ಬರೆದ ಸಾಲುಗಳೆಲ್ಲ

ಬರೆದ ಸಾಲುಗಳೆಲ್ಲ ಕವನವಲ್ಲವೊ ಗೆಳೆಯ
ಅಕ್ಷರಗಳಾಟವದು ಮರೆಯಬೇಡ
ಉಕ್ಕೊ ಭಾವಕ್ಕಡ್ಡ ಹಿಡಿದ ಬಿಂದಿಗೆಯದು
ಹೆಚ್ಚು ಸಿಕ್ಕಿದರದೇ ಗೆಲುವು ನೋಡ
ಅವನು ಮೆಚ್ಚುವನೆಂಬ ಭ್ರಮೆಯು ಬೇಡ|1|

 ಜ್ಞಾನಸಾಗರದಲ್ಲಿ ಚಿಪ್ಪ ಹುಡುಕುವ ನಾವು
ಸಿಕ್ಕಿಹುದು ಕೆಲವರಿಗೆ ಒಳ್ಳೆ ಮುತ್ತು
ಕವಡೆಗಳು ಕೆಲವರಿಗೆ ಕೆಲಕಾಲದೊರೆಗೆ
ದಡದಲ್ಲೇ ನಿಂತವಗೆ ಉಸುಕಿನಲೆ ಮಸುಕಾದ
ಆಕಾರ ಕಂಡಿಹುದು ಸೃಷ್ಟಿಯಂತೆ|2|

 ಬರೆಯುವುದು ಸಹಜ,
ಮೆಚ್ಚುವಿಕೆಗಿಲ್ಲ ಸಜ
ಬರೆದು ಬೆಳೆದಾನೆಂಬ ಮಾತ್ಸರ್ಯವೇಕೆ?
ನಾನೆ ಬರೆಯುವೆನೆಂದು ಬೀಗ ಬೇಕೆ?|೩|