ಅರೆನಿದ್ದೆ ನೇತ್ರದಲಿ

ಅರೆನಿದ್ದೆ ನೇತ್ರದಲಿ ಕನಸುಗಳು ರಾತ್ರೆ
ಮುಚ್ಚಿದ ಕಣ್ಣೊಳಗೆ ಬಣ್ಣಗಳ ಜಾತ್ರೆ
ನನಸಾಗದಾಸೆಗಳು ಮಸುಕಾದ ನೆನಪುಗಳು
ಮುಸುಕೊಳಗೆ ಸುಳಿದವು ನಸುಕಾಗೊ ಮುಂಚೆ |1|

ರಾಜ ನಾ ರಾಜ್ಯಕೆ, ಹೋರಾಟ ರಂಗದಲಿ
ಟೀವಿಯಲಿ ಕೃಷ್ಣನ ನೋಡಿದಾ ರಾತ್ರೆ
ಫುಟ್ಬಾಲ್ ಪಂದ್ಯವನು ನೋಡಿದಿರುಳು ಪಕ್ಕಕ್ಕೆ
ಮಲಗಿದವ ಬಯ್ಯುತಿಹ ನಾ ಕೊಟ್ಟ ಗೋಲಿಗೆ |2|

ನೆನಪಿನಲಿ ಕೆಲವೊಂದು ಮರೆಯಾಗುವುದು ಹಲ
-ವರಿಯದ ಪ್ರಶ್ನೆಗಳಿಗುತ್ತರವು ಒಮ್ಮೊಮ್ಮೆ
ಎಷ್ಟೊಂದು ಕಲ್ಪನೆ, ಜಯದ ಸವಿ ನೆನಪುಗಳು
ಸೋಲ ಬಿಡಬಹುದಲ್ಲ ಇದು ಬರೀ ಕನಸೆಂದು|3|