಯವಾಗಿ ಬರೆದಿದ್ದನ್ನ ಮಂಜುನಾಥ್ ಅವರು ವಿವರಿಸುತ್ತಾ ಹೋಗುತ್ತಾರೆ.
ಪ್ರಸಂಗ ೫: ಕೈಲಾಸಂ:ನೀನು ಮೈಸೂರು ದಸರಾಕ್ಕೆ ಹೋಗ್ತಿದೀಯಲ್ಲ ರಾಜ. ಅಲ್ಲಿನ ಅಂಬಾರಿಯಲ್ಲಿ ಕೆಳಗಿರೋದು ಆನೆ ನೆನಪಿರ್ಲಿ !
ರಾಜ ಅನ್ನೋ ಅವರ ಗೆಳೆಯ/ಪಾತ್ರಧಾರಿ: ಹೂಂ. ಅದು ಗೊತ್ತೇ ಇದ್ಯಲ್ಲ ಸಾರ್,
ಕೈಲಾಸಂ: ಗೊತ್ತಿದ್ರೂ, ಜ್ಞಾಪಕ ಇರ್ಲಿ ಅಂತ ಹೇಳ್ದೆ
ಪ್ರಸಂಗ ೬:  ರಾಜರು ಬರುವಾಗ ಆಗ ೩ ಸಲ ತುಪಾಕಿ ಹಾರಿಸ್ತಿದ್ರಂತೆ. ಅದನ್ನ 3 cheers to his highness ಅಂತ ಕರೀತಿದ್ರಂತೆ. ಅದನ್ನು ಕೈಲಾಸಂ ಅವರು 3 cheers to his anus ಅಂತ ಹಾಸ್ಯ ಹೇಳ್ತಿದ್ರಂತೆ. Ruler of mysore ಬದಲು road roler of mysore ಅಂತಿದ್ರು. ಅವರ sharp wit ಅನ್ನೋದು ಹಾಗಿತ್ತು ಅನ್ನೋದಕ್ಕೆ ಇವು ಕೆಲವು ಉದಾಹರಣೆಗಳಷ್ಟೆ.

ಕೈಲಾಸಂ ಅವರ ಗೆಳೆಯ ವೆಂಕಣ್ಣಯ್ಯನವರು ಅಂತ ಒಬ್ಬರಿದ್ರಂತೆ. ಅವರು ಆರೂಕಾಲಡಿಯ ಆಜಾನುಬಾಹುವಾದ್ರೆ ಕೈಲಾಸಂ ಐದೂಕಾಲಡಿಯವರು.ಅವರ ಜೊತೆ ಹೋಗ್ತಾ ನಡೆದ ಸುಮಾರು ಹಾಸ್ಯ ಪ್ರಸಂಗಗಳನ್ನೂ ಅವರು ಇಲ್ಲಿ ಉಲ್ಲೇಖಿಸುತ್ತಾರೆ
ಪ್ರಸಂಗ ೭:ಹಿಂಗೇ ಒಮ್ಮೆ ನಡೆದು ಹೋಗ್ತಾ .ಸ್ವಾಮಿ ವೆಂಕಣ್ಣಯ್ಯನವರೇ ಹೇಗಿದ್ರೂ ನಿಂತೇ ಇದ್ದೀರಿ. ಹಾಗೇ ಸ್ವಲ್ಪ ಮೇಲೆ ನೋಡಿ. ನಮ್ಮ ಹಿರಿಯರು ಯಾರಾದ್ರೂ ಕಾಣಬಹುದೇನೋ. ಎಲ್ಲಾ ಆರಾಮಿದ್ದಾರಾ ಕೇಳಿ ಹೇಳಿ.

ಪ್ರಸಂಗ ೮:ವೆಂಕಣ್ಣಯ್ಯ ಅವರು ಮತ್ತು ಕೈಲಾಸಂ ಅವರು ಒಮ್ಮೆ ಮಾರ್ಕೇಟಿಗೆ ಹೋಗಿರ್ತಾರೆ
ವೆಂಕಣ್ಣಯ್ಯ: ಏನಮ್ಮಾ, ನಿಂಬೆಹಣ್ಣಿಗೆ ಎಷ್ಟು ?
ಸ್ವಾಮಿ: ಅದು ನಿಂಬೆಹಣ್ಣಲ್ಲ. ಸ್ವಲ್ಪ ಬಗ್ಗಿ ನೋಡಿ, ಅದು ಮೋಸಂಬಿ !!

ಹೀಗೇ ಕೈಲಾಸಂ ಅವರ ಹಾಸ್ಯ ಗಳನ್ನು ತೆರೆದಿಟ್ಟ ಮಂಜುನಾಥ್ ಅವರು ನಂತರ ಕೈಲಾಸಂ ಅವರ ನಾಟಕಗಳ ಪರಿಚಯದತ್ತ ತಿರುಗಿದರು. ಇಂದಿನ ಶೈಕ್ಷಣಿಕ ವ್ಯವಸ್ಥೆಯ ಅಣಕಾಗಿರುವ ಪೋಲಿ ಕಿಟ್ಟಿ, ಟೊಳ್ಳುಗಟ್ಟಿ ನಾಟಕಗಳ ಪರಿಚಯ ಮಾಡಿಕೊಟ್ಟ ಶ್ರೀ ಮಂಜುನಾಥ ಕೊಳ್ಳೇಗಾಲ ಅವರ ಮಾತುಗಳ ಬಗ್ಗೆ ಹೆಚ್ಚು ಬರೆಯೋ ಬದಲು ಅವರ ಮಾತುಗಳನ್ನ ಮತ್ತೊಮ್ಮೆ ಕೇಳೋದೇ ಮೇಲು ಅನಿಸುತ್ತೆ ! ಅವರ ನಾಟಕಗಳಲ್ಲಿ ಬರುವ ಮೋನೋಲಾಗಿನಲ್ಲಿನ ಗುಂಡೂ ಮತ್ತು ಸುಬ್ಬುವಿನ ಬಗ್ಗೆಯಾಗಲಿ, ಐದು ಸಖಿಯರು ಒಂದು ಉದ್ಯಾನವನದ ಬಗ್ಗೆ ಬೇರೆ ಬೇರೆ ಭಾಷೆಗಳಲ್ಲಿ ಹಾಡೋದನ್ನಾಗಲಿ ಬರೆಯೋ ಬದಲು ಅದನ್ನು ಕೇಳಿದ್ರೇ ಮಜ. ಆ ರೆಕಾರ್ಡಿಂಗುಗಳು ಆಸಕ್ತ ಕೇಳುಗರಿಗಾಗಿ..

ಮಣಿಕಾಂತ್ ಸರ್ ಅವರಿಗೆ ರಾಜ್ಯೋತ್ಸವ ಸನ್ಮಾನ
ನಂತರ ಆದಿನದ ಮುಖ್ಯ ಕಾರ್ಯಕ್ರಮವಾಗಿದ್ದ ಶ್ರೀ ಮಣಿಕಾಂತ್ ಸರ್ ಅವರ ಸನ್ಮಾನ ಕಾರ್ಯಕ್ರಮವೂ ನಡೆಯಿತು. ಅದನ್ನು ನಡೆಸಿಕೊಟ್ಟವರು ಸೂರತ್ಕಲ್ಲಿನ ಮಹೇಶ್ ಮೂರ್ತಿ ಅವರು. ಮಣಿಕಾಂತ್ ಸರ್ ಅವರಿಗೆ ನೀಡಲಾದ ಪುರಸ್ಕಾರ ಪತ್ರವನ್ನು ಓದಿ, ಆಲನಹಳ್ಳಿ ಆರ್ ಮಣಿಕಾಂತ್ ಸರ್ ಅವರ ಸಾಧನೆಗಳ ಬಗ್ಗೆ ನೆರೆದ ಸಭಿಕರಿಗೆ ಮತ್ತೆ ನೆನಪಿಸಿಕೊಟ್ಟಿದ್ದು ೩k ಯ ಅಧ್ಯಕ್ಷೆಯಾದ ಶ್ರೀಮತಿ ರೂಪಾ ಸತೀಶ್ ಅವರು. ಪತ್ನಿ ನಾಗರತ್ನ, ಪುತ್ರಿ ನೀಲಿಯವರ ಸಂಸಾರ ಹೊಂದಿದ ಮಣಿಕಾಂತ್ ಅವರ ನೀಲಿಮ ಪ್ರಕಾಶನದ ಬಗ್ಗೆ ಅವರ ಅಮ್ಮ ಹೇಳಿದ ಎಂಟು ಸುಳ್ಳು ಪುಸ್ತಕದ ಒಂದೂವರೆ ಲಕ್ಷಕ್ಕೂ ಹೆಚ್ಚು ಪ್ರತಿಗಳು ಖರ್ಚಾದ ಬಗ್ಗೆ ಮುಂತಾದ ಸಾಧನೆಗಳ ಬಗ್ಗೆ ಕೇಳಿದ ನಮಗೆ ಮೈ ಜುಮ್ಮೆಂದಿದ್ದು ಸುಳ್ಳಲ್ಲ.ಸನ್ಮಾನದ ನಂತರ ಮಣಿಕಾಂತ್ ಸರ್ ಅವರು ಇದು ನಮ್ಮ ಮನೆಯ ಕಾರ್ಯಕ್ರಮವೇ ಅನಿಸುವಷ್ಟು ಚೆನ್ನಾಗಿ ಮೂಡಿಬರುತ್ತಿದೆ. ಖುಷಿ ಕೊಡುತ್ತಿದೆ ಅಂತಲೂ, ೨೦೦೮ರಲ್ಲಿ ಶುರುವಾದ ೩k ಮತ್ತದರ ಕಾರ್ಯಗಳಿಗೆ ಮೆಚ್ಚುಗೆಯನ್ನೂ ವ್ಯಕ್ತಪಡಿಸಿದರು. ನಂತರದಲ್ಲಿ ಸಭಿಕರ ಕೋರಿಕೆಗೆ ಕೊಂಚ ಆಶ್ಚರ್ಯದಿಂದಲೇ ಸ್ಪಂದಿಸಿದ ಮಣಿಕಾಂತ್ ಅವರ ಪತ್ನಿ ಶ್ರೀಮತಿ ನಾಗರತ್ನ ಮಣಿಕಾಂತ್ ಅವರು ನಿಸಾರ್ ಅಹಮದ್ ಅವರ ಭಾವಗೀತೆಯೊಂದನ್ನು ಹಾಡಿ ನಾವೆಲ್ಲಾ ಭಾವಲೋಕದಲ್ಲಿ ವಿಹರಿಸುವಂತೆ ಮಾಡಿದರು. 

ಎದ್ದೇಳು ಕನ್ನಡಿಗ:
ನಂತರ ಶ್ರೀ ಸತೀಶ್ ಎಸ್ ಅವರು ಬರೆದು, ಶ್ರೀ ವಿಶಾಲ್ ನಾಯಕ್ ಅವರು ಸಂಗೀತ ನಿರ್ದೇಶಿಸಿರುವ , ಶ್ರೀ ರವಿಕಿರಣ್ ಅವರು ಹಾಡಿರುವ ಎದ್ದೇಳು ಕನ್ನಡಿಗ ಹಾಡನ್ನು ಪ್ರಸ್ತುತ ಪಡಿಸಲಾಯಿತು. ಪರರಿಗೆ ಉಪಕಾರಿಯಾಗಲು ಮುಂದಾಗಿ ಮನೆಗೇ ಮಾರಿಯಾಗುತ್ತಿರುವ ಕನ್ನಡಿಗ ತನ್ನ ನಾಡ, ಸಂಸ್ಕೃತಿಯ ಬಗ್ಗೆ ಹೆಮ್ಮೆ ಹೊಂದಿ ಅದನ್ನು ಉಳಿಸಿಕೊಳ್ಳಲು ಮುಂದಾಗದಿದ್ದರೆ ಅಪಾಯ ತಪ್ಪಿದ್ದಲ್ಲ, ಅದನ್ನು ತಪ್ಪಿಸಲು ಎದ್ದೇಳು ಕನ್ನಡಿಗ ಎಂಬ ಅವರ ಗೀತೆ ಸಭಿಕರ ಗಮನ ಸೆಳೆಯಿತು. ಕಾರ್ಯಕ್ರಮ ಮಿಸ್ ಮಾಡಿಕೊಂಡವರಿಗಾಗಿ ಅವರ ಈ ಹಾಡಿನ ಯೂಟ್ಯೂಬ್ ಕೊಂಡಿ https://www.youtube.com/shared?ci=0mboQXUr1Hs

ಹಾಸ್ಯ ಲಾಸ್ಯ:
ಶ್ರೀ ಶಶಿ ಗೋಪಿನಾಥ್ ಅವರಿಂದ ಹಾಸ್ಯ ಲಾಸ್ಯ ಕಾರ್ಯಕ್ರಮ ನಡೆಯಿತು. ಹಾಸ್ಯ, ಕನ್ನಡದ ನಟರು ಬಂದು 3k ಕಾರ್ಯಕ್ರಮ ನೋಡಿದ್ದರೆ ಹೇಗಿರುತ್ತಿತ್ತು ಎಂಬ ಮಿಮಿಕ್ರಿ ನಡೆಸಿಕೊಟ್ಟ ಅವರು ತಮ್ಮ ಮುಂದಿನ ಕಾರ್ಯಕ್ರಮವಾದ ನೃತ್ಯಕ್ಕೆ ಪೆನ್ ಡ್ರೈವ್ ತರಲು ಮುಂದಾದರೆ ಆ ಗ್ಯಾಪಲ್ಲೇ ಮಿಮಿಕ್ರಿ ನಡೆಸಿಕೊಟ್ಟ ನಿರೂಪಕ ಅರುಣ್ ಶೃಂಗೇರಿ ಅವರ ಸಮಯ ಪ್ರಜ್ಞೆ, ಹಾಸ್ಯ ಪ್ರಜ್ಞೆ ಸಭಿಕರ ಶಿಳ್ಳೆ, ಕರತಾಡನಗಳಿಗೆ ಸಾಕ್ಷಿಯಾಯಿತು

ಕವನ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಣೆ.
3kಕವನ ಸ್ಪರ್ಧೆಯಲ್ಲಿ ಬಹುಮಾನ ವಿಜೇತರಾದ ಕುಮಾರಿ ಮಾನಸ ಭಟ್ ಅವರ ಪರವಾಗಿ ಅವರಣ್ಣ ನಾಗರಾಜ ಹೆಗಡೆ ಅವರು, ಗುಬ್ಬಚ್ಚಿ ಸತೀಶ್ ಅವರು, ಮೌನಯಾನ ಬ್ಲಾಗಿನ(http://vinayakabhatmb.blogspot.in/2016/10/blog-post_25.html) ಮತ್ತು ಕವನ ಸ್ಪರ್ಧೆಯಲ್ಲಿ ಬಹುಮಾನ ವಿಜೇತರಾದ ವಿನಾಯಕ ಭಟ್ ಅವರು ಮತ್ತು ಗುರುನಾಥ್ ಬೋರಗಿಯವರು ಬಹುಮಾನಗಳನ್ನು ಸ್ವೀಕರಿಸಿದರು. ಬಹುಮಾನ ವಿಜೇತರಾಗದಿದ್ದರೂ ಟಾಪ್ ೧೦ನಲ್ಲಿ ಆಯ್ಕೆಯಾಗಿ ಕವಿಗೋಷ್ಠಿಯಲ್ಲಿ ಭಾಗವಹಿಸಿದ್ದ ಸ್ಪರ್ಧಿಗಳಿಗೂ ಅಭಿನಂದನಾ ಪತ್ರ, ಪುಸ್ತಕ ಬಹುಮಾನಗಳನ್ನು ವಿತರಿಸಲಾಯಿತು.

ಅಧ್ಯಕ್ಷೀಯ ನುಡಿ:
ಕಾರ್ಯಕ್ರಮದ ಅಧ್ಯಕ್ಷರಾಗಿದ್ದ ಅಶೋಕ್ ಶೆಟ್ಟಿಯವರು ತಮ್ಮ ಹಾಸ್ಯಭರಿತ ಮಾತುಗಳಿಂದಲೇ ನೆರೆದವರ ಮನಗೆದ್ದರು.

ವಂದನಾರ್ಪಣೆ:
ಕಾರ್ಯಕ್ರಮದ ವಂದನಾರ್ಪಣೆಯನ್ನು ನಡೆಸಿಕೊಟ್ಟವರು 3k ಯ ಗೋಪಿನಾಥ್ ಅವರು. ಬಂದ ಅಧ್ಯಕ್ಷ, ಅತಿಥಿ, ತೀರ್ಪುಗಾರ , ಸಭಿಕರಿಗೆ ವಂದನಾರ್ಪಣೆಗಳನ್ನು ತಿಳಿಸುವುದು ಸಾಮಾನ್ಯ ಶಿಷ್ಟಾಚಾರ. ಆದರೆ ಗೋಪಿನಾಥ್ ಅವರು ಆ ಕಾರ್ಯಕ್ರಮಕ್ಕೆ ಎಳನೀರು ಕೊಚ್ಚಿ ಕೊಟ್ಟವರಿಗೆ, ಸಮೋಸ ಮುಂತಾದ ತಿನಿಸುಗಳನ್ನು ತಂದು ಕೊಟ್ಟವರಿಗೂ ಬಿಡದಂತೆ ವಂದನೆ ತಿಳಿಸೋ ಜೋಷಲ್ಲಿದ್ದಿದ್ದು ಕೊನೆಯ ಬೆಂಚಿನ ಹುಡುಗರಿಗೆ ಭರಪೂರ ಮನೋರಂಜನೆ ತಂದುಕೊಟ್ಟಿತ್ತು. ಅವತ್ತಿನ ವಿಷಯವೇ ಹಾಸ್ಯ ಅಂದ ಮೇಲೆ ಕೇಳಬೇಕೆ ? ವಂದನಾರ್ಪಣೆ ವೇಳೆ ಗೋಪಿನಾಥ್ ಅವರಿಗೆ ಮೊಬೈಲು ಬ್ಯಾಟ್ರಿಯ ಮೂಲಕ ನೆರವಾಗೋಕೆ ಬಂದ ನೂತನ್ ಅವರ ನಡೆ ಸಭಿಕರ ನಗೆಗಡಲಲ್ಲಿ ಮಿಂದೇಳುವಂತೆ ಮಾಡಿತು.

ಕೊನೆಗೊಂದಿಷ್ಟು ತಿಸಿಸು, ಕೊನೆಯಿಲ್ಲದಷ್ಟು ನಗು:
3k ಯ ಕಾರ್ಯಕ್ರಮದಲ್ಲಿ ವೇದಿಕೆಯ ಮೇಲೆ ಬರದಿದ್ದರೂ ತೆರೆಮರೆಯಲ್ಲೇ ಕೆಲಸ ಮಾಡುತ್ತಿದ್ದ ಮಲ್ಲೇಶ್, ಪ್ರಮೋದ್  ಮುಂತಾದವರು ಮಾತಿಗೆ ಸಿಕ್ಕಿದ್ದು, ಫೋಟೋಗಳಲ್ಲಿ ಬಂಧಿಯಾಗಿದ್ದು ಕಾರ್ಯಕ್ರಮ ಮುಗಿದು ತಿಂಡಿಗೆ ವೇದಿಕೆಯಾದಾಗ್ಲೇ. ಎದ್ದೇಳು ಕನ್ನಡಿಗ ಗೀತೆ ಬರೆದ ಸತೀಶ್ ಅವರೊಂದಿಗೂ, ಸಂಗೀತ ಸಂಯೋಜನೆಗಾರ ವಿಶಾಲ್ ಮತ್ತು ಗಾಯಕ ರವಿಕಿರಣ್ ಅವರೊಂದಿಗೂ ನಡೆಸಿದ ಮಾತುಕತೆ ಖುಷಿ ಕೊಟ್ಟಿತು. ಜೇಪಿ, ಗುರುನಾಥ್ ಬೋರಗಿ, ಶ್ರೀಕಾಂತಣ್ಣ, DOM ಮಹೇಶ್ ಗೌಡ, ಸತೀಶ ನಾಯ್ಕ್ ಭದ್ರಾವತಿ ಅವರಿದ್ದಲ್ಲಿ ನಗೆಯಿಲ್ಲದಿರುತ್ಯೆ ? ಇನ್ನೊಂದಿಷ್ಟು ಕಾಲೆಳೆತ, ನಗೆಯ ಅಲೆ. ಕಪ್ಪು-ಹಣ, ಬಿಳಿ-ಹಣ ಮುಂತಾದ ವಿಷಯಗಳ ಚರ್ಚೆಗೂ ನಾಂದಿಯಾದ ತಿಂಡಿ ಕಾರ್ಯಕ್ರಮ ಒಂದಿಷ್ಟು ಫೋಟೋ ಸೆಷನ್ನುಗಳಿಗೂ ಸಾಕ್ಷಿಯಾಯಿತು. ಘಂಟೆ ಏಳೂ ಕಾಲಾಗ್ತಾ ಬಂದಿದ್ರಿಂದ ಹಗೂರಕ್ಕೆ ಒಬ್ಬೊಬ್ಬರೇ ಖಾಲಿಯಾಗುತ್ತಾ ಬಂದಿದ್ರೂ ಬ್ಲಾಸಂ ಶಾಲೆಯಲ್ಲಿನ ನಗೆಯಲೆಗಳು ನಿಂತಿರ್ಲಿಲ್ಲ.  ಇನ್ನೂ ಎರಡೂವರೆ ತಾಸಿನ ಬಸ್ ಪ್ರಯಾಣ ಬಾಕಿಯುಳಿದಿದ್ದ ಕಾರಣ ಅಲ್ಲಿಂದ
ಹೊರಡಲೇ ಬೇಕಾದ ಬಾರದ ಮನಸ್ಸು ನನ್ನದಾದರೂ ಅದೆಷ್ಟೋ ಬ್ಲಾಗಿಗ, ಮುಖ ಹೊತ್ತುಗೆಯ ಗೆಳೆಯರನ್ನು ಮುಖತಃ ಕಂಡ, ಕೈಲಾಸಂ ಅವರ ಸಾಹಿತ್ಯಕ್ಕೆ, ಅವರ ಜೀವನದ ಅನುಭವಗಳಿಗೆ ಕಿವಿಯಾದ ಖುಷಿಯೊಂದಿಗೆ,,ಬರಲಿರೋ ಹುಟ್ಟಿದಬ್ಬಕ್ಕೆ ಮುಂಚೆಯೇ ಒಂದು ಬರ್ತಡೇ ಗಿಫ್ಟ್ ಪಡೆದ ಸಂಭ್ರಮದಲ್ಲಿ.. 

ಹೀಗೊಂದು ಕಾರ್ಯಕ್ರಮ ವರದಿ,..
ಕೊನೆಯ ಬೆಂಚಿನ ಹುಡುಗರಿಂದ..